ନିରାକାରପୁର, ୩।୧(ମାନସ ଚନ୍ଦ୍ର ପଟ୍ଟନାୟକ): ଭୂଷଣ୍ଡପୁର ଅଞ୍ଚଳର ଇଷ୍ଟଦେବ ଶ୍ରୀ ଐଶ୍ୱାନେଶ୍ୱର ଦେବଙ୍କ ମନ୍ଦିର ହୁଣ୍ଡି ଭାଙ୍ଗି କେହି ଦୁର୍ବୁତ୍ତ ଚୋରି କରିଥିବା ଜଣାପଡିଛି। ଏନେଇ ମନ୍ଦିର ପରିଚାଳନା କମିଟି ପକ୍ଷରୁ ସ୍ଥାନୀୟ ଭୂଷଣ୍ଡପୁର ଫାଣ୍ଡିରେ ଅଭିଯୋଗ ହୋଇଛି।
ମିଳିଥିବା ସୂଚନା ଅନୁଯାୟୀ ଗୁରୁବାର ବିଳମ୍ବିତ ରାତିରେ ଉକ୍ତ ମନ୍ଦିରରେ ଲାଗିଥିବା ୨ଟି ହୁଣ୍ଡି ବାକ୍ସକୁ କେହି ଦୁର୍ବୁତ୍ତ ଭାଙ୍ଗି ସେଥିରେ ଭକ୍ତଙ୍କ ଦାନ ଥିବା ଅର୍ଥକୁ ଲୁଟି ନେଇ ବାହାରେ ଫୋପାଡ଼ି ଦେଇଛି। ସେହିପରି ଅନ୍ୟ ଏକ ଲକର ବାକ୍ସ ଭାଙ୍ଗି ଭିତରେ ଥିବା ସମସ୍ତ ଅର୍ଥ ନେଇଯାଇଥିବା ଅଭିଯୋଗ ହୋଇଛି।
ଏ ସମ୍ପର୍କରେ ମନ୍ଦିର ପରିଚାଳନା କମିଟି ଓ ସ୍ଥାନୀୟବାସୀଙ୍କ ଠାରୁ ଖବର ପାଇ ଭୂଷଣ୍ଡପୁର ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରି ଫେରିଯାଇଛି। ଏନେଇ ତଦନ୍ତ ଚାଲିଥିବା ଭୂଷଣ୍ଡପୁର ଫାଣ୍ଡି ଅଧିକାରୀ ବିନୋଦ କୁମାର ପରିଡା ସୂଚନା ଦେଇଛନ୍ତି।
ସୂଚନାଯୋଗ୍ୟକି, ବର୍ଷକୁ ଏହି ହୁଣ୍ଡିରୁ ମିଳୁଥିବା ଅର୍ଥରେ ଶ୍ରୀଜୀଉଙ୍କର ଅଷ୍ଠ ଶମ୍ଭୁ ମିଳନ ଉତ୍ସବ ସମେତ ଅନ୍ୟାନ୍ୟ ପୂଜା ପାର୍ବଣରେ ଏହା ସହାୟକ ହେଉଥିଲା। ଯାହା ଚଳିତ ବର୍ଷ ଠାକୁରଙ୍କ ଉତ୍ସବ ପାଳନରେ ଏକ ପ୍ରକାର ଆର୍ଥିକ ସଙ୍କଟ ଦେଖାଦେବାର ସ୍ଥାନୀୟବାସୀ ଆଶଙ୍କା ପ୍ରକାଶ କରିଛନ୍ତି। ତେଣୁ ହୁଣ୍ଡି ଭାଙ୍ଗି ଲୁଟ କରିଥିବା ଦୁର୍ବୁତ୍ତକୁ ପୋଲିସ ପକ୍ଷରୁ ତୁରନ୍ତ ଗିରଫ କରିବା ନିମନ୍ତେ ସ୍ଥାନୀୟବାସୀ ପ୍ରଶାସନକୁ ନିବେଦନ କରିଛନ୍ତି।
