କେନ୍ଦୁଝର,୧୯ା୧୨(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସଦର ବ୍ଲକ ପଳାଶପଙ୍ଗା ପଞ୍ଚାୟତ ମୁରୁସୁଆଁ ଅଙ୍ଗନଓ୍ବାଡ଼ି କେନ୍ଦ୍ରର ତାଲା ଗୁରୁବାର ଖୋଲାଯାଇଛି। ପ୍ରଶାସନ ତଥା ପୋଲିସର ତାଗିଦ ପରେ ତାଲା ପକାଇ ଥିବା ବ୍ୟକ୍ତି ଆଜି କେନ୍ଦ୍ରର ତାଲା ଖୋଲିଥିବା ଜଣାପଡ଼ିଛି। ଫଳରେ କେନ୍ଦ୍ରର ଅଚଳାବସ୍ଥା ସ୍ବାଭାବିକ ହୋଇଛି।
ସୂଚନାଯୋଗ୍ୟ, ବୁଧବାର ମୁରୁସୁଆଁ ଗ୍ରାମର ଭାଜପା ନେତାମାନେ ୩ୟ ସ୍ଥାନରେ ଥିବା ଜଣେ ମହିଳାଙ୍କୁ ହେଲପର ଭାବେ ନିଯୁକ୍ତି ଦେବାକୁ ନେଇ ହୋ-ହଲ୍ଲା କରି ଶିଶୁମାନଙ୍କୁ କେନ୍ଦ୍ରରୁ ଟାଣି ବାହାର କରି ଦେଇ କେନ୍ଦ୍ରରେ ତାଲା ପକାଇଥିଲେ। ଫଳରେ ମଧ୍ୟାହ୍ନଭୋଜନ କରିବାକୁ ଅପେକ୍ଷା କରିଥିବା ଶିଶୁଙ୍କୁ ଅଡୁଆ ପରିସ୍ଥିତି ସୃଷ୍ଟି ହୋଇଥିଲା। ନିରାଶରେ ଭୋକ ଉପାସରେ ଶିଶୁମାନେ ଘରକୁ ଫେରି ଯାଇଥିଲେ। ଏ ନେଇ ଅଙ୍ଗନଓ୍ବାଡ଼ି ଦିଦି ଓ ସହାୟିକା ପଳାଶପଙ୍ଗା ଫାଣ୍ଡିରେ ଏତଲା ଦେବା ସହ ସିଡିପିଓଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ତେବେ ପଳାଶପଙ୍ଗା ଫାଣ୍ଡି ଅଧିକାରୀ ସୂର୍ଯ୍ୟ ନାରାୟଣ ରାଉତରାୟଙ୍କ ଉଦ୍ୟମ କ୍ରମେ ଅଭିଯୁକ୍ତମାନେ ଗୁରୁବାର ସକାଳୁ ସକାଳୁ କେନ୍ଦ୍ରକୁ ଯାଇ ତାଲା ଖୋଲିଥିଲେ।
