dhana gacha - paddy field submerged in water
ଭଦ୍ରକ ଅଫିସ, ୧୬।୧୨: ଭଦ୍ରକ ଜିଲାରେ ‘ଜଓ୍ବାଦ’ ପ୍ରଭାବରେ ବର୍ଷା ଯୋଗୁ ପ୍ରାୟ ୬୫ ହଜାର ହେକ୍ଟର ଜମିରେ ଧାନ ଚାଷ କ୍ଷତିଗ୍ରସ୍ତ ହୋଇଥିବା ଜିଲା କୃଷି ବିଭାଗ ପ୍ରାଥମିକ ଆକଳନ କରିଛି। ୭ ବ୍ଲକର ୧୯୬ ପଞ୍ଚାୟତ ଓ ୩ ପୌରାଞ୍ଚଳର ୧୧୮୩ ଗାଁ ପ୍ରଭାବିତ ହୋଇଥିବା କୃଷି ବିଭାଗ ପକ୍ଷରୁ ଜିଲା ପ୍ରଶାସନକୁ କ୍ଷତି ଦର୍ଶାଯାଇଛି। ଭଦ୍ରକ ବ୍ଲକର ୧୬୪ ଗାଁର ୫୬୫୦ ହେକ୍ଟର, ତିହିଡ଼ି ବ୍ଲକର ୧୩୦ ଗାଁର ୭୬୦୦, ବାସୁଦେବପୁର ବ୍ଲକର ୬୫ ଗାଁର ୯୮୨୦, ଚାନ୍ଦବାଲି ବ୍ଲକର ୨୯୧ ଗାଁର ୨୮,୫୪୦, ଧାମନଗର ବ୍ଲକର ୧୫୨ ଗାଁର ୨୨୮୦, ଭଣ୍ଡାରିପୋଖରୀ ବ୍ଲକର ୧୭୬ ଗାଁର ୭୦୧୫ ଓ ବନ୍ତ ବ୍ଲକର ୨୦୫ ଗାଁର ୧୮୮୫ ହେକ୍ଟର ଚାଷଜମି କ୍ଷତିଗ୍ରସ୍ତ ହୋଇଛି। ପ୍ରଶାସନ ପକ୍ଷରୁ ଆକଳନ ଏହି କ୍ଷୟକ୍ଷତି ରିପୋର୍ଟ ରାଜ୍ୟ ସରକାରଙ୍କୁ ପ୍ରଦାନ କରାଯାଇଥିବା ଜିଲାପାଳ ତ୍ରିଲୋଚନ ମାଝି ସୂଚନା ଦେଇଛନ୍ତି।