ଝରିଗାଁ, ୧୨ା୩(ସ୍ବ.ପ୍ର.): ନବରଙ୍ଗପୁର ଜିଲା ଝରିଗାଁ ବ୍ଲକ ବଡ଼ଟେମରା ପଞ୍ଚାୟତରେ ଶୁକ୍ରବାର ହେବାକୁ ଥିବା ନାଏବ ସରପଞ୍ଚ ନିର୍ବାଚନକୁ ଗ୍ରାମବାସୀ ବିରୋଧ କରିଛନ୍ତି। ଝରିଗାଁ ବ୍ଲକର ଧମନାଗୁଡ଼ା, ଧୋଡ୍ରା, ଭାଲୁକୁନାଡି ଏବଂ ଫୁପୁଗାଁ ପଞ୍ଚାୟତରେ କୋରମ ଅଭାବ ଯୋଗୁ ନାଏବ ସରପଞ୍ଚ ନିର୍ବାଚନ ହୋଇ ପାରି ନ ଥିବା ବିଡ଼ିଓ ସତ୍ୟନାରାୟଣ ମେହେର ସୂଚନା ଦେଇଛନ୍ତି।
ବଡ଼ ଟେମେରା ପଞ୍ଚାୟତରେ ସରପଞ୍ଚ ଆସନ ପାଇଁ ୩ ପ୍ରାର୍ଥୀ ନାମାଙ୍କନ ଦାଖଲ କରିଥିଲେ। ତେବେ ଜାଣିଶୁଣି ୨ଜଣଙ୍କ ନାମାଙ୍କନ ପତ୍ର ନାକଚ କରାଯାଇ ଚଟୁପକନା ଗ୍ରାମର ଯମୁନା ମୁଦୁଲିଙ୍କୁ ବିଜୟୀ ଘୋଷଣା କରାଯାଇଥିଲା ବୋଲି ପଞ୍ଚାୟତବାସୀ ଅଭିଯୋଗ କରିଛନ୍ତି। ତେଣୁ ପ୍ରଥମେ ସରପଞ୍ଚ ଓ ପରେ ନାଏବ ସରପଞ୍ଚ ନିର୍ବାଚନ କରିବାକୁ ସେମାନେ କହିଛନ୍ତି। ପଞ୍ଚାୟତ ମୁଖ୍ୟ ଫାଟକରେ ତାଲା ପକାଇ ଦେଇଥିଲେ। ଖବରପାଇ ଝରିଗାଁ ତହସିଲଦାର ହୃଷିକେଶ ଗଣ୍ଡ, ଉମରକୋଟ ଏସ୍ଡ଼ିପିଓ ଦିନେଶ କୁମାର ନାଏକ, ଝରିଗାଁ ଥାନାଧିକାରୀ ନଟବର ନନ୍ଦ ପ୍ରମୁଖ ଘଟଣାସ୍ଥଳରେ ପହଞ୍ଚତ୍ ଲୋକମାନଙ୍କୁ ବୁଝାଶୁଝା କରିଥିଲେ। ତେବେ ଏଠାରେ ନାଏବ ସରପଞ୍ଚ ନିର୍ବାଚନ ସ୍ଥଗିତ କରାଯାଇଥିଲା।