ଇମ୍ପାଲ,୨।୭(ପି.ଟି.): କୋଭିଡ୍-୧୯ ମହାମାରୀ କାରଣରୁ ଜାରି କରାଯାଇଥିବା ଲକ୍ଡାଉନ୍ ୨୦୨୧ ବିଶ୍ୱକପ୍ କ୍ୱାଲିଫାଇଂ ସମ୍ଭାବନାକୁ ପ୍ରଭାବିତ କରିଛି ବୋଲି ଭାରତୀୟ ମହିଳା ଜୁନିୟର ଦଳ ଅଧିନାୟକିକା ସୁମନ ଦେବୀ ଥୋଉଡାମ୍ କହିଛନ୍ତି। ୨୦୨୦ ମହିଳ ଜୁନିୟର ଏସିଆକପ୍ ମାଧ୍ୟମରେ ଏଫ୍ଆଇଏଚ୍ ଜୁନିୟର ମହିଳା ବିଶ୍ୱକପ୍ ଟିକେଟ ହାସଲ କରିବା ଲକ୍ଷ୍ୟରେ ଭାରତୀୟ ଦଳ ରହିଥିଲା। ଏସିଆକପ୍ ଜାପାନର କାକାମିଗାହାରାରେ ଏପ୍ରିଲ ୬ ତାରିଖରୁ ଆରମ୍ଭ ହେବାର କାର୍ଯ୍ୟକ୍ରମ ଥିଲା। ତେବେ ମହାମାରୀ କାରଣରୁ ଏହାକୁ ବାତିଲ କରାଯାଇଥିଲା।
ମାର୍ଚ୍ଚ ପ୍ରଥମ ସପ୍ତାହରୁ ଆମେ ଜାତୀୟ କୋଚିଂ କ୍ୟାମ୍ପରେ ଜୁନିୟର ଏସିଆ କପ୍ରେ ଭଲ ପ୍ରଦର୍ଶନ କରିବା ପାଇଁ ଅଭ୍ୟାସ କରିଥିଲୁ। ଏସିଆ କପ୍ରେ ଭଲ ପ୍ରଦର୍ଶନ କରି ଦକ୍ଷିଣ ଆଫ୍ରିକାରେ ୨୦୨୧ ବିଶ୍ୱକପ୍ ପାଇଁ ସିଧାସଳଖ ଯୋଗ୍ୟତା ହାସଲ କରିବା ଲକ୍ଷ୍ୟରେ ରହିଥିଲୁ। ତେବେ ଏହି ମାହାମାରୀ ଯୋଗୁ ଆମ ପ୍ରସ୍ତୁତି ବନ୍ଦ ରହିଥିଲା ବୋଲି ସୁମନ କହିଛନ୍ତି। ଗତବର୍ଷ ଆମେ ଭଲ ପ୍ରଦର୍ଶନ କରିଥିଲୁ। ତେଣୁ ଏସିଆକପ୍ରେ ଭଲ ପ୍ରଦର୍ଶନ ନେଇ ଆମେ ନିଶ୍ଚିତ ଥିଲୁ। ଅନ୍ୟ ସାଥି ଖେଳାଳିମାନେ ଘରକୁ ଫେରିଯାଇଥିବା ବେଳେ ସୁମନ ଲକ୍ଡାଉନ୍ କାରଣରୁ ବେଙ୍ଗାଲୁରୁ ସାଇ ସେଣ୍ଟରରେ ରହି ସିନିୟର ଦଳ ସହିତ ଅଢେଇମାସ ରହିଥିଲେ। ମାର୍ଚ୍ଚ ୨୨ରେ ମୋର ଟିକେଟ ବୁକ୍ ହୋଇଥିଲେ ମଧ୍ୟ ଜନତା କର୍ଫ୍ୟୁ ପାଇଁ ଯାତ୍ରା କରିପାରି ନ ଥିଲି। ଶେଷରେ ସେ ଜୁନ୍ ୧୯ ତାରିଖରେ ଘରକୁ ଫେରିଥିଲେ ଓ ୧୪ ଦିନ କ୍ୱାରାଣ୍ଟାଇନ୍ରେ ରହିଥିଲେ। ଏବେ ପରିବାର ସହିତ ସମୟ ବିତାଇବାକୁ ଚାହୁଁଛି ବୋଲି ସୁମନ କହିଛନ୍ତି।
