ନୂଆଦିଲ୍ଲୀ,୪।୧୨: ଲୋକ ସଭାରେ ଜାରି ଶୀତକାଳୀନ ଅଧିବେଶନ ସମୟରେ ତେଲୁଗୁ ଦେଶମ ପାର୍ଟିର ବରିଷଠ ଏମ୍ପି ମଙ୍ଗୁଟା ଶ୍ରୀନିବାସୁଲୁ ରେଡ୍ଡି ଗୃହରେ ତାଙ୍କୁ ମିଳିଥିବା ଆସନକୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ସେ ୫ଥରର ଏମ୍ପି। ହେଲେ ତାଙ୍କୁ ୮ମ ଧାଡ଼ିରେ ଆସନ ମିଳିଛି। ହେଲେ ଗତ ଲୋକ ସଭାରେ ସେ ଦ୍ୱିତୀୟ ଧାଡ଼ିରେ ବସିଥିଲେ ବୋଲି କହିଛନ୍ତି।
ଏହି ପ୍ରସଙ୍ଗରେ ହସ୍ତକ୍ଷେପ କରି ବାଚସ୍ପତି କହିଥିଲେ ଯେ, ସେ ନିଜର ଅଭିଯୋଗକୁ କିଛି ସମୟ ପାଇ ଏଡାଇ ଦିଅନ୍ତୁ। କୌଣସି ସଦସ୍ୟ ଗୃହରେ ପାର୍ଲାମେଣ୍ଟର କାର୍ଯ୍ୟାବସ୍ଥା ଉପରେ ପ୍ରଶ୍ନ ଉଠାଇବେ ନାହିଁ। ଯଦି କାହାକୁ କିଛି ସମସ୍ୟା ଅଥବା ଚିନ୍ତା ରହିଛି ତେବେ ଦୟାକରି ଗୃହ ନଚେତ ସଂସଦୀୟ କାର୍ଯ୍ୟ ମନ୍ତ୍ରଣାଳୟକୁ ଆସନ୍ତୁ। ଏହି ପରମ୍ପରାର ପାଳନ କରାଯାଉ।
କେବଳ ରେଡ୍ଡି ନୁହନ୍ତି ଅନେକ ବରିଷ୍ଠ ଏମ୍ପି ଲୋକ ସଭାରେ ନୂଆ ଆସନ ବ୍ୟବସ୍ଥାକୁ ନେଇ ଅସନ୍ତୁଷ୍ଟ ଅଛନ୍ତି। ସାର୍ବଜନିକ ଭାବେ ଏନେଇ ନ କହିଲେ ବି ଅନେକ କଂଗ୍ରେସ ଏମ୍ପି ଏଥିରେ କିଛି ତର୍କ ନାହିଁ ବୋଲି କହିଛନ୍ତି। ସେହିଭଳି ଇଣ୍ଡିଆ ମେଣ୍ଟରେ ସହଯୋଗୀ ଦଳକୁ ‘୮ମ ବ୍ଲକ’ରୁ ଦୂରରେ ରଖିବା ପଛରେ କଂଗ୍ରେସର ହାତ ଥିବା କୁହାଯାଉଛି।
ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ୮ମ ବ୍ଲକରେ ରହିଛି। ତାଙ୍କ ସହ କଂଗ୍ରେସ ମହାଚିବ ଏବଂ ଲୋକ ଲେଖା ସମିତି ମୁଖ୍ୟ କେସି ବେଣୁଗୋପାଳ, ଡିଏମ୍କେ ନେତା ଟିଆର୍ ବାଲୁ ଅଛନ୍ତି। ଏହି ବ୍ଲକରେ ଦ୍ୱିତୀୟ ଧାଡ଼ିରେ ଏକମାତ୍ର ଅଣ କଂଗ୍ରେସ ଏମ୍ପି ଭାବେ ଡିଏମ୍କେର ଏ ରାଜା ଅଛନ୍ତି। ଲୋକ ସଭାରେ କଂଗ୍ରେସର ଉପନେତା ଗୌରବ ଗୋଗୋଇ ଏବଂ କଂଗ୍ରେସ ମୁଖ୍ୟ ସଚେତକ ସୁରେଶ କୋଡିକୁନ୍ନିଲ ଆଗାମୀ ବ୍ଲକ୍ର ଆଗ ଧାଡ଼ିରେ ବସିଛନ୍ତି।
ତେବେ ଆସନ ବଣ୍ଟାକୁ ନେଇ ଅସନ୍ତୋଷର ମୁଖ୍ୟ କାରଣ ହେଉଛି ଗୃହ ଚାଲିଥିବା ବେଳେ ସିଧା ପ୍ରସାରଣ ଲାଗି କ୍ୟାମେରାର ଫୋକସ୍। ଶାସକ ଦଳ ବ୍ୟତିତ କ୍ୟାମେରା ବିଶେଷତଃ ୮ମ ବ୍ଲକ ଉପରେ ଧ୍ୟାନ ଦେଇଥାଏ, ଯେଉଁଠାରେ ବିରୋଧୀ ଦଳ ନେତା ବସିଥାନ୍ତି। ଏହାକୁ ନେଇ ସିଧା ପ୍ରସାରଣ ସମୟରେ ନଜର ଆସିବା ନିର୍ବାଚିତ ଅଞ୍ଚଳରେ ତାଙ୍କ ପତିଆରା ପାଇଁ ଗୁରୁତ୍ୱପୂର୍ଣ୍ଣ ବୋଲି ଅନେକେ ଏମ୍ପି କହିଛନ୍ତି।