ଭୁବନେଶ୍ୱର,୧୭ା୬(ବ୍ୟୁରୋ): କୋଭିଡ୍ରୁ ସୁସ୍ଥ ହେବା ପରେ ବି ଆକ୍ରାନ୍ତଙ୍କ ଶରୀରରେ ଅନେକ ଲକ୍ଷଣ ଦେଖାଯାଉଛି। ଅତିଶୀଘ୍ର ଅବଶ ହୋଇପଡ଼ିବା, ରାତିରେ ନିଦ ନ ହେବା, ଭୋକ କମିଯିବା, ଛାତି ବଥା, କାଶ, ଧଇଁସଇଁ ଲାଗିବା, ପେଟ କାଟିବା, ମୁଣ୍ଡ ବିନ୍ଧିବା, ଚିଡ଼ିଚିଡ଼ା, ମନେ ନ ରହିବା ଭଳି ଲକ୍ଷଣ ସାଙ୍ଗକୁ ଖାଦ୍ୟନଳୀ, ଏଣ୍ଡୋକ୍ରାଇନ୍, ହୃତ୍ପିଣ୍ଡ ସହିତ ସ୍ନାୟବିକ ସମସ୍ୟାର ସମ୍ମୁଖୀନ ହେଉଛନ୍ତି। ଏସବୁ ଲକ୍ଷଣ ଯଦି ୩ ମାସ ବା ୧୨ ସପ୍ତାହ ରହିଲେ ଦୀର୍ଘମିଆଦୀ କୋଭିଡ୍ ବା ପୋଷ୍ଟ କୋଭିଡ୍ ସିଣ୍ଡ୍ରୋମ କୁହାଯାଏ। ଏହି ଲକ୍ଷଣ ସାଧାରଣତଃ କୋଭିଡ୍ରୁ ସୁସ୍ଥ ହେବା ପରେ ମାସେରୁ ଦୁଇ ମାସ ମଧ୍ୟରେ କମିଯାଇଥାଏ। କିନ୍ତୁ କିଛି ଲୋକ ଏହି ଲକ୍ଷଣ ସହ ସେମାନେ ଲଙ୍ଗ୍ କୋଭିଡ୍ ଅବସ୍ଥାକୁ ଯାଇଥାନ୍ତି ଏବଂ ଚିକିତ୍ସାର ଆବଶ୍ୟକ କରିଥାନ୍ତି ବୋଲି କଟକ ଏସ୍ସିବି ମେଡିକାଲ କଲେଜର ମେଡିସିନ ବିଭାଗ ମୁଖ୍ୟ ଡା. ଜୟନ୍ତ ପଣ୍ଡା କହିଛନ୍ତି। ବୁଧବାର ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ଆୟୋଜିତ ସଚେତନତାଭିତ୍ତିକ କାର୍ଯ୍ୟକ୍ରମରେ ଡା. ପଣ୍ଡା କହିଛନ୍ତି, ଶିଶୁଙ୍କଠାରେ ଦୀର୍ଘମିଆଦୀ କୋଭିଡ୍ ପ୍ରାୟତଃ କମ୍ ଦେଖାଯାଏ। ଯେଉଁମାନଙ୍କର ମଧୁମେହ, କିଡ୍ନୀଜନିତ, ଶ୍ୱାସ, କର୍କଟ ଭଳି ଜଟିଳ ରୋଗ ଥିଲେ, ସେମାନଙ୍କର ପୋଷ୍ଟ କୋଭିଡ୍ ଲକ୍ଷଣ ଆସେ ଏବଂ ସେମାନେ ଚିକିତ୍ସାର ଆବଶ୍ୟକ କରିଥାନ୍ତି। କିନ୍ତୁ ଦୀର୍ଘମିଆଦୀ କୋଭିଡ୍ ରୋଗୀ ସଂକ୍ରାମକ ନୁହନ୍ତି। ତାଙ୍କଠାରୁ ରୋଗ ଡେଇଁବନି। ଏଥିରୁ ମୁକ୍ତି ପାଇଁ ପୀଡିତଙ୍କ ସ୍ବାସ୍ଥ୍ୟାବସ୍ଥା ଉପରେ ନିର୍ଭର କରେ। ଯିଏ ଯେତେ ଗୁରୁତର ଥିବେ, ଭଲ ହେବାକୁ ସେତେ ଡେରି ହୋଇଥାଏ। ସାମାନ୍ୟ ବା ମଧ୍ୟମରେ ଆକ୍ରାନ୍ତ ଥିଲେ ଶୀଘ୍ର ଭଲ ହୋଇଯାଇଥାନ୍ତି। ଯେଉଁମାନେ ଗୁରୁତର ହୋଇଥାନ୍ତି, ସେମାନଙ୍କୁ ୧ରୁ ୩ ମାସ ଲାଗିଥାଏ ବୋଲି ଡା. ପଣ୍ଡା କହିଛନ୍ତି।