ବଲାଙ୍ଗୀର ଅଫିସ, ୨୮।୭- ବଲାଙ୍ଗୀର ସଦର ଥାନା ଅନ୍ତର୍ଗତ ବଡତେଲେନ୍ପାଲି ଗାଁରେ ମଙ୍ଗଳବାର ବଜ୍ରାଘାତରେ ୩ ମହିଳାଙ୍କ ମୃତ୍ୟୁ ଘଟିଛି। ଅନ୍ୟ ଜଣେ ଯୁବତୀ ଗୁରୁତର ଆହତ ହୋଇ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସପିଟାଲରେ ଭର୍ତ୍ତିି ହୋଇଛନ୍ତି। ବଡତେଲେନପାଲି ଗାଁର ଜଣେ ଚାଷୀଙ୍କ କ୍ଷେତରେ ମଙ୍ଗଳବାର ପହ୍ଳାରୁଆ କାର୍ଯ୍ୟ ଚାଲିଥିଲା। ପ୍ରାୟ ୧୮ ଜଣ ମହିଳା ଓ ପୁରୁଷ ଏହି ପହ୍ଳାରୁଆ କାର୍ଯ୍ୟରେ ଲାଗିଥିଲେ। ଦିନ ପ୍ରାୟ ୨ଟା ସମୟରେ ହଠାତ୍ ବଜ୍ରାଘାତ ହେବାରୁ ଜଣେ ମହିଳା କ୍ଷେତରେ ଟଳିପଡିଥିଲେ । ତାଙ୍କ ନାମ ବିଳାସିନୀ ରାଉତ୍ (୨୯) । ଅନ୍ୟ ୩ ଗୁରୁତର ମହିଳାଙ୍କୁ ସେଠାରୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସପିଟାଲକୁ ଅଣାଯାଇଥିଲା। ସେଠାରେ ଡାକ୍ତର ଦୁଇଜଣ ମହିଳାଙ୍କୁ ମୃତ ଘୋଷଣା କରିଥିଲେ। ସେହି ଦୁଇଜଣ ହେଲେ ଯଶୋବନ୍ତୀ ଶବର (୨୮) ଓ ପୂର୍ଣ୍ଣମୀ ଧରୁଆ (୨୮)। ଅନ୍ୟ ଜଣେ ଗୁରୁତର ଯୁବତୀ ସୀମା ଧରୁଆ (୧୬)ଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା ଆରମ୍ଭ କରାଯାଇଥିବା ଜଣାପଡିଛି।
