ପାରାଦୀପ,୨୪।୪(ସ୍ବ.ପ୍ର.): ପାରାଦୀପର ମହାନଦୀ ଅବବାହିକାରୁ ଗତ ମାସେହେଲା ବିପୁଳ ପରିମାଣର ମାଟି ଖୋଳା ଚାଲିଛି। ନୂଆଗଡ଼ ପଞ୍ଚାୟତ ଅଧୀନରେ ଥିବା ଏହି ଜାଗା ଆଗାମୀ ଦିନରେ ଏକ କମ୍ପାନୀ ଅଧିଗ୍ରହଣ କରିବାର ପ୍ରସ୍ତାବ ରହିଛି। ସେହି ଜାଗାରୁ ଲଗାତାର ରାତି ସାରା ମାଟି ଖନନ କରାଯାଉଛି। ଫଳରେ ଉକ୍ତ ଅଞ୍ଚଳ କୃତ୍ରିମ ଜଳାଶୟ ଭଳି ଦେଖାଗଲାଣି। କେତେଜଣ ମୁଷ୍ଟିମେୟ ଲୋକ ଶାସକ ପ୍ରଶାସକଙ୍କ ଛତ୍ରଛାୟା ତଳେ ରହି ଏପରି ମାଟି ବିକୁଛନ୍ତି ବୋଲି ନୂଆଗଡ଼ ସରପଞ୍ଚ ଦେବେନ୍ଦ୍ର ରାଉତ ଅଭିଯୋଗ କରିଛନ୍ତି। ମାଟି ମେଶିନ ଯୋଗେ ଖନନ କରାଯାଉଛି, ତାହାକୁ ଶତାଧିକ ହାଇୱା ଯୋଗେ ଠିକଣା ସ୍ଥାନକୁ ନିଆଯାଉଛି, କିନ୍ତୁ ଏହାକୁ ରୋକିବାରେ ପ୍ରଶାସନ ବିଫଳ ହୋଇଛି। ଏ ନେଇ କୁଜଙ୍ଗ ତହସିଲଦାର ପ୍ରୀତିପର୍ଣ୍ଣା ମିଶ୍ରଙ୍କୁ ପଚାରିଲେ କୁହନ୍ତି, ଆମେ ଯେତେବେଳେ ଘଟଣାସ୍ଥଳକୁ ଯାଉଛୁ ସେଠାରେ କାହାକୁ ପାଉନାହୁଁ। ଉକ୍ତ ମାଟି ଖନନ ଜାଗାକୁ ଯିବାପାଇଁ ହେଲେ କଟକ-ପାରାଦୀପ ରାସ୍ତାର ସିଙ୍ଗଟାଳି ଛକ ଦେଇ ଯିବାକୁ ପଡ଼ିଥାଏ। ମାଟି ଉଠାଉଥିବା ଲୋକେ ଏହି ଛକରେ କେତେଜଣ ପିଲାଙ୍କୁ ଜଗାଇଛନ୍ତି। ଫଳରେ ପ୍ରଶାସନର କୌଣସି ଗାଡ଼ି ସେହି ରାସ୍ତାବାଟେ ଅତିକ୍ରମ କରିବା ମାତ୍ରେ ସେମାନଙ୍କ ପାଖରେ ଖବର ପହଞ୍ଚତ୍ୟାଉଛି। ଏହାଦ୍ୱାରା ଚଢ଼ାଉ ସବୁବେଳେ ବିଫଳ ରହୁଛି ବୋଲି ଲକ୍ ଥାନାଧିକାରୀ ଭାବଗ୍ରାହୀ ରାଉତ କୁହନ୍ତି। ଅପରପକ୍ଷେ ଏହି ଖନନକାରୀଙ୍କ ପ୍ରଚ୍ଛଦପଟରେ ରାଜନେତାଙ୍କ ହାତ ଥିବା ଚର୍ଚ୍ଚା ହେଉଛି। ମହାନଦୀର ୫୦୦ ମିଟର ସ୍ଥଳଭାଗ ସିଆରଜେଡ୍(କୋଷ୍ଟାଲ ରେଗୁଲେସନ ଜୋନ)ଅଧୀନରେ ଯାଉଛି। ସେଥିପ୍ରତି କୌଣସି ଭୂକ୍ଷେପ ନ ଥିବା ପରିଲକ୍ଷିତ ହେଉଛି। ଉକ୍ତ ଅଞ୍ଚଳର ମାଟି ବେଶ ଉର୍ବର ଥିବାରୁ ତାକୁ ଉଚ୍ଚା ମୂଲ୍ୟରେ ବିକ୍ରି କରୁଛନ୍ତି। ଏପରିକି କେତେଜଣ ନିଜ ଜମିରୁ ମଧ୍ୟ ମାଟି ଖୋଳି ବିକୁଥିବା ଜଣାପଡ଼ିଛି। ଉକ୍ତ ଜାଗାକୁ ଅଧିଗ୍ରହଣ କରିବା ପାଇଁ ଯେଉଁ କମ୍ପାନୀ ଇଡ୍କୋ ପାଖରେ ଆବେଦନ କରିଛି, ତାହା ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି ବୋଲି ବିଶେଷ ସୂତ୍ରରୁ ଜଣାପଡ଼ିଛି। ଏହା କାର୍ଯ୍ୟକାରୀ ହେଲେ ସମ୍ପୃକ୍ତ କମ୍ପାନୀ ସେହି ଅଞ୍ଚଳକୁ ଭରଣା କରିବାକୁ ମଧ୍ୟ ଅର୍ଥ ଖର୍ଚ୍ଚ କରିବ। କମ୍ପାନୀ ନେବା ପୂର୍ବରୁ ସେଥିରୁ କିଛି ରୋଜଗାର କରିବା ପାଇଁ ଏବେ ଅଘୋଷିତ ପ୍ରତିଯୋଗିତା ଚାଲିଛି।