ଏନ୍ଡିଏ, ବିରୋଧୀ ଦଳ ବୈଠକରୁ କାହିଁକି ନିଜକୁ ଦୂରେଇ ରଖିଲେ ମାୟାବତୀ, କହିଲେ କାରଣ…
04 ଲକ୍ଷ୍ନୌ,୧୯।୭: ୨୦୨୪ ଲୋକ ସଭା ନିର୍ବାଚନ ପାଇଁ ୨୬ ବିରୋଧୀ ଦଳ ବେଙ୍ଗାଲୁରୁରେ ଏକ ବୈଠକ କରିଥିଲେ। ଅନ୍ୟପକ୍ଷରେ ମଙ୍ଗଳବାର ସନ୍ଧ୍ୟାରେ ଦିଲ୍ଲୀରେ ଭାଜପା ନେତୃତ୍ୱାଧୀନ ଏନ୍ଡିଏ ମେଣ୍ଟର ଏକ ବୈଠକ ଅନୁଷ୍ଠିତ ହୋଇଥିଲା। ଏନ୍ଡିଏ ବୈଠକରେ ମୋଟ ୩୮ଟି ଦଳ ସାମିଲ ହୋଇଥିଲେ। ଏହି ଉଭୟ ବୈଠକ ପରେ ଏବେ ବିଏସପି ମୁଖ୍ୟ ମାୟାବତୀଙ୍କ ପ୍ରତିକ୍ରିୟା ଆସିଛି। ଉଭୟ ମେଣ୍ଟରୁ ଦୂରରେ ରହିଥିବା ବିଷୟରେ ସେ କହିଛନ୍ତି।
ଏହି ବୈଠକ ଉପରେ ମାୟାବତୀ କହିଛନ୍ତି, ଲୋକ ସଭା ନିର୍ବାଚନ ପାଇଁ ସମୟ ଅତି ନିକଟତର ହୋଇଛି। ଶାସକ ଦଳ ଏବଂ ବିରୋଧୀ ଦଳଗୁଡ଼ିକର ବୈଠକ ଚାଲିଛି, ହେଲେ ଆମ ଦଳ ମଧ୍ୟ ଏହି ପ୍ରସଙ୍ଗରେ ପଛରେ ନାହାଁନ୍ତି। ଅନ୍ୟପକ୍ଷରେ, ବିରୋଧୀ ଦଳ ଶାସକ ଦଳକୁ ପରାସ୍ତ କରିବାକୁ କାର୍ଯ୍ୟ କରୁଛି ଏବଂ ବିଏସପି ଏଥିରେ ପଛରେ ନାହିଁ।
ବିଏସପି ମୁଖ୍ୟ କହିଛନ୍ତି, କଂଗ୍ରେସ ଦଳ ନିଜ ଭଳି ଜାତିଆଣ ତଥା ପୁଞ୍ଜିପତିବାଦୀ ଦଳ ସହ ମିଳିତ ହୋଇ କ୍ଷମତାକୁ ଫେରିବାକୁ ଚିନ୍ତା କରୁଥିବାବେଳେ ଏନ୍ଡିଏ ପୁଣି କ୍ଷମତାକୁ ଫେରିବାକୁ ଚିନ୍ତା କରୁଛି, କିନ୍ତୁ ସେମାନଙ୍କର କାର୍ଯ୍ୟ ଶୈଳୀ କହୁଛି ଯେ ସେମାନଙ୍କର ନୀତି ଏବଂ ଚିନ୍ତାଧାରା ପ୍ରାୟ ସମାନ ଅଟେ। ଏହି କାରଣରୁ ବିଏସପି ସେମାନଙ୍କଠାରୁ ନିଜକୁ ଦୂରେଇ ରଖିଛି।