ଆନନ୍ଦପୁର,୨ା୧୦(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ବ୍ଲକ ଅନ୍ତର୍ଗତ ଆଦିବାସୀ ଅଧ୍ୟୁଷିତ ବୁଢ଼ୀକୁଦ ପଞ୍ଚାୟତର ମହିଳାମାନେ ପଞ୍ଚାୟତକୁ ମଦମୁକ୍ତ କରିବା ପାଇଁ ଅଣ୍ଟା ଭିଡ଼ିଛନ୍ତି। ପଞ୍ଚାୟତର ଟଭାକୁଦ, ବୁଢ଼ୀକୁଦ ଏବଂ ସନ୍ତୋଷପୁର ଗ୍ରାମର ଶତାଧିକ ମିଶନଶକ୍ତିର ମହିଳାଙ୍କ ଆହ୍ବାନରେ ଏକ ବୈଠକ ଅନୁଷ୍ଠିତ ହୋଇଯାଇଛି। ସମାଜସେବୀ ରବୀନ୍ଦ୍ର କୁମାର ସ୍ବାଇଁଙ୍କ ସଂଯୋଜନାରେ ଆୟୋଜିତ ବୈଠକରେ ବୁଢ଼ୀକୁଦ ପଞ୍ଚାୟତର ସରପଞ୍ଚ ପ୍ରଫୁଲ୍ଲ ମହାରଣା, ସମିତିସଭ୍ୟ କୁଳମଣି ନାଇକ, ପଞ୍ଚାୟତର ବିଜେଡି ସଭାପତି ରବୀନ୍ଦ୍ର ମହାନ୍ତି, ବଳରାମ ନାଇକ, ଗଣେଶ ନାଇକ, ଲକ୍ଷ୍ମୀଧର ମହାକୁଡ଼, ସନାତନ ପାତ୍ରଙ୍କ ସମେତ ବିଭିନ୍ନ ଓ୍ବାର୍ଡର ସଭ୍ୟ ଉପସ୍ଥିତ ରହି ମହିଳାମାନଙ୍କ ସହିତ ମଦ ବିରୋଧୀ ଆନ୍ଦୋଳନର ବ୍ଲୁ ପ୍ରିଣ୍ଟ୍ ପ୍ରସ୍ତୁତ କରିଛନ୍ତି। ପ୍ରାଥମିକ ପର୍ଯ୍ୟାୟରେ ମହିଳାମାନେ ବିଭିନ୍ନ ଅଞ୍ଚଳ ପରିକ୍ରମା କରି ମଦ କୁ ନା ସଚେତନତା ବାର୍ତ୍ତା ଦେବା ପରେ ଆୟୋଜିତ ବୈଠକରେ ଆଲୋଚନା କରିଥିଲେ। ପଞ୍ଚାୟତର ପ୍ରତି ଗାଁରେ ଗୋଟିଏ ଗୋଟିଏ କମିଟି କରି ନିଜର କାର୍ଯ୍ୟପନ୍ଥା ଧାର୍ଯ୍ୟ କରିଥିଲେ।
ଦେଶୀ ମଦ ପିଇ ଗୋଟିଏ ବର୍ଷ ମଧ୍ୟରେ ବୁଢ଼ୀକୁଦ ପଞ୍ଚାୟତରୁ ୧୦ରୁ ଊର୍ଦ୍ଧ୍ୱ କିଡ୍ନୀ ଜନିତ ରୋଗରେ ଆକ୍ରାନ୍ତ ହୋଇ ମୃତ୍ୟୁମୁଖରେ ପଡ଼ିବା ଘଟଣା ଆଲୋଚନା ପରିସରକୁ ଆସିଥିଲା। ମଦ ପାଇଁ ପାରିବାରିକ ହିଂସା ବୃଦ୍ଧି, ଲୋକମାନଙ୍କର ଆର୍ଥିକ ମାନଦଣ୍ଡ ହ୍ରାସ, କମ୍ ବୟସର ପିଲାମାନେ ଅବାଟକୁ ଯିବା ଭଳି ଘଟଣାକୁ ନେଇ ମହିଳାମାନେ ମଦ ବିରୋଧୀ ଆନ୍ଦୋଳନକୁ ଜୋରଦାର କରିବାକୁ ନିଷ୍ପତ୍ତି ନେଇଥିଲେ। ଏହି ଅବସରରେ ବିଭିନ୍ନ ସ୍ଥାନରୁ ମଦ ରନ୍ଧା ସାମଗ୍ରୀ ଓ ଚୋରା ଦେଶୀ ମଦକୁ ମହିଳାମାନେ ନଷ୍ଟ କରିଥିଲେ। ଆନନ୍ଦପୁର ସଦରମହକୁମାଠାରୁ ଉକ୍ତ ପଞ୍ଚାୟତଟି ୩୦ କିମି ଦୂର ହୋଇଥିବାରୁ ଅବକାରୀ ବିଭାଗ ପକ୍ଷରୁ କୌଣସି ପଦକ୍ଷେପ ଗ୍ରହଣ କରୁ ନ ଥିବା ଉପସ୍ଥିତ ମହିଳାମାନେ ପ୍ରକାଶ କରିଥିଲେ। ଆଗାମୀ ଦିନରେ ପଞ୍ଚାୟତରୁ ମଦ ମୂଳପୋଛ ପାଇଁ ଅବକାରୀ ବିଭାଗ କର୍ତ୍ତୃପକ୍ଷଙ୍କ ନିକଟରେ ହାଜର ହେବେ ବୋଲି ମହିଳାମାନେ ପ୍ରକାଶ କରିଛନ୍ତି।