ଦାରିଙ୍ଗବାଡ଼ି,୫ା୧(ଅରୁଣ ସାହୁ): ଓଡ଼ିଶାର କଶ୍ମୀର ଦାରିଙ୍ଗବାଡ଼ିକୁ ଦୈନିକ ହଜାର ସଂଖ୍ୟାରେ ପର୍ଯ୍ୟଟକ ଆସୁଛନ୍ତି। ଆଉ କିଛି ଦିନ ପରେ ଏଠାରେ ଆରମ୍ଭ ହେବ ଶୀତ ମହୋତ୍ସବ। ଏନେଇ ସ୍ଥାନୀୟ ଓ ଜିଲା ପ୍ରଶାସନ ଜୋରଦାର ପ୍ରସ୍ତୁତି ଚଳାଇଛନ୍ତି। ଦାରିଙ୍ଗବାଡ଼ି ଏହି ମହୋତ୍ସବ ପାଇଁ ସଜେଇ ହେବ ବୋଲି ଜନସାଧାରଣ ଆଶା ରଖିଛନ୍ତି। ହେଲେ ଦାରିଙ୍ଗବାଡ଼ିକୁ କେବଳ ପର୍ଯ୍ୟଟକ ଆସନ୍ତି ତାହା ନୁହଁ, ଦାରିଙ୍ଗବାଡ଼ି ବଜାର ଉପରେ ୨୫ଟି ପଞ୍ଚାୟତର ବାସିନ୍ଦା ନିର୍ଭର କରିଥାନ୍ତି। ତେବେ ଦାରିଙ୍ଗବାଡ଼ି ୪ ଛକ ଉପରେ ଅଞ୍ଚଳବାସୀ ସମେତ ବଜାର ବାସିନ୍ଦା ନିର୍ଭର କରୁଛନ୍ତି।
ପର୍ଯ୍ୟଟକଙ୍କ ଆଗମନକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ‘ଆଇ ଲଭ୍ ଦାରିଙ୍ଗବାଡ଼ି’ଏକ ସୁନ୍ଦର ସାଇନ ବୋର୍ଡ ଆଲୁଅ ସହ ସ୍ଥାପନ କରାଯାଇଛି। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଫାଟକକୁ ଲାଗି ଏହି ସାଇନ୍ବୋର୍ଡ ଟି ରହିଥିବା ବେଳେ ତାକୁ ଡମ୍ପିୟାର୍ଡ ଭାବେ ସ୍ଥାନୀୟ ବାସିନ୍ଦା ବ୍ୟବହାର କରୁଥିବାବେଳେ ଦାରିଙ୍ଗବାଡ଼ିକୁ ଆସୁଥିବା ଜନସାଧାରଣ ମଧ୍ୟ ବସ୍କୁ ଅପେକ୍ଷା କରିବା ପାଇଁ ସେଠାରେ ବିଶ୍ରାମଗାର ଭାବେ ବ୍ୟବହାର କରୁଛନ୍ତି। ଏଥିସହିତ ଅଳିଆ ଆବର୍ଜନା, ପ୍ଲାଷ୍ଟିକ, ପଲିଥିନ ଆଦି ପକାଇ ପରିବେଶକୁ ଦୂଷିତ କରିଥାନ୍ତି। ସେହିପରି ଉକ୍ତ ସାଇନବୋର୍ଡ ସମ୍ମୁଖରେ ଉଠା ଦୋକାନୀମାନେ ବିଭିନ୍ନ ଦୋକାନ ଖୋଲି ଭିଡ଼ ଜମାଇଥାନ୍ତି। ଫଳରେ ସୌନ୍ଦର୍ଯ୍ୟ ଦିଶିବା ବଦଳରେ ଉକ୍ତ ଭିଡ଼ ମଧ୍ୟରେ ସାଇନବୋର୍ଡଟି ଲୁଚିଯାଉଛି ଏହାକୁ ନେଇ ବିଭିନ୍ନ ମହଲରେ ନିନ୍ଦା କରାଯାଇଥିଲେ ସୁଦ୍ଧା ପ୍ରଶାସନର ଦୃଷ୍ଟି ଆଢୁଆଳରେ ଆଇ ଲଭ ଦାରିଙ୍ଗବାଡ଼ି ସାଇନ୍ବୋର୍ଡଟି ରହିଯାଇଥିବା ଚର୍ଚ୍ଚା ହେଉଛି। ଏଥିପ୍ରତି ସ୍ଥାନୀୟ ପ୍ରଶାସନ ଦୃଷ୍ଟି ଦେବାକୁ ଦାବି ହୋଇଛି।
