ଲୋଇସିଂହା,୫।୫(ସୁଶାନ୍ତ ବାରିକ): ବଲାଙ୍ଗୀର ଜିଲା ଲୋଇସିଂହା ନିର୍ବାଚନ ମଣ୍ଡଳୀ ବିଧାୟକ ପ୍ରାର୍ଥୀଙ୍କ ପ୍ରାର୍ଥତ୍ପତ୍ର ଯାଞ୍ଚ ପ୍ରକ୍ରିୟା ସରିଛି। ଯାଞ୍ଚ ପ୍ରକ୍ରିୟା ପରେ ୭ଜଣ ପ୍ରାର୍ଥୀଙ୍କ ପ୍ରାର୍ଥତ୍ପତ୍ର କାଏମ ରହିଛି। ସେମାନେ ହେଲେ କଂଗ୍ରେସର ଓମପ୍ରକାଶ କୁମ୍ଭାର, ବହୁଜନ ସମାଜ ପାର୍ଟିର ଗୋବିନ୍ଦ ବିଭାର, ବିଜେଡିର ନିହାରରଞ୍ଜନ ବେହେରା, ଭାଜପାର ମୁକେଶ ମହାଲିଙ୍ଗ, ନ୍ୟାଶନାଲ ଅପନୀ ପାର୍ଟିର ସରୋଜ କୁମାର ସୁନା, ଆମ୍ବେଡକ୍ରାଇଟ ପାର୍ଟି ଅଫ ଇଣ୍ଡିଆର ଲାଲମନ ନାଗ ଏବଂ ସ୍ବାଧୀନ ପ୍ରାର୍ଥୀ କୁବେର ସୁନା। ସୋମବାର ପ୍ରାର୍ଥତ୍ପତ୍ର ପ୍ରତ୍ୟାହାର ଦିବସ ରହିଛି। ଏହାପରେ କେତେଜଣ ନିର୍ବାଚନ ମଇଦାନରେ ରହିବେ ତା’ପରେ ସ୍ପଷ୍ଟ ହେବ।
ଉଲ୍ଲେଖଯୋଗ୍ୟ, ଲୋଇସିଂହା, ଆଗଲପୁର ଓ ପୁଇଁତଳା ବ୍ଲକକୁ ନେଇ ଲୋଇସିଂହା ନିର୍ବାଚନ ମଣ୍ଡଳୀ ଗଠିତ। ୨୦୧୪ ମସିହାରୁ ଏହି ଆସନ ଅନୁସୂଚିତ ଜାତି ବର୍ଗ ପାଇଁ ସଂରକ୍ଷିତ ରହିଛି। ୩ ବ୍ଲକର ୨୯୪ ବୁଥରେ ୨ ଲକ୍ଷ ୪୪ ହଜାର ୩୯୭ ମତଦାତା ମତଦାନ ସାବ୍ୟସ୍ତ କରିବେ।