ନୂଆଦିଲ୍ଲୀ, ୨୧ା୩ : ଲିଭ୍-ଇନ୍ ରିଲେଶନରେ ରହୁଥିବା ଯୋଡ଼ିମାନଙ୍କର ପଞ୍ଜୀକରଣ ଲାଗି ଦାଏର ପିଟିଶନକୁ ସୁପ୍ରିମକୋର୍ଟ ସୋମବାର ଖାରଜ କରିଦେଇଛନ୍ତି। ଏହା ଚଞ୍ଚଳମନା ଚିନ୍ତାଧାରା ବୋଲି ସିଜେଆଇ ଡି.ଓ୍ବାଇ. ଚନ୍ଦ୍ରଚୂଡ଼ କହିଛନ୍ତି। ଲିଭ୍-ଇନ୍ ଯୋଡ଼ିମାନଙ୍କ ପାଇଁ ଗାଇଡ୍ଲାଇନ ଜାରି ସହ ସେମାନଙ୍କ ନିମନ୍ତେ ପଞ୍ଜୀକରଣ ବାଧ୍ୟତାମୂଳକ କରିବା ଲାଗି ନିର୍ଦ୍ଦେଶ ଦେବାକୁ ସର୍ବୋଚ୍ଚ ଅଦାଲତରେ ଜଣେ ଆଇନଜୀବୀ ଜନସ୍ବାର୍ଥ ମାମଲା ଦାଏର କରିଥିଲେ। ଏକାଠି ରହୁଥିବା ଏଭଳି ଯୋଡ଼ିଙ୍କୁ ସାମାଜିକ ସୁରକ୍ଷା ଯୋଗାଇଦେବାକୁ ପିଟିଶନରେ ନିବେଦନ କରାଯାଇଥିଲା। ସିଜେଆଇ ଏଥିରେ ବିରକ୍ତି ପ୍ରକାଶ କରି କହିଛନ୍ତି, ଯେକେହି ବ୍ୟକ୍ତି ଯେକୌଣସି ପ୍ରସଙ୍ଗ ନେଇ ଶୀର୍ଷ ଅଦାଲତକୁ ଚାଲିଆସୁଛନ୍ତି। କ’ଣ କେନ୍ଦ୍ର ସରକାରରେ ପଞ୍ଜୀକରଣ ହେବ? ଲିଭ୍-ଇନ୍ରେ ରହୁଥିବା ଲୋକଙ୍କ ପାଇଁ କେନ୍ଦ୍ର ସରକାର କ’ଣ କରିବେ ବୋଲି ସିଜେଆଇ ପ୍ରଶ୍ନ କରିଥିଲେ। ଏହା ଚଞ୍ଚଳ ମାନସିକତା। ଅଦାଲତଙ୍କ ସମୟ ବରବାଦ କରିଥିବାରୁ ଅର୍ଥ ଭରିବାକୁ ପଡ଼ିବ ବୋଲି କହି ସିଜେଆଇ ପିଟିଶନକୁ ଖାରଜ କରିଦେଇଥିଲେ।