ନୂଆଦିଲ୍ଲୀ,୨୫।୧୦ : କଂଗ୍ରେସ ନେତା ଶଶି ଥରୁର ମଙ୍ଗଳବାର ମୂଳ ଭାରତୀୟ ଋଷି ସୁନକ ବ୍ରିଟେନର ପ୍ରଧାନମନ୍ତ୍ରୀ ହେବା ନେଇ ଏକ ନିଆରା ଟୁଇଟ କରିଛନ୍ତି। ସେ ଲେଖିଛନ୍ତି ‘ଲଗାନ୍ ସେ ଲଗାମ୍ ତକ୍’। ମାତ୍ର ୭୫ ବର୍ଷ ମଧ୍ୟରେ ଜୟ ହିନ୍ଦ୍। ଥରୁର ଏହାକୁ ଟୁଇଟ କରିବା ସହିତ ଅଭିନେତା ଆମିର ଖାନଙ୍କ ଫିଲ୍ମ ଲଗାନ୍ ଏବଂ ଋଷି ସୁନକଙ୍କ ଫଟୋ ମଧ୍ୟ ଶେୟାର କରିଛନ୍ତି। ଫିଲ୍ମ ଲଗାନ୍ ଭାରତରେ ବ୍ରିଟିଶ ଶାସନ ଉପରେ ଆଧାରିତ।
ଏହାପୂର୍ବରୁ ଶଶି ଥରୁର ପ୍ରଧାନମନ୍ତ୍ରୀ ଭାବରେ ସୁନକ ନିର୍ବାଚିତ ହେବାକୁ ସ୍ବାଗତ କରିଥିଲେ ଏବଂ ଆଶାବ୍ୟକ୍ତ କରିଥିଲେ ଯେ ଦିନେ ଭାରତ ମଧ୍ୟ ଏହି ପରମ୍ପରାକୁ ଗ୍ରହଣ କରିବ। ପୂର୍ବରୁ ଥରୁର ଲେଖିଥିଲେ ଯଦି ଏହା ଘଟେ, ମୁଁ ଭାବୁଛି ଆମ ସମସ୍ତଙ୍କୁ ସ୍ବୀକାର କରିବାକୁ ପଡିବ ଯେ ବ୍ରିଟିଶମାନେ ସଂଖ୍ୟାଲଘୁଙ୍କୁ ସବୁଠାରୁ ଶକ୍ତିଶାଳୀ ପଦବୀ ପ୍ରଦାନ କରି ଦୁନିଆରେ ଏକ ବିରଳ କାର୍ଯ୍ୟ କରିଛନ୍ତି। ଆମେ ଭାରତୀୟମାନେ ସୁନକର ଏହି ସଫଳତାକୁ ପାଳନ କରୁଛୁ ତେଣୁ ଆସନ୍ତୁ ସଚ୍ଚୋଟ ଭାବରେ ପଚାରିବା ଏଭଳି ସ୍ଥିତି ଭାରତରେ ହୋଇପାରିବ କି?