ଲଡର୍ସ, ୧୩।୮- ଲଡର୍ସ ଟେଷ୍ଟ ପ୍ରଥମ ଦିନରେ ମାତ୍ର ୩ ଉଇକେଟ ପଡ଼ିଥିବାବେଳେ ଦ୍ୱିତୀୟ ଦିନ ପଡ଼ିଛି ୧୦ ଉଇକେଟ। ପୂରା ଦିନରେ ବୋଲରମାନେ ରାଜୁତି କରିଥିଲେ। ଅସମାପ୍ତ ପ୍ରଥମ ଇନିଂସ ସ୍କୋର (୨୭୬/୩)ରୁ ବ୍ୟାଟିଂ ଆରମ୍ଭ କରିଥିବା ଟିମ୍ ଇଣ୍ଡିଆ ୩୬୪ ରନ୍ରେ ଅଲଆଉଟ୍ ହୋଇଥିଲା। ମାତ୍ର ୮୮ ରନ୍ରେ ଭାରତୀୟ ଦଳ ଅନ୍ତିମ ୭ ଉଇକେଟ ହରାଇଥିଲା। ଜିମ୍ମି ଆଣ୍ଡରସନ ୫ ଉଇକେଟ ସଫଳତା ହାତେଇଥିଲେ। ଜବାବରେ ଇଂଲଣ୍ଡକୁ ଆରମ୍ଭରୁ ଲଗାତାର ଦୁଇଟି ଝଟ୍କା ଦେଇଥିଲେ ଭାରତୀୟ ପେସର ମହମ୍ମଦ ସିରାଜ। ଏହାପରେ ଜୋ ରୁଟ୍ (୪୮) ଓ ରୋରି ବନର୍ସ ୩ୟ ଉଇକେଟ ପାଇଁ ଦଳୀୟ ସ୍କୋରରେ ଯୋଡ଼ିଥିଲେ ୮୫ ରନ୍। ଦିନର ଶେଷ ଆଡ଼କୁ ବନର୍ସ (୪୯)ଙ୍କୁ ପ୍ୟାଭେଲିଅନ ପଠାଇଥିଲେ ମହମ୍ମଦ ଶାମି। ଦ୍ୱିତୀୟ ଦିନ ଶେଷ ସୁଦ୍ଧା ଇଂଲଣ୍ଡ ୩ ଉଇକେଟ ହରାଇ ୧୧୯ ରନ୍ କରିଛି। ଘରୋଇ ଦଳ ଭାରତ ଠାରୁ ୨୪୫ ରନ୍ ପଛରେ ଥିବାବେଳେ ହାତରେ ଅଛି ୭ ଉଇକେଟ।
