ଖଲ୍ଲିକୋଟ,୧୮ା୧(ପ୍ରଶାନ୍ତ କୁମାର ମିଶ୍ର): ଗଞ୍ଜାମ ଜିଲା ଖଲ୍ଲିକୋଟ ବସ୍ଷ୍ଟାଣ୍ଡରୁ ମଙ୍ଗଳବାର ରାତିରେ ଚୋରି ହୋଇଥିବା ଶିଶୁପୁତ୍ରକୁ ପୋଲିସ ଭୁବନେଶ୍ୱରରୁ ଗୁରୁବାର ଉଦ୍ଧାର କରିଛି। ତା’ ସହିତ ଅନ୍ୟ ଏକ ଶିଶୁଙ୍କୁ ମଧ୍ୟ ଉଦ୍ଧାର କରାଯାଇଛି। ଶିଶୁ ଚୋରି କରିଥିବା ମହିଳାଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି।
ମଳିଥିବା ସୂଚନା ମୁତାବକ, ଖଲ୍ଲିକୋଟ ବ୍ଲକ ବାଣିଆ ଗ୍ରାମର ସ୍ବାମୀ ପରିତ୍ୟକ୍ତା ମହିଳା ମାମା ଗୌଡ଼ ତାଙ୍କ ମା’ଙ୍କ ସହ ନିଜର ୧୦ ମାସର ଶିଶୁପୁତ୍ରକୁ ଧରି ବସ୍ଷ୍ଟାଣ୍ଡଠାରେ ଥିବା ଏକ ଲୁଗା ଦୋକାନ ବାରଣ୍ଡାରେ ରାତିରେ ଶୋଇଥିଲେ। ବୁଧବାର ସକାଳୁ ଉଠି ଦେଖିବା ବେଳକୁ ଶିଶୁପୁତ୍ର ନ ଥିଲା। ଖଲ୍ଲିକୋଟ ପୋଲିସ ସିସିଟିଭି ଫୁଟେଜ ଯାଞ୍ଚ କରିଥିଲା।
ତାଙ୍କ ନିକଟରେ ଶୋଇଥିବା ଆଉ ଜଣେ ମହିଳା ପିଲାଟିକୁ କାନ୍ଧରେ ପକାଇ ଭୋର ୫ଟା ୨୦ରେ ନେଇ ଯାଉଥିବା ସିସିଟିଭିରେ ଦେଖିବାକୁ ମିଳିଥିଲା। ପୋଲିସର ଏକ ଟିମ୍ ସିସିଟିଭି ଫୁଟେଜ୍କୁ ଆଧାର କରି ତାରସିଂ ଥାନା ଅନ୍ତର୍ଗତ ରଙ୍ଗମେରୁ ହାନନ୍ଦ ଖୋଳା ଗ୍ରାମରେ ପହଞ୍ଚତ୍ଥିଲେ। ଚୋରି କରିଥିବା ମହିଳାଙ୍କ ନାମ ପ୍ରଭାସିନୀ ପ୍ରଧାନ ବୋଲି ଜାଣିବାକୁ ପାଇଥିଲେ। ତାଙ୍କ ମୋବାଇଲ ଫୋନ୍କୁ ଟ୍ରାକ କରିବାରୁ ସେ ଭୁବନେଶ୍ୱରର ସୁନ୍ଦରପଦାରେ ଥିବା ଜଣାପଡ଼ିଥିଲା। ପୋଲିସ ସୁନ୍ଦରପଦାରେ ପହଞ୍ଚତ୍ ପ୍ରଭାସିନୀଙ୍କୁ ଗିରଫ କରିବା ସହ ଶିଶୁପୁତ୍ରକୁ ଉଦ୍ଧାର କରିଥିଲା। ଏହାପରେ ତାଙ୍କଠାରୁ ସୂଚନା ପାଇ ନିକଟରେ ରହୁଥିବା ପୂଜକ ସୁବାଷ ପଣ୍ଡାଙ୍କ ଠାରୁ ଏକ ଶିଶୁକନ୍ୟାକୁ ଉଦ୍ଧାର କରିଥିଲା।