ଜଞ୍ଜାଳପୂର୍ଣ୍ଣ ଜୀବନରେ ଶାନ୍ତିରେ ନିଃଶ୍ୱାସ ମାରିବା ଏବେ କଷ୍ଟକର। ପିଲାଠୁ ନେଇ ବୟସ୍କ ସଭିଏଁ ନିଜ ନିଜ କ୍ଷେତ୍ରରେ ଚିନ୍ତିତ। ଏମିତିରେ ଅବସାଦ ଶରୀରକୁ ସମ୍ପୂର୍ଣ୍ଣ ଅସୁସ୍ଥ କରିପକାଇଛି। ଅବସାଦରୁ ମୁକ୍ତି ପାଇଁ ବୈଜ୍ଞାନିକମାନେ ଏକ ନିଆରା ଉପାୟ ସନ୍ଧାନ କରିଛନ୍ତି। ଆଇଆଇଟି କାନପୁର୍ର ବୈଜ୍ଞାନିକମାନେ ଦୀର୍ଘବର୍ଷ ଗବେଷଣା ପରେ ଜାଣିବାକୁ
ପାଇଛନ୍ତି, ଯଦି ଶାସ୍ତ୍ରୀୟ ସଂଗୀତର ରାଗ ଭୀମ ପଲାସୀ ଏବଂ ରାଗ ଦରବାରୀକୁ କିଛି ସମୟ ପାଇଁ ଶୁଣାଯାଏ, ତେବେ ମାନସିକ ଅବସାଦରେ ହ୍ରାସ ଅଣାଯାଇପାରିବ। ଗବେଷଣା ଅନୁସାରେ, ମଣିଷ ମସ୍ତିଷ୍କରେ ନ୍ୟୁରନ୍ସ ଥାଏ। ଏହା ଏକ ପ୍ରକାରର କୋଷିକା ଯାହା, ଇଲେକ୍ଟ୍ରୋ ମ୍ୟାଗନେଟିକ୍ ତରଙ୍ଗ ଜରିଆରେ ସନ୍ଦେଶର ଆଦାନ ପ୍ରଦାନ କରିଥାଏ। କିନ୍ତୁ ମାନସିକ ଅବସାଦ ସ୍ଥିତିରେ ଏହି କୋଷିକା ଉପରେ ଖରାପ ପ୍ରଭାବ ପଡ଼ିଥାଏ। ଫଳରେ ମସ୍ତିଷ୍କରେ ଥକ୍କାପଣ ଏବଂ ଅବସାଦ ସୃଷ୍ଟି ହୋଇ ତାକୁ ଦୁର୍ବଳ କରିପକାଏ। ଏଭଳି ପରିସ୍ଥିତିରେ ଯଦି ରାଗ ଭୀମପଲାସୀ ଏବଂ ରାଗ ଦରବାରୀ ଶୁଣାଯାଏ, ତେବେ ମସ୍ତିଷ୍କର କୋଷିକା ସକ୍ରିୟ ହୋଇ ଉଠିଥାଏ। ଗବେଷଣା ପାଇଁ ବୈଜ୍ଞାନିକମାନେ ନିଜ ଇନ୍ଷ୍ଟିଚ୍ୟୁଟ୍ର କିଛି ଛାତ୍ରଙ୍କୁ ଶାସ୍ତ୍ରୀୟ ସଂଗୀତ ଶୁଣିବାକୁ କହିଥିଲେ। କିଛି ଦିନ ପରେ ଦେଖିବାକୁ ମିଳିଲା, ଏହି ସଂଗୀତ ସେମାନଙ୍କ ଭିତରେ ଥିବା ଚିଡ଼ିଚିଡ଼ା ସ୍ବଭାବ, ଅନ୍ୟମନସ୍କତା ଏବଂ ମାନସିକ ଚିନ୍ତାକୁ ହ୍ରାସ କରିଛି। ଗବେଷଣାରୁ ଜଣାପଡ଼ିଛି, ଏହି ରାଗକୁ ଶୁଣିବାର ୧୦୦ ସେକେଣ୍ଡ୍ ମଧ୍ୟରେ ମସ୍ତିଷ୍କର ନ୍ୟୁରନ୍ସ୍ ସକ୍ରିୟ ହୋଇଯାଏ। ତେବେ ଭୀମପଲାସୀ ରାଗକୁ ଦିନରେ ଏବଂ ରାଗ ଦରବାରୀକୁ ରାତିରେ ଶୁଣିବା ଦ୍ୱାରା ବିଶେଷ ପରିଣାମ ମିଳିଥାଏ।