ବେଲଗାଭି, ୬ା୯: କର୍ନାଟକର ବେଲଗାଭି ଜିଲାରେ ଥିବା ଶ୍ରୀଗୁରୁ ମାଦିଓ୍ବାଲୋଶ୍ୱର ମଠରୁ ଲିଙ୍ଗାୟତ ସନ୍ଥ ବାସବ ସିଦ୍ଦାଲିଙ୍ଗ ସ୍ବାମୀଙ୍କ ଝୁଲନ୍ତା ମୃତଦେହ ପୋଲିସ ଜବତ କରିଛି। ତାଙ୍କୁ ନିକଟରୁ ଏକ ସୁଇସାଇଡ୍ ନୋଟ୍ ମିଳିଥିବା ପୋଲିସ କହିଛି। ଅନ୍ୟପକ୍ଷେ ପୋଲିସ ଘଟଣାର ଅଧିକ ତଦନ୍ତ ଚଳାଇଛି। ଏପରି କି ଏକ ଭିଡିଓରେ ଦୁଇ ମହିଳା କେତେକ ମଠରେ ଚାଲିଥିବା ଯୌନ ନିର୍ଯାତନା ଘଟଣାକୁ ନେଇ ଆଲୋଚନା କରୁଥିବା ଦେଖିବାକୁ ମିଳିଛି। ଏଥିରେ ଦୁଇ ମହିଳା ସନ୍ଥ ବାସବଙ୍କ ନାମ ନେଉଛନ୍ତି। ଭିଡିଓ ଭାଇରାଲ ହେବାରେ ଲାଗିଛି। ଏହାକୁ ନେଇ ସନ୍ଥ ବାସବ କିଛି ଦିନ ହେଲା ମାନସିକ ଚାପରେ ଥିଲେ ବୋଲି ଜଣାପଡିଛି। ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।