ସମ୍ବଲପୁର,୩୦।୧୨(ବ୍ୟୁରୋ)- ଦିନ ଦ୍ୱିପହରରେ ଜଣେ ଯୁବକ ଗ୍ରାହକ ସାଜି ଏକ ସୁନା ଦୋକାନରୁ ୨୦୦ ଗ୍ରାମ ସୁନା ଅଳଙ୍କାର ଚୋରି କରି ଫେରାର ହୋଇଯାଇଥିବା ଜଣାପଡିଛି। ଏଭଳି ଘଟଣା ଘଟିଛି ବୁର୍ଲା ଥାନା ମୁଖ୍ୟ ବଜାରରେ।
ପୋଲିସ ସୂଚନା ମୁତାବକ, ବୁଧବାର ମଧ୍ୟାହ୍ନ ପ୍ରାୟ ୧୨ଟାରେ ଜଣେ ଯୁବକ ବଜାରରେ ଥିବା ଉତ୍କଳ ଜୁଏଲର୍ସକୁ ଅଳଙ୍କାର କିଣିବାକୁ ଆସିଥିଲେ। ଯୁବକ ଜଣକ ଦୋକାନୀଙ୍କୁ ସୁନା ଚେନ, ମୁଦି ଆଦି ଅଳଙ୍କାର ଦେଖାଇବାକୁ କହିଥିଲେ। ଅଳଙ୍କାର ଦେଖିବା ପରେ ଯୁବକ ଜଣକ କୌଶଳ କ୍ରମେ ସାଙ୍ଗରେ ଆଣିଥିବା ଏକ ଡବାକୁ ଦୋକାନରେ ଥୋଇ ଅଳଙ୍କାର ଭର୍ତ୍ତି ଥିବା ଅନ୍ୟ ଏକ ବକ୍ସକୁ ନେଇ ଫେରାର ହୋଇଯାଇଥିଲେ। କିଛି ସମୟ ପରେ ଦୋକାନ ମାଲିକ ନରେନ୍ଦ୍ର ସାହୁ ଅଳଙ୍କାର ଚୋରି ହୋଇଥିବା ଜାଣିବାକୁ ପାଇଥିଲେ। ସେ ଯୁବକଙ୍କୁ ଧରିବାକୁ ଗୋଡାଇଥିଲେ। ହେଲେ ଯୁବକ ଜଣକ ଫେରାର ହୋଇଯାଇଛନ୍ତି। ଚୋରି ହୋଇଥିବା ସୁନା ଅଳଙ୍କାରର ମୂଲ୍ୟ ପ୍ରାୟ ୧୦ ଲକ୍ଷ ଟଙ୍କାରୁ ଊର୍ଦ୍ଧ୍ୱ ହେବ ବୋଲି ଜଣାପଡିଛି। ଏ ନେଇ ଦୋକାନ ମାଲିକ ବୁର୍ଲା ଥାନାରେ ଏକ ଅଭିଯୋଗ କରିଛନ୍ତି। ପୋଲିସ ଘଟଣା ସ୍ଥଳରେ ପହଞ୍ଚତ୍ ଦୋକାନରେ ଲାଗିଥିବା ସିସିଟିଭି ଯାଞ୍ଚ କରି ଯୁବଙ୍କୁ ଚିହ୍ନଟ କରିଛି। ପୋଲିସ ଯୁବକଙ୍କ ଫଟୋକୁ ବିଭିନ୍ନ ଥାନାକୁ ପଠାଇଥିବା ହୀରାକୁଦ ଏସ୍ଡିପିଓ ଶିଶୁରଞ୍ଜନ ମହାପାତ୍ର କହିଛନ୍ତି। ତଦନ୍ତ ଚାଳିଛି ଖୁବ ଶିଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ସେ ପ୍ରକାଶ କରିଛନ୍ତି।