ଶ୍ରୀନଗର,୨୬।୧୦ : ସୁରକ୍ଷା ବାହିନୀ ଉତ୍ତର କଶ୍ମୀରର କୁପୱାରା ଜିଲାର ଏଲଓସି ନିକଟରେ ବୁଧବାର ଏକ ଅନୁପ୍ରବେଶ ଉଦ୍ୟମକୁ ପଣ୍ଡ କରିଛନ୍ତି। ଜିଲାର ତଙ୍ଗଧାର ସେକ୍ଟରରେ ଭାରତୀୟ ସୀମାରେ ଅନୁପ୍ରବେଶ କରିବାକୁ ଚେଷ୍ଟା କରୁଥିବା ଜଣେ ବିଦେଶୀ ଆତଙ୍କବାଦୀଙ୍କୁ ସତର୍କ ସୂଚନା ଜାରି ପରେ ସୁରକ୍ଷା ବାହିନୀ ଗୁଳି ଚଳାଇଥିଲେ।
ଜଣେ ସେନା ଅଧିକାରୀ କହିଛନ୍ତି ଯେ ତଙ୍ଗଧାର ଅଞ୍ଚଳରେ ଅସ୍ତ୍ରଶସ୍ତ୍ର ତଥା ନିଶା କାରବାରର ସମ୍ଭାବ୍ୟ ଉଦ୍ୟମ ସମ୍ପର୍କରେ ସେମାନେ ଗୁପ୍ତଚର ସୂଚନା ପାଇଛନ୍ତି। ଏହାକୁ ଆଧାର କରି ଏକ ସେନା ୟୁନିଟ ଅନୁପ୍ରବେଶ ବିରୋଧୀ ଅପରେଶନ ଆରମ୍ଭ କରିଛି। ମଙ୍ଗଳବାର-ବୁଧବାର ମଧ୍ୟରାତ୍ରିରେ ସାଦପୋରା ଅଞ୍ଚଳରେ ସନ୍ଦେହଜନକ କାର୍ଯ୍ୟକଳାପ ପରିଲକ୍ଷିତ ହୋଇଥିଲା।
ଏଠାରେ ଅନୁପ୍ରବେଶକାରୀ ସୁରକ୍ଷା ବାହିନୀଙ୍କ ଉପରେ ଗୁଳି ଚଳାଇଥିଲେ। ଏହାର ଜବାବରେ ଅନୁପ୍ରବେଶକାରୀଙ୍କ ଉପରେ ସୁରକ୍ଷା ବାହିନୀଙ୍କ ପକ୍ଷରୁ ପାଲଟା ଗୁଳି କରାଯାଇଥିଲା। ଏଥିରେ ଜଣେ ଆତଙ୍କବାଦୀଙ୍କ ମୃତ୍ୟୁ ଘଟିଥିଲା। ନିହତ ଆତଙ୍କବାଦୀ ଲଶ୍କର-ଇ-ତୋଏବା ସହିତ ସମ୍ପୃକ୍ତ ଥିବା ସନ୍ଦେହ କରାଯାଉଛି। ଆତଙ୍କବାଦୀଙ୍କ ପାଖରୁ ଗୋଟିଏ ଏକେ ସିରିଜ ରାଇଫଲ ଏବଂ ପିସ୍ତଲ ଜବତ କରାଯାଇଛି। ତାଙ୍କଠାରୁ ପାକିସ୍ତାନୀ ମୁଦ୍ରା ମଧ୍ୟ ଜବତ କରାଯାଇଥିବା ଭାରତୀୟ ସେନା ପକ୍ଷରୁ ସୂଚନା ପ୍ରଦାନ କରାଯାଇଛି।
