ରଗଡି,୨୧ା୧୧(ଡି.ଏନ.ଏ.): ବ୍ୟାସନଗର ତହସିଲରେ ମୂଲ୍ୟବାନ ଲଘୁ ଖଣିଜ ସମ୍ପଦ ଚୋରାଚାଲାଣ ବନ୍ଦ ହେବା ଦିଶୁନାହିଁ। ବିଭାଗୀୟ ଅଧିକାରୀଙ୍କ ସହଯୋଗ ରହୁଥିବାରୁ ଏହି ବେଆଇନ କାର୍ଯ୍ୟ ଅଣାୟତ୍ତ ହୋଇପଡ଼ିଛି। ଏହି ତହସିଲର ପଛିକୋଟ ରାଜସ୍ବ ନିରୀକ୍ଷକ (ଆରଆଇ) ଅଧୀନ ଜଙ୍ଗଲ ଓ ସରକାରୀ ଜମିରୁ ନିୟମିତ ମୋରମ ଚୋରି ହେଉଥିବା ଅଭିଯୋଗ ହେଉଥିବାବେଳେ ରାଜସ୍ବ ବିଭାଗ ଟେର ପାଉନାହିଁ। ଏପରି କି ରାଜସ୍ବ ବିଭାଗ ଅଫିସ ନିକଟ ଆକାଶିଆ ବଣ ନିକଟରୁ ମୋରମ ଚୋରାଚାଲାଣ ବିନା ବାଧାରେ ହେଉଥିବା ଦେଖିବାକୁ ମିଳୁଛି। ରାତି ହେଲେ ମାଫିଆ ଜେସିବି ସାହାଯ୍ୟରେ ସରକାରୀ ଜମି ଓ ଜଙ୍ଗଲ ଜମିଗୁଡ଼ିକୁ ତାଡ଼ି ମୋରମ ନେଇଯାଉଛନ୍ତି। ତାହାକୁ ଟ୍ରିପ୍ ପିଛା ହଜାର ଟଙ୍କାରେ ବିକୁଥିବା ଜଣାପଡ଼ିଛି। ତେବେ ଏହି ଚୋରା ମୋରମକୁ ପଛିକୋଟ ପଞ୍ଚାୟତ କଡ଼ମା ଗ୍ରାମର କେତେଜଣ ଠିକାଦାର କିଣି ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା କାର୍ଯ୍ୟରେ ବ୍ୟବହାର କରି ଲକ୍ଷାଧିକ ଟଙ୍କା ଅନୁଦାନ ରାଶି ହଡ଼ପ କରୁଥିବା ଅଭିଯୋଗ ହୋଇଛି। ଅନ୍ୟପକ୍ଷରେ ଖୋଳା ଯାଉଥିବା ସ୍ଥାନଗୁଡ଼ିକରେ ବଡ଼ବଡ଼ ଗର୍ତ୍ତ ସୃଷ୍ଟି ହେଉଥିବାରୁ ବିଭିନ୍ନ ସମୟରେ ସେଥିରେ ପ୍ରାଣୀ ପଡ଼ି ପ୍ରାଣ ହରାଉଛନ୍ତି। ଏନେଇ ବ୍ୟାସନଗର ତହସିଲଦାର ଅଶୋକ କୁମାର ମାଝୀଙ୍କୁ ପଚାରିବାରୁ ମୋରମ ଚୋରାଚାଲାଣ ନେଇ ତାଙ୍କ ପାଖରେ କୌଣସି ଖବର ନ ଥିବା କହିଛନ୍ତି।