ଭଦ୍ରକ/ତିହିଡ଼ି,୧୩ା୧୧(ସନାତନ ରାଉତ/ସଞ୍ଜିତ ବଳ)-ଦୀପାବଳିରେ ବାଣ ଫୁଟାଇବା ବେଳେ ଭଦ୍ରକ ଜିଲାର ବିଭିନ୍ନ ସ୍ଥାନରେ ବିସ୍ଫୋରଣରେ ୨ଜଣ ପାପୁଲି ହରାଇଥିବା ବେଳେ ୯ଜଣ ଆହତ ହୋଇଛନ୍ତି। ସେହିପରି ପୁରୁଣାବଜାର ଥାନା ଅଧୀନ ଶଙ୍କରପୁର ସାହିରେ ଘର ଉପରେ ରକେଟ୍ ବାଣ ପଡ଼ି ଗୁଲାମ ରବାନୀଙ୍କ ୨ ବଖରା ଘର ଜଳିଯାଇଛି। ତିହିଡ଼ି ଥାନା ଅଧୀନ ମୁକୁନ୍ଦପୁର ପଞ୍ଚାୟତ ଆରସାଡିହ ଗ୍ରାମର ପୂର୍ଣ୍ଣଚନ୍ଦ୍ର ରାଉତ(୧୬) ଓ ପୀରହାଟ ଥାନା ବାମନବିନ୍ଧା ପଞ୍ଚାୟତ କାନପୁର ଗ୍ରାମର ଗଣେଶ୍ୱର ବେହେରା(୩୬) ବାଣ ଫୁଟାଇବା ବେଳେ ତାଙ୍କ ହାତରେ ବାଣ ଫୁଟି ପାପୁଲି ନଷ୍ଟ ହୋଇଯାଇଛି। ସେହିପରି ଅଚକ ପଞ୍ଚାୟତ ନନ୍ଦପୁର ଗ୍ରାମର ଚକ୍ରଧର ମହାରଣା(୨୨)ଙ୍କର ଆଙ୍ଗୁଳି ଓ ଉତ୍ତରବାହା ଗ୍ରାମର ସତ୍ୟକାନ୍ତ ସାହୁ(୨୨)ଙ୍କର ପାପୁଲି ପୋଡ଼ିଯାଇଛି। ୪ଆହତଙ୍କୁ କଟକ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଛି। ୯ ଆହତ ହେଲେ ବନ୍ତ ବ୍ଲକ ସରମରା ଗ୍ରାମର ରଶ୍ମିରଞ୍ଜନ ନାୟକ(୧୨), ଧାମନଗର ବ୍ଲକ ଜାହାଙ୍ଗୀର ଗ୍ରାମର ଅମୂଲ୍ୟ କୁମାର ସେଠୀ, ବାସୁଦେବପୁର ବ୍ଲକ ସୁଗୋର ପୁଚୁ ନାୟକ, ଭଦ୍ରକ ବ୍ଲକ ଅଧୀନ କେଦାରପୁର ପଞ୍ଚାୟତ ଜିତାନଗା ଗ୍ରାମର ଅଂଶୁମାନ ସାହୁ, ଚରମ୍ପା ଗୁଣ୍ଠୁଣିଆ ବଜାରର ଶଶୀକାନ୍ତ ନାୟକ, ଦୋଳସାହିର ଆଦିତ୍ୟ ନାଥ ଓ ଭଦ୍ରକ ବ୍ଲକ ନଛିପୁରର ଲିପ୍ସା ବିଶ୍ୱାଳ। ସେମାନଙ୍କ ମଧ୍ୟରୁ ଅଂଶୁମାନ ଓ ଆଦିତ୍ୟ କଟକ ବଡ଼ ଡାକ୍ତରଖାନାରେ ଭର୍ତ୍ତି ହୋଇଛନ୍ତି।