କୋରାପୁଟ/ଲମତାପୁଟ/ସୁନାବେଡ଼ା/ ସେମିଳିଗୁଡ଼ା/ଜୟପୁର/ପଟ୍ଟାଙ୍ଗି/ ନନ୍ଦପୁର, ୨୦।୪: (ସ୍ବ.ପ୍ର./ଡି.ଏନ୍.ଏ./ନି.ପ୍ର.) ସମ୍ବଲପୁରରେ ଘଟିଥିବା ହିଂସା ପ୍ରତିବାଦରେ ବୁଧବାର ବିଶ୍ୱହିନ୍ଦୁ ପରିଷଦ ପକ୍ଷରୁ ଦିଆଯାଇଥିବା ୧୨ ଘଣ୍ଟିଆ ବନ୍ଦ ପାଳନ କୋରାପୁଟରେ ଶାନ୍ତିପୂର୍ଣ୍ଣଭାବେ ଶେଷ ହୋଇଛି। ଏହି ସମୟରେ ଗାଡି ଚଳାଚଳ ଠପ ସାଙ୍ଗକୁ ଦୋକାନବଜାର ବନ୍ଦ ରହିଥିଲା । ବନ୍ଦ ଯୋଗୁ ବହୁ ସରକାରୀ ଓ ବେସରକାରୀ କାର୍ଯ୍ୟାଳୟ ପ୍ରଭାବିତ ହୋଇଥିଲା। ସେହିପରି ୨୬ ନମ୍ବର ଜାତୀୟ ରାଜପଥରେ ଟ୍ରକ୍ ବସ୍ ଚଳାଚଳ ବନ୍ଦ ରହିଥିଲା। ଭାଜପା ସମେତ ବହୁ ସଙ୍ଗଠନ ଏହି ବନ୍ଦକୁ ସମର୍ଥନ କରିଥିଲେ। ଭାଜପା ନେତା ପୂର୍ଣ୍ଣିମା ନାୟକ, ଭାଗୀରଥି ପାଟନିଆ, ଦେବୀ ପ୍ରସାଦ କରଙ୍କ ସମେତ ବହୁ ନେତା ଓ କର୍ମୀ ବନଦ ପାଳନରେ ସାମିଲ ହୋଇଥିଲେ। ଥିଲୋ
ବ୍ଲକରେ ମଧ୍ୟ ବୁଧବାର ବନ୍ଦ ଶାନ୍ତିପୂର୍ଣ୍ଣ ହୋଇଛି। ଲମତାପୁଟରେ ଦୋକାନ ବଜାର ସହ ଗାଡ଼ିମୋଟର ଚଳାଚଳ ବନ୍ଦ ଥିଲା। ଗାଡ଼ି ବନ୍ଦ ଯୋଗୁ ଲୋକେ ଯାତାୟାତରେ ଅସୁବିଧାର ସମ୍ମୁଖୀନ ହୋଇଥିଲେ।
ଏହି ପରିପ୍ରେକ୍ଷୀରେ ସୁନାବେଡ଼ା ଓ ସେମିଳିଗୁଡ଼ାରେ ବିଭିନ୍ନ ହିନ୍ଦୁ ସଙ୍ଗଠନ ଜରୁରୀ ସେବାକୁ ବାଦ୍ ଦେଇ ରାସ୍ତାରେ ଗାଡ଼ିମୋଟର ଚଳାଚଳ ବନ୍ଦ କରିଥିଲେ। ଫଳରେ ଜାତୀୟ ରାଜପଥର ଉଭୟ ପାର୍ଶ୍ୱରେ ଶତାଧିକ ଗାଡ଼ି ମୋଟର ଅଟକି ରହିଥିବା ଦେଖିବାକୁ ମିଳିଥିଲା। ସହରରେ ରହିଥିବା ସମସ୍ତ ଦୋକାନ ବଜାର ମଧ୍ୟ ବନ୍ଦ ରହିଥିଲା। ଏହି ବନ୍ଦରେ ବିଶ୍ୱ ହିନ୍ଦୁ ପରିଷଦ, ଆର୍ଏସ୍ଏସ୍, ବଜରଙ୍ଗ ଦଳ, ବଣିକ ସଂଘ କର୍ମକର୍ତ୍ତା ଓ ଭାଜପା କର୍ମକର୍ତ୍ତାମାନେ ସାମିଲ ହୋଇଥିଲେ ।
ସମ୍ବଲପୁର ହିଂସାକାଣ୍ଡ ପ୍ରତିବାଦରେ ବୁଧବାର ବିଶ୍ୱ ହିନ୍ଦୁ ପରିଷଦ ପକ୍ଷରୁ ୧୨ ଘଣ୍ଟିଆ ବନ୍ଦ ପାଳନ କରାଯାଇଥିଲା। ଏହାକୁ ଭାଜପା, ବଜରଙ୍ଗ ଦଳ ସହ ବିଭିନ୍ନ ହିନ୍ଦୁ ସଙ୍ଗଠନ ସମର୍ଥନ ଦେଇଥିଲେ। ସମ୍ବଲପୁର ଘଟଣାରେ ରାଜ୍ୟ ସରକାରଙ୍କ ଉଦାସୀନତାକୁ ବିରୋଧକରି ବିଶ୍ୱ ହିନ୍ଦୁ ପରିଷଦ ସମେତ ସମସ୍ତ ହିନ୍ଦୁ ସମାଜ ଏକାଠି ହୋଇ ସକାଳ ୬ଟାଠାରୁ ସନ୍ଧ୍ୟାା ୬ ଟା ଯାଏ ବନ୍ଦ ପାଳନ କରିଥିଲେ। ମୁଖ୍ୟ ଟ୍ରାଫିକ ଛକଠାରେ ରାସ୍ତା ଅବରୋଧ କରାଯାଇଥିଲା। ଫଳରେ ଉଭୟ ପଟ ରାସ୍ତାରେ ବହୁ ସଂଖ୍ୟାରେ ଗାଡ଼ି ମୋଟର ଅଟକି ରହିଥିଲା। ଏସ୍ଡିପିଓ ହରିଶ ବିଶିଙ୍କ ନେତୃତ୍ୱରେ ପୋଲିସ ଫୋର୍ସ ମୁତୟନ ହୋଇଥିଲା। ବନ୍ଦ ପାଳନରେ ବାବୁ ଭାଇ ବଜରଙ୍ଗୀ, ବରୁଣ ଜୈନ, ବିନୋଦ ଚତୁର୍ବେଦୀ, ଗୌତମ ସାମନ୍ତରାୟ, ଗୁଲି ସାହୁ, ଅଭି ନାୟକଙ୍କ ସମେତ ଅନ୍ୟମାନେ ସାମିଲ ହୋଇଥିଲେ।
ପଟ୍ଟାଙ୍ଗି ବ୍ଲକ ବସ୍ଷ୍ଟାଣ୍ଡ ଉପରେ ସ୍ଥାନୀୟ ବଜରଙ୍ଗୀ ଦଳ, ବିଶ୍ୱ ହିନ୍ଦୁ ପରିଷଦର ସଦସ୍ୟମାନେ ସକାଳ ୬ଟାରୁ ଜାତୀୟ ରାଜପଥରେ ପତାକା ଲଗାଇ ରାସ୍ତା ଉପରେ ବସି ପ୍ରତିବାଦ ଜଣାଇଥିଲେ। । ଏହି ସମୟରେ ଉଭୟ ଆନ୍ଧ୍ର ଓ ଛତିଶଗଡ଼ ଅଭିମୁଖେ ଯାତାୟାତ କରୁଥିବା ସମସ୍ତ ଟ୍ରକ୍ ଏବଂ ବସ୍ ଅଟକି ରହିଥିଲା । ଫଳରେ ଯାତ୍ରୀମାନେ ସମସ୍ୟାର ସମ୍ମୁଖୀନ ହୋଇଥିଲେ। ବନ୍ଦ ପାଳନ ବ୍ଲକର ଗାଙ୍ଗମାଁ ମନ୍ଦିର ନିକଟରେ ମଧ୍ୟ କରାଯାଇଥିଲା। ଅପରାହ୍ନ ୩ଟାରେ ଜାତୀୟ ରାଜପଥ ଅବରୋଧକୁ ପ୍ରତ୍ୟାହାର କରାଯାଇଥିଲା। ଉକ୍ତ କାର୍ଯ୍ୟକ୍ରମରେ ପଟ୍ଟାଙ୍ଗି ମଣ୍ଡଳର କୃଷ୍ଣଚନ୍ଦ୍ର ଜାନି, ନରସିଂହ ବାଙ୍କା, ପୂର୍ଣ୍ଣଚନ୍ଦ୍ର ବାଙ୍କା, ରଞ୍ଜିତ ପାଣିଗ୍ରାହୀ, ତାଉଡୁ ଦୋରା, ସନ୍ତୋଷ ବାଡତିଆ, ରାଜେନ୍ଦ୍ର ପଟ୍ଟନାୟକ ଓ ଟି. ଗୋପାଳ ରାଓ ପ୍ରମୁଖ ସହଯୋଗ କରିଥିଲେ।
ନନ୍ଦପୁର ଅଞ୍ଚଳରେ ମଧ୍ୟ ବନ୍ଦ ସଫଳ ହୋଇଛି। ବୁଧବାର ସାପ୍ତାହିକ ହାଟ ସତ୍ତ୍ବେ ନନ୍ଦପୁର ବ୍ଲକ ସଦର ମହକୁମା ସମେତ ପାଡୁଆ ଚାଟୁଆ ଅଞ୍ଚଳରେ ଥିବା ସମସ୍ତ ଦୋକାନ ବଜାର ବନ୍ଦ ରହିଥିଲା। ବ୍ଲକ ଭାଜପା କର୍ମକର୍ତ୍ତା ମଣ୍ଡଳୀ ସଭାପତି ଜୟରାମ ଭୋଇଙ୍କ ନେତୃତ୍ୱରେ ରାଷ୍ଟ୍ରୀୟ ସ୍ବୟଂ ସେବକ ସଂଘର ଏନ୍. ବାବୁଲା ଦାସ, ଶଙ୍କର ପୂଜାରୀ, ବି.କେଶବ ଚୌଧୁରୀ ସାମିଲ ହୋଇଥିଲେ।