କେନ୍ଦୁଝର,୯ା୪(ସ୍ବ.ପ୍ର.): କେନ୍ଦୁଝର ଜିଲା ବାଂଶପାଳ ବ୍ଲକ ଶୁଆକାଟିସ୍ଥିତ ଗନ୍ଧମାର୍ଦ୍ଦନ ଖଣିରେ ଲୁହାପଥର ଲୋଡିଂକୁ ନେଇ ବିବାଦ ଦେଖାଦେଇଛି। ଖଣିସଂସ୍ଥା ପକ୍ଷରୁ ଆଗ ଭଳି ଲୋଡିଂ ସ୍ଲିପ୍ (ବାରକୋଡ) କେନ୍ଦୁଝର ଜିଲା ଟ୍ରକମାଲିକ ସଂଘକୁ ନ ଦେବାରୁ ମାଲିକମାନେ ଲୋଡିଂ ପାଇପାରି ନ ଥିଲେ। ଫଳରେ ବିବାଦ ସୃଷ୍ଟି ହୋଇଥିଲା। ଲୋଡିଂ କାର୍ଯ୍ୟ ବାଧାପ୍ରାପ୍ତ ହୋଇଥିବା ବେଳେ ଗଣ୍ଡଗୋଳ ଆଶଙ୍କା କରି ଶନିବାର ଖଣି ଅଞ୍ଚଳରେ ପୋଲିସ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିଲା। ଅନ୍ୟପକ୍ଷରେ ଖଣିସଂସ୍ଥା ଲୋଡିଂ ସ୍ଲିପ୍ ସଂଘକୁ ନ ଦେଇ ପରିବହନ ଠିକା ସଂସ୍ଥା ବା କ୍ରେତାଙ୍କୁ ଦେବାକୁ ନିଷ୍ପତ୍ତି ନେଇ ପ୍ରଦାନ କରିଥିବାରୁ ବିବାଦ ବଢ଼ିଥିଲା।
ଏହା ଦ୍ୱାରା ପରିବହନ ଠିକାସଂସ୍ଥା ତଥା କ୍ରେତାମାନେ ବାହାର ଟ୍ରକ/ ଟ୍ରେଲରମାନଙ୍କୁ ଲୋଡିଂ ସ୍ଲିପ୍ ଦେଇ ପରିବହନ କରିବେ। ଫଳରେ ସ୍ଥାନୀୟ ଅଞ୍ଚଳର ଟ୍ରକମାଲିକ ଲୋଡିଂ ନ ପାଇ କ୍ଷତିଗ୍ରସ୍ତ ହେବା ଆଶଙ୍କା ରହିଥିବା ଦର୍ଶାଇ ଏହାକୁ ବିରୋଧ କରି ଆଜି ଶୁଆକାଟି ଖଣି ନିକଟରେ ପ୍ରତିବାଦ କରିଥିଲେ। ଅନ୍ୟପକ୍ଷରେ ସଂଘକୁ ଭାଙ୍ଗି ଦେବାକୁ ଏଭଳି ଉଦ୍ୟମ କରାଯାଉଛି ଏବଂ ବାହାର ଟ୍ରକକୁ ଭର୍ତ୍ତି କରିବାକୁ ଉଦ୍ୟମ ହେଉଛି ବୋଲି ଟ୍ରକ ମାଲିକ ସଂଘର ଦେବାଶିଷ ପଟ୍ଟନାୟକ କହିଛନ୍ତି। ଅନ୍ୟପକ୍ଷରେ କ୍ରେତା ନିଜ ଇଚ୍ଛାରେ ଲୁହାପଥର ପରିବହନ କରିବ। ଏଣୁ ଏଥିପାଇଁ ଖଣିସଂସ୍ଥା ତାଙ୍କୁ ଲୋଡିଂ ସ୍ଲିପ୍ ଦେବା ନିୟମ ରହିଛି। ଏଣୁ ସେମାନେ ଲୁହାପଥର ପରିବହନ ପାଇଁ ଟ୍ରକ୍ ସଂଘଙ୍କୁ ଚିଠି କରି ବା ଆବଶ ସଂଖ୍ୟକ ସ୍ଲିପ୍ଦେଇ ଟ୍ରକ ମାଗିବେ ଓ ଲୁହାପଥର ପରିବହନ କରିବେ ବୋଲି କେତେକ କହୁଛନ୍ତି। ତେବେ ଏନେଇ ଉଠିଥିବା ବିବାଦ ଯୋଗୁ ସ୍ଥାନୀୟ ଟ୍ରକମାଲିକମାନେ କ୍ଷତିଗ୍ରସ୍ତ ହେବା ନେଇ ଚିନ୍ତାରେ ରହିଛନ୍ତି। ତେବେ ଆସନ୍ତାକାଲି ଟ୍ରକମାଲିକ ସଂଘଙ୍କ ପ୍ରତିନିଧି ପରିବହନ ଠିକା ସଂସ୍ଥାଙ୍କ ଉପସ୍ଥିତ ଜିଲା ପ୍ରଶାସନ ଓ ପୋଲିସ ବିଭାଗକୁ ନେଇ ଏକ ଗୁରୁତ୍ୱପୂର୍ଣ୍ଣ ବୈଠକ ବସିବା ସମ୍ଭାବନା ରହିଛି। ଏନେଇ କେନ୍ଦୁଝର ଟ୍ରକ ମାଲିକ ସଂଘର ସଭାପତି ସୂର୍ଯ୍ୟ ନାରାୟଣ କର କହିଛନ୍ତି, ପରିବହନ ଠିକାଦାରଙ୍କ ଅଭିଯୋଗ କ୍ରମେ ଏଭଳି ବିବାଦ ଦେଖାଦେଇଛି। ଏନେଇ ପ୍ରଶାସନକୁ ସମାଧାନ କରିବାକୁ ନିବେଦନ କରାଯାଇଛି। ଆସନ୍ତାକାଲି ଏନେଇ ବୈଠକ ବସି ନିଷ୍ପତ୍ତି ହେବ।