ଭବାନୀପାଟଣା,୬।୪(ସ୍ବ.ପ୍ର.): କଳାହାଣ୍ଡି ଜିଲାର ପନିପରିବାର ଗାଁ କହିଲେ ଜୁନାଗଡ ବ୍ଲକର କେଲିଆକୁ ବୁଝାଏ। କାରଣ ଏହି ଗଁା ବର୍ଷ ତମାମ ଜିଲାର ବିଭିନ୍ନ ଅଞ୍ଚଳକୁ ପନିପରିବା ଯୋଗାଣ କରିଥାଏ। ବର୍ତ୍ତମାନ ଏହି ଗଁାରେ ପ୍ରାୟ ୮୦ ଏକର ଜମିରେ ପନିପରିବା ଚାଷ ହୋଇଥିବା ଜଣାପଡିଛି। ମୁଖ୍ୟତଃ ପାତଲଘଣ୍ଟା(ଟମାଟୋ), ବାଇଗଣ, ଫୁଲକୋବି, ପତରକୋବି, ଭେଣ୍ଡି, ଶାଗ, କଲରା ଆଦି ପନିପରିବା ଚାଷ ହୋଇଛି। ଏବେ ପ୍ରାୟ ବାଡିରେ ପାତଳଘଣ୍ଟା ଅମଳ ହୋଇଛି। ଏଠାରୁ ପ୍ରତିଦିନ ଶହ ଶହ କୁଇଣ୍ଟାଲ ପାତଳଘଣ୍ଟା କିଣି ବେପାରୀମାନେ ଚାରିଚକିଆ ଯାନରେ ସହରକୁ ନେଇ ଯାଉଛନ୍ତି। ସେହିପରି ସ୍ଥାନୀୟ ଚାଷୀମାନେ ମଧ୍ୟ ନିଜ ଅଞ୍ଚଳରେ ପନିପରିବା ଗଁା ଗଁା ବିକ୍ରି ପାଇଁ ନେଇଥାନ୍ତି। ଜୁନାଗଡ ବ୍ଲକ କଳିଆକୁଣ୍ଡଲ ପଞ୍ଚାୟତରେ କେଲିଆ ଗଁା ରହିଥିବାବେଳେ ଏଠାକାର ଜନସଂଖ୍ୟା ୧୫ଶହରୁ ଊର୍ଦ୍ଧ୍ୱ। ଏଠାରେ ମାଳି, ଗୌଡ, ହରିଜନ, କନ୍ଦ, ଗଣ୍ଡ ଆଦି ସଂପ୍ରଦାୟର ଲୋକେ ବସବାସ କରିଥାନ୍ତି। ସେଥିମଧ୍ୟରୁ ମାଳି ସଂପ୍ରଦାୟର ପ୍ରାୟ ୭୦ ପ୍ରତିଶତ ରହିଥିବା ଜଣାପଡିଛି। ଗଁାର ଶତକଡା ୮୦ ଭାଗ ଲୋକ ପନିପରିବା ଚାଷ ଉପରେ ନିର୍ଭର କରିଥାନ୍ତି। ବର୍ଷା ଦିନେ ସ୍ଥାନୀୟ ଚାଷୀ ଧାନ ଚାଷ କରୁଥିବାରୁ ୨୦ରୁ ୨୫ ଏକର ଏଠାରେ ପନିପରିବା ଚାଷ କରିଥାନ୍ତି। କିନ୍ତୁ ଖରାଦିନେ ଏଠାକାର ଚାଷୀ ୮୦ରୁ ୧୦୦ ଏକର ପାଖାପାଖି ଜମିରେ ପନିପରିବା ଚାଷ କରିଥାନ୍ତି। ଗଁାର ଅଧ ପ୍ରତିଶତ ଉପର ଭାଗ ଚାଷୀ ଡିପ୍ ବୋରୱେଲ(ଗଭୀର ନଳକୂପ) ସାହାଯ୍ୟରେ ଚାଷ କରୁଥିବା ବେଳେ ଆଉ ଅଧି ପ୍ରତିଶତ ସ୍ଥାନୀୟ ହାଲେର ଜୋରର ପାଣିରେ ପନିପରିବା ଚାଷ କରିଥାନ୍ତି। ପୂର୍ବରୁ ଗଁାର ଉପର ଭାଗରେ ଥିବା ଚାଷୀଙ୍କ ପାଣି ସୁବିଧା ପାଇଁ ସରକାରଙ୍କ କୌଣିସ ବ୍ୟବସ୍ଥା ନ ଥିବା ବେଳେ ପରବର୍ତ୍ତୀ ସମୟରେ ଏଠାରେ ୨୮ଟି ଗଭୀର ନଳକୂପ ଖୋଲାଯାଇଥିଲା। ଯାହାଫଳରେ ଗଭୀର ନଳକୂପ ସାହଯ୍ୟରେ ଉପର ଭାଗ ଚାଷୀ ଏବେ ପନିପରିବା ଚାଷ କରୁଛନ୍ତି। ସେହିପରି ଏଠାରେ ବୋହି ଯାଇଥିବା ହାଲେର ଯୋର ଖରା ସମୟରେ ଏହା ଚାଷୀଙ୍କ ପାଇଁ ଲାଇଫ ଲାଇନ ଭଳି କାମ କରିଥାଏ। ପନିପରିବା ଚାଷ କରି କେଲିଆ ଗ୍ରାମର ଚାଷୀମାନେ ଏବେ ଅଧିକ ଉପାର୍ଜନ କରି ଉପକୃତ ହେବା ସହ ଜିଲାରେ ମଧ୍ୟ ପନିପରିବାରର ଅଭାବ ଦୂର କରି ପାରୁଛନ୍ତି। ଅଧିକାଂଶ ଚାଷୀ ବର୍ତ୍ତମାନ ପାତଳଘଣ୍ଟା,ବାଇଗଣ କେଜି ପିଛା ୧୦ଟଙ୍କାରେ ବ୍ୟବସାୟୀଙ୍କୁ ଟେକି ଦେଉଛନ୍ତି। ଏହି ଗଁାରେ ଏକ ଶୀତଳଭଣ୍ଡାର କରାଗଲେ ଚାଷୀମାନେ ଖରାଦିନେ ସେଠାରେ ପନିପରିବା ସଂରକ୍ଷିତ ରଖି ବର୍ଷା ସମୟରେ ଅଧିକ ଦାମରେ ବିକ୍ରି କରି ପାରନ୍ତେ। ଏ ଦିଗରେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ବିହିତ ପଦକ୍ଷେପ ନେବାକୁ ଦାବି ହେଉଛି।
ରିର୍ପୋଟ: ଉତ୍ତମ କୁମାର ଦାଶ