ନୂଆଦିଲ୍ଲୀ,୧୭।୩: ସଂସଦରେ ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟର ୫ମ ଦିନରେ ମଧ୍ୟ ଉଭୟ ଗୃହର କାର୍ଯ୍ୟ ସଠିକ୍ ଭାବେ ଚାଲିପାରିନାହିଁ। ଶୁକ୍ରବାର ଗୃହ କାର୍ଯ୍ୟ ଆରମ୍ଭରୁ ଶାସକ ଦଳ କଂଗ୍ରେସ ନେତାଙ୍କ ରାହୁଲ ଗାନ୍ଧୀଙ୍କ ବୟାନ ଉପରେ ଉଭୟ ଗୃହରେ ଜୋରଦାର ହଙ୍ଗାମା କରିଥିଲେ। ଏଥିସହ ରାହୁଲ କ୍ଷମା ମାଗନ୍ତୁ ବୋଲି କହି ସ୍ଲୋଗାନ୍ ଦେଇଥିଲେ। ଏଥିଯୋଗୁ ଉଭୟ ଗୃହର କାର୍ଯ୍ୟରେ ବାଧାପ୍ରାପ୍ତ ହୋଇଥିଲା। ଫଳରେ ଲୋକ ସଭା ଏବଂ ରାଜ୍ୟ ସଭାର କାର୍ଯ୍ୟକୁ ସ୍ଥଗିତ ରଖାଯାଇଛି। ଶୁକ୍ରବାର ଆଶା କରାଯାଉଥିଲା ଯେ, ଲୋକ ସଭାରେ ରାହୁଲ ଗାନ୍ଧୀ ନିଜର ମନ୍ତବ୍ୟ ରଖିବେ। ସଂସଦର କାର୍ଯ୍ୟ ସମୟରେ ରାହୁଲ ଗାନ୍ଧୀ ଲୋକ ସଭାରେ ଉପସ୍ଥିତ ମଧ୍ୟ ଥିଲେ କିନ୍ତୁ ହଟ୍ଟଗୋଳ ଯୋଗୁ ଗୃହ ଚାଲିପାରି ନ ଥିଲା। ଏହି ସମୟରେ ବହୁ ସମୟ ଧରି ଲୋକ ସଭାର କାର୍ଯ୍ୟର ଅଡିଓକୁ ବନ୍ଦ କରାଯାଇଥିଲା। ଏହାସତ୍ତ୍ୱେ ସ୍ଲୋଗାନ ଦିଆଯିବା ସହ ହଙ୍ଗାମା ଜାରି ରହିଥିଲା। ଏହାପରେ ଲୋକ ସଭା ବାଚସ୍ପତି ଓମ୍ ବିର୍ଲା ଗୃହର କାର୍ଯ୍ୟକୁ ମାର୍ଚ୍ଚ ୨୦ ସକାଳ ୧୧ଟା ପର୍ଯ୍ୟନ୍ତ ସ୍ଥଗିତ ରଖିବାକୁ ଘୋଷଣା କରିଥିଲେ। ସେହିପରି ରାଜ୍ୟ ସଭା ଅଧ୍ୟକ୍ଷ ଜଗଦୀନ ଧନକର ମଧ୍ୟ ଗୃହର କାର୍ଯ୍ୟକୁ ମାର୍ଚ୍ଚ ୨୦ ସକାଳ ୧୧ଟା ପର୍ଯ୍ୟନ୍ତ ସ୍ଥଗିତ ରଖିଛନ୍ତି।