ନୂଆଦିଲ୍ଲୀ, ୨୦ା୯: ଲୋକ ସଭାର ଚଳିତ ମୌସୁମୀ ଅଧିବେଶନରେ ଯୋଗ ଦେଇଥିବା ୩ ଜଣ ଏମ୍ପି କୋଭିଡ୍-୧୯ ପଜିଟିଭ ହେବା ପରେ ଅଧିବେଶନକୁ ବୁଧବାର ବନ୍ଦ କରିଦିଆଯାଇପାରେ ବୋଲି ଜଣାପଡ଼ିଛି। ଶନିବାର ସନ୍ଧ୍ୟାରେ ବିଜନେସ୍ ଆଡଭାଇଜରି କମିଟି ସହ ସରକାର ଆଲୋଚନା କରିବା ପରେ ନିର୍ଦ୍ଧାରିତ ସମୟ ପୂର୍ବରୁ ଅଧିବେଶନକୁ ବନ୍ଦ କରିବା ଲାଗି ନିଷ୍ପତ୍ତି ନିଆଯାଇଥିବା କୁହାଯାଉଛି। ଏ ନେଇ ସରକାର ବିରୋଧୀ ଦଳ ସହ ଆଲୋଚନା କରିଛନ୍ତି। ଅଧିବେଶନ ବନ୍ଦ କରିଦେବା ଲାଗି ବିରୋଧୀ ଦଳଗୁଡିକ ସହମତ ହୋଇଥିବା ଜଣାପଡିଛି। ରାଜ୍ୟ ସଭା ମଧ୍ୟ ଲୋକ ସଭା ଭଳି ନିଷ୍ପତ୍ତି ନେବ ବୋଲି ଆଶା କରାଯାଉଛି। ଅଧିବେଶନ ଆରମ୍ଭ ପୂର୍ବରୁ ଲୋକ ସଭାର ୧୭ ଏମ୍ପି ଓ ରାଜ୍ୟ ସଭାର ୮ ସଦସ୍ୟ କରୋନା ପଜିଟିଭ ବାହାରିଥିଲେ। ସପ୍ତାହେ ପୂର୍ବରୁ କେନ୍ଦ୍ର ମନ୍ତ୍ରୀ ନୀତିନ ଗଡକରୀ ଓ ପ୍ରହ୍ଲାଦ ପଟେଲଙ୍କ କୋଭିଡ୍ ରିପୋର୍ଟ ନେଗେଟିଭ ଥିବାବେଳେ ଏବେ ସେ ପଜିଟିଭ ଚିହ୍ନଟ ହୋଇଛନ୍ତି। ଶୁକ୍ରବାର ଭାଜପାର ରାଜ୍ୟ ସଭା ସଦସ୍ୟ ବିନୟ ସହସ୍ରବୁଦ୍ଧି କରୋନା ପଜିଟିଭ୍ ବାହାରିଛନ୍ତି। ଅଧିବେଶନ ଶେଷ କରିବା ପୂର୍ବରୁ ସରକାର ପାର୍ଲାମେଣ୍ଟରେ ୧୧ଟି ଅଧ୍ୟାଦେଶକୁ ଗୃହୀତ କରାଇ ନେବାକୁ ଚାହୁଁଥିଲେ। ବର୍ତ୍ତମାନ ସୁଦ୍ଧା ଲୋକ ସଭାରେ କୃଷି କ୍ଷେତ୍ର ସମ୍ପର୍କିତ ୩ଟି ବିଲ୍କୁ ଗୃହୀତ କରାଯାଇପାରିଛି। କରୋନା ମହାମାରୀକୁ ପ୍ରତିହତ କରିବା ପାଇଁ ଆବଶ୍ୟକ ପାଣ୍ଠି ସକାଶେ ପାର୍ଲାମେଣ୍ଟର ସଦସ୍ୟମାନଙ୍କ ଦରମା ୩୦ ପ୍ରତିଶତ ହ୍ରାସ କରିବା ସଂକ୍ରାନ୍ତ ଅଧ୍ୟାଦେଶକୁ ଉଭୟ ଗୃହରେ ଗୃହୀତ କରାଯାଇଛି।