ରାୟଗଡ଼ା,୬।୨(ସ୍ବ.ପ୍ର): ରାୟଗଡ଼ା ସହରରେ ନିୟମିତ ବ୍ୟବଧାନରେ ଲୁଟ୍, ଚୋରି ଦିନକୁ ଦିନ ବଢ଼ିବାରେ ଲାଗିଛି। ପୋଲିସକୁ ଖୋଲା ଚ୍ୟାଲେଞ୍ଜ ଦେଇ ଲୁଟ୍ କରୁଛନ୍ତି ଚୋର। ତଥାପି ଚେତୁନି ପୋଲିସ। ପ୍ରତିଦିନ ଏଭଳି ଘଟଣା ଘଟୁଥିଲେ ମଧ୍ୟ ପୋଲିସର ନିଷ୍କ୍ରିୟତା ଲୁଟେରାଙ୍କୁ ବେଶ ସୁହାଉଛି। ଇତିମଧ୍ୟରେ ଆଜି ଆଉ ଏକ ବଡଧରଣର ଲୁଟ୍ ଘଟିଛି। ସହରର ଇନ୍ଦିରା ନଗର ୪ର୍ଥ ଗଳିରେ ଜଣେ ମହିଳାଙ୍କ ବେକରୁ ୭୦ ଗ୍ରାମ ଓଜନର ସୁନା ଚେନ୍ ଏବଂ ମଙ୍ଗଳସୂତ୍ର ନେଇଯାଇଛନ୍ତି ଦୁର୍ବୃତ୍ତ। ଇନ୍ଦିରା ନଗର ଚତୁର୍ଥ ଲେନରେ ଭଉଣୀ ଘରକୁ ବୁଲି ଆସୁଥିବା ମହିଳା ତାଙ୍ଗୁଡୁ ରମାମଣିଙ୍କ ଠାରୁ ଏହି ଲୁଟ୍ ହୋଇଛି। ମହିଳା ଜଣଙ୍କ ତାଙ୍କ ସାନ ଭଉଣୀ ଭି. ଅରୁଣାଙ୍କ ଘରକୁ ଆସିଥିଲେ। ଦିନ ପ୍ରାୟ ୧୧.୩୦ ସମୟରେ ଘର ସମ୍ମୁଖରେ ଥିବା ଭଉଣୀଙ୍କ ଦୋକାନରେ ବସିଥିଲେ ରମାମଣି। ସେହି ସମୟରେ ତିନି ଜଣ ଲୁଟେରା ଏକ ଧଳା ରଙ୍ଗର ଆପାଚି ବାଇକ୍ରେ ଆସି ଦୋକାନରେ ସିଗାରେଟ୍ ମାଗିଥିଲେ। ମହିଳା ଜଣଙ୍କ ତଳକୁ ଚାହିଁ ସିଗାରେଟ ବାହାର କରିବା ସମୟରେ ତାଙ୍କ ବେକକୁ ଚାପି ସୁନା ଚେନ୍ ଲୁଟି ନେଇଥିଲେ। ଲୁଟ୍ ହୋଇଥିବା ସୁନା ଚେନ୍ ଓ ମଙ୍ଗଳସୂତ୍ରର ଓଜନ ୭୦ ଗ୍ରାମ ବୋଲି ଜଣାପଡିଛି। ଯାହାର ମୂଲ୍ୟ ୩ ଲକ୍ଷ ୫୯ ହଜାର ଟଙ୍କା ହେବ। ତେବେ ତିନି ଜଣ ଲୁଟେରା ଫେରାର ସମୟର ସିସିଟିଭି କ୍ୟାମେରାରେ କଏଦ ହୋଇଛି। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ତନାଘନା କରୁଛି। ହେଲେ ଲୁଟେରା ସମ୍ପର୍କରେ କୌଣସି ସୂଚନା ମିଳିନାହିଁ। ତେବେ ଏହି ଘଟଣା ରାୟଗଡା ସହରରେ ପୋଲିସର ଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଲଗାତାର ଭାବେ ଅପରାଧିକ କାର୍ଯ୍ୟକଳାପ ବଢୁଥିବା ବେଳେ ପୋଲିସ କୌଣସି ଦୃଢ଼ କାର୍ଯ୍ୟାନୁଷ୍ଠାନ ନେଉନଥିବା ସାଧାରଣରେ ଅଭିଯୋଗ ହୋଇଛି।