ହାଇଦ୍ରାବାଦ: ଭାରତରେ ପ୍ରଥମ ଥର ପାଇଁ ଜଣେ ମହିଳାଙ୍କଠାରୁ ୧୨ କିଲୋଗ୍ରାମ ଓଜନର ଯକୃତକୁ ଡାକ୍ତରମାନେ ସଫଳତାର ସହ ବାହାର କରିଛନ୍ତି। ଏଥିସହିତ ଉକ୍ତ ୫୦ ବର୍ଷୀୟ ମହିଳାଙ୍କଠାରେ ଏକସଙ୍ଗେ ଯକୃତ ଓ କିଡ୍ନୀ ପ୍ରତିରୋପଣ କରାଯାଇଛି। ହାଇଦ୍ରାବାଦର କିମ୍ସ ହସ୍ପିଟାଲରେ ଏହି ପ୍ରତିରୋପଣ ପାଇଁ ୩ ଜଣ ଲିଭର ଟ୍ରାନ୍ସପ୍ଲାଣ୍ଟ ସର୍ଜନ ଏବଂ କିଡ୍ନୀ ସର୍ଜନ ନିୟୋଜିତ ହୋଇଥିଲେ।
ଡାକ୍ତରଙ୍କ କହିବା ଅନୁଯାୟୀ ପଶ୍ଚିମବଙ୍ଗ ସିଲିଗୁଡ଼ିର ଉଷା ଅଗ୍ରଓ୍ବାଲଙ୍କଠାରେ ଏହି ଜଟିଳ ଅସ୍ତ୍ରୋପଚାର କରାଯାଇ ତାଙ୍କ ଜୀବନ ରକ୍ଷା କରାଯାଇପାରିଛି। ତାଙ୍କ ଯକୃତ ଏତେ ବଢ଼ିଯାଇଥିଲା ଯେ, ଏହା ସମ୍ପୂର୍ଣ୍ଣ ପେଟକୁ ସମ୍ପୂର୍ଣ୍ଣ ଆବୋରି ରଖିଥିଲା ଏବଂ ଅନ୍ତନଳୀଗୁଡ଼ିକୁ ଠେଲିଦେଇଥିଲା। ସ୍ବାଭାବିକ ସୁସ୍ଥ ସ୍ଥିତିରେ ଜଣେ ବ୍ୟକ୍ତିଙ୍କ ଯକୃତର ଓଜନ ସର୍ବାଧିକ ୧.୫ କିଲୋଗ୍ରାମ। ଏହା ପେଟର ଡାହାଣ ପାର୍ଶ୍ୱ ଉପରିଭାଗରେ ରହିଥାଏ। ଉଷାଙ୍କ ଯକୃତ ଓଜନ ୧୨ କିଲୋଗ୍ରାମ ହୋଇଯିବା ପରେ ତାଙ୍କ ପାଇଁ ଚାଲିବା କଷ୍ଟକର ହୋଇପଡ଼ିଥିଲା। ୨୦୧୯ରୁ ସେ ଏଭଳି ସମସ୍ୟାର ସମ୍ମୁଖୀନ ହେବା ପରେ ଅସ୍ତ୍ରୋପଚାର ପାଇଁ ଡାକ୍ତର ପରାମର୍ଶ ଦେଇଥିଲେ। ଦୀର୍ଘ ୧୪ ଘଣ୍ଟାର ଅପରେଶନରେ ବିଶାଳ ଯକୃତକୁ ଅଲଗା କରାଯିବା ସହ ଅନ୍ୟଏକ ଯକୃତ ଏବଂ କିଡ୍ନୀ ପ୍ରତିରୋପଣ କରାଯାଇଥିଲା। ଲିଭର ସର୍ଜନ ଡ. ରବିଚନ୍ଦ୍ର ସିଦ୍ଦାଚାରୀ, କନ୍ସଲ୍ଟାଣ୍ଟ ତଥା ଲିଭର ଟ୍ରାନ୍ସପ୍ଲାଣ୍ଟ ବିଭାଗ ମୁଖ୍ୟ ଡ. ସଚିନ ଡାଗା, ବରିଷ୍ଠ କନ୍ସଲ୍ଟାଣ୍ଟ ଡ. କେ.ଏନ୍. ପରମେଶା ପ୍ରମୁଖ ଅସ୍ତ୍ରୋପଚାରରେ ସାମିଲ ହୋଇଥିଲେ। ଏବେ ମହିଳା ଜଣକ ସ୍ବାଭାବିକ କାର୍ଯ୍ୟ କରିବାକୁ ସକ୍ଷମ ହୋଇଛନ୍ତି।
