ବନ୍ତ,୩୦।୯(ଡି.ଏନ୍.ଏ.): ରଙ୍ଗତୂଳୀ ଧରିବା ମାତ୍ରେ ସେ ଭୁଲି ଯାଆନ୍ତି ସବୁକିଛି। ଆଙ୍କି ପକାନ୍ତି ବିଭିନ୍ନ ଛବି। ତାଙ୍କ ରଙ୍ଗତୂଳୀ ସ୍ପର୍ଶରେ ଚିତ୍ରଗୁଡ଼ିକ ଜୀବନ୍ତ ହୋଇଉଠେ। ଚିତ୍ର ଆଙ୍କିବାରେ ମାହିର୍ ଏହି ପ୍ରତିଭା ହେଲେ ଭଦ୍ରକ ଜିଲା ବନ୍ତ ବ୍ଲକ ଅଧୀନ ଚକ୍ରାପାଢ଼ୀ ଗ୍ରାମର ନମିତା ବେହେରା(୨୧)। ଏଭଳି କଳାକୃତି ପାଇଁ ସେ ରାଜ୍ୟ ଓ ରାଜ୍ୟ ବାହାରୁ ବିଭିନ୍ନ ଅନୁଷ୍ଠାନ ପକ୍ଷରୁ ସମ୍ବର୍ଦ୍ଧିତ ହୋଇଛନ୍ତି। ଚିତ୍ରକଳା ଦେଇଥାଏ ଭିନ୍ନ ପରିଚୟ। ଯେକୌଣସି ଜିନିଷକୁ ରଙ୍ଗତୂଳୀରେ ଜୀବନ୍ତ କରିପାରିଲେ ଜଣେ କାରିଗରର ପରିଶ୍ରମ ସାର୍ଥକ ହୋଇଥାଏ ବୋଲି ସେ କହିଛନ୍ତି।
ରବି ନାରାୟଣ ବେହେରା ଓ ରେବତୀ ବେହେରାଙ୍କ ଏକମାତ୍ର ଝିଅ ନମିତା। ବାପା ଜଣେ କୃଷକ ଓ ମା’ ଗୃହିଣୀ। ନମିତା କହନ୍ତି, ପିଲାଟି ବେଳୁ ତାଙ୍କର ଚିତ୍ରକଳା ପ୍ରତି ଆଗ୍ରହ ଥିଲା। ଚକ୍ରାପାଢୀ ନୋଡାଲ ଉ.ପ୍ରା. ବିଦ୍ୟାଳୟରେ ୩ୟ ଶ୍ରେଣୀରେ ପଢୁଥିବା ବେଳେ ସେ ଚିତ୍ର ଆଙ୍କିବା ଆରମ୍ଭ କରିଥିଲେ। ପ୍ରାଥମିକ ଓ ଉଚ୍ଚ ବିଦ୍ୟାଳୟରେ ପଢ଼ିବା ସମୟରେ ଚିତ୍ରାଙ୍କନ ପ୍ରତିଯୋଗିତାରେ ଭାଗ ନେଇ ସେ ବହୁବାର ପ୍ରଥମ ସ୍ଥାନ ଅଧିକାର କରିଛନ୍ତି। ଏଥିସହ ସେ ବ୍ଲକ ଓ ଜିଲାସ୍ତରୀୟ ପ୍ରତିଯୋଗିତାରେ ଅଂଶ ଗ୍ରହଣ କରି ବହୁ ପ୍ରମାଣପତ୍ର ପାଇଛନ୍ତି। ୨୦୧୬ରେ ତେଲନଟିସ୍ଥିତ ବାଲିପୋଖରୀ ହାଇସ୍କୁଲରେ ମାଟ୍ରିକ୍ ପାସ୍ କରିଥିଲେ। ୨୦୧୮ରେ ଆଗରପଡ଼ା ମହାବିଦ୍ୟାଳୟରୁ ଯୁକ୍ତ ୨ କଳା ପାସ୍ କରିବା ପରେ ବାପାଙ୍କ ଉଦ୍ୟମରେ ସେ ଭଦ୍ରକସ୍ଥିତ ଚାରୁ କାରୁ କଳା ମହାବିଦ୍ୟାଳୟରେ ନାମ ଲେଖାଇଥିଲେ। ଏବେ ସେହି ମହାବିଦ୍ୟାଳୟରେ ସେ ଶେଷବର୍ଷର ଛାତ୍ରୀ। ସେ ମଣିଷ ଓ ଜୀବଜନ୍ତୁଙ୍କୁ ଦେଖି ପେନ୍ସିଲରେ ଅବିକଳ ଚିତ୍ର ଆଙ୍କି ପାରୁଛନ୍ତି। ଅଦ୍ୟାବଧି ସେ ବିଭିନ୍ନ ବ୍ୟକ୍ତିଙ୍କ ଚିତ୍ର ଆଙ୍କି ସାରିଛନ୍ତି। ପୂର୍ବତନ ସଂସ୍କୃତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ, ବିଜେଡି ରାଜ୍ୟ ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ଭଦ୍ରକ ଏମ୍ପି ମଞ୍ଜୁଲତା ମଣ୍ଡଳ, ବିଧାୟକ ସଞ୍ଜୀବ ମଲ୍ଲିକ, ଭଣ୍ଡାରିପୋଖରୀ ବିଧାୟକ ପ୍ରଫୁଲ୍ଲ ସାମଲ, ଭଦ୍ରକର ପୂର୍ବତନ ଜିଲାପାଳ ତ୍ରିଲୋଚନ ମାଝି, ଜିଲା ଆରକ୍ଷୀ ଅଧୀକ୍ଷକ ଚରଣ ସିଂ ମୀନା, ରାଜ୍ୟ ବିଜୁ ଜନତା ଦଳର ସମ୍ପାଦକ ଇଂ.ପ୍ରୟାସକାନ୍ତି ସାମଲ, ବନ୍ତ ତହସିଲଦାର ଅଙ୍କିତା ବାରିକଙ୍କ ଅବିକଳ ଚିତ୍ର ଆଙ୍କି ପ୍ରଶଂସିତ ହୋଇଛନ୍ତି। ନିଜ ଖର୍ଚ୍ଚରେ ସେ ଦେଢ଼ ଶହରୁ ଊର୍ଦ୍ଧ୍ୱ ପ୍ରତିଛବି ଆଙ୍କି ବିଭିନ୍ନ ବ୍ୟକ୍ତିବିଶେଷଙ୍କୁ ଦେଇଛନ୍ତି। ସେ ରାଷ୍ଟ୍ରପତି, ପ୍ରଧାନମନ୍ତ୍ରୀ, ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ପଟ୍ଟଚିତ୍ର ଆଙ୍କି ସାରିଥିଲେ ମଧ୍ୟ ସେମାନଙ୍କ ପାଖକୁ ଯିବା ପାଇଁ ମାଧ୍ୟମ ପାଉନାହାନ୍ତି। ଚିତ୍ର ଆଙ୍କିବା ବ୍ୟତୀତ ଗୀତ ଗାଇବା, ହାରମୋନିୟମ ବଜାଇବା ଆଦି କଳା ତାଙ୍କ ପାଖରେ ରହିଛି। ମା’ ବାପାଙ୍କ ପ୍ରେରଣା ଓ ପ୍ରୋତ୍ସାହନରେ ସେ ଚିତ୍ର ଆଙ୍କିବା ଜାରି ରଖିଛନ୍ତି। ଭବିଷ୍ୟତରେ ଜଣେ ଭଲ ଚିତ୍ରଶିଳ୍ପୀ ହେବାକୁ ଲକ୍ଷ୍ୟ ରଖିଥିବା ନମିତା କହିଛନ୍ତି।