ନୂଆଦିଲ୍ଲୀ,୧୨।୧୧: ଟି୨୦ ଦଳର ନେତୃତ୍ୱ ଛାଡ଼ି ସାରିଥିବା ବିରାଟ କୋହଲି ଅନ୍ୟ ଫର୍ମାଟରେ ମଧ୍ୟ ଅଧିନାୟକ ପଦ ଛାଡ଼ି ପାରନ୍ତି। ସେ ବ୍ୟାଟିଂ ଉପରେ ଧ୍ୟାନ ଦେବା ପାଇଁ ଅଧିନାୟକ ପଦ ଛାଡ଼ି ପାରନ୍ତି। ଏଭଳି କରିବାରେ ପ୍ରଥମ ଖେଳାଳି ନୁହେଁ। ଅନେକ ମହାନ ଖେଳାଳି ବ୍ୟାଟିଂ ପାଇଁ ଅଧିନାୟକ ପଦ ଛାଡ଼ିଛନ୍ତି। ଅଧିନାୟକ କୋହଲିଙ୍କ ଭବିଷ୍ୟତ ଉପରେ ଏଭଳି କହିଛନ୍ତି ଭାରତୀୟ ଦଳର ପୂର୍ବତନ ମୁଖ୍ୟ କୋଚ୍ ରବି ଶାସ୍ତ୍ରୀ।
ଟି୨୦ ବିଶ୍ୱକପ୍ରୁ ଭାରତୀୟ ଦଳର ବିଦାୟ ସହ ଶାସ୍ତ୍ରୀଙ୍କ କାର୍ଯ୍ୟକାଳ ଶେଷ ହୋଇଛି। ଦୀର୍ଘ ଦିନ ହେଲା କରୋନା କାରଣରୁ ବାୟୋ ବବଲରେ ରହି ଥକି ପଡ଼ିଥିବା କୋହଲିଙ୍କୁ ନ୍ୟୁଜିଲାଣ୍ଡ ବିପକ୍ଷ ଟି୨୦ ସିରିଜ୍ ଓ ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ରୁ ବିଶ୍ରାମ ଦିଆଯାଇଛି।
ଶାସ୍ତ୍ରୀଙ୍କୁ ପଚରାଯାଇଥିଲା, କାର୍ଯ୍ୟଭାର ହ୍ରାସ କରିବା ପାଇଁ କୋହଲି ଅନ୍ୟ ଫର୍ମାଟରେ ଅଧିନାୟକ ପଦ ଛାଡ଼ିପାରନ୍ତି କି?
ଏହାର ଉତ୍ତରରେ ଶାସ୍ତ୍ରୀ କହିଥିଲେ, ରେଡ୍ ବଲ କ୍ରିକେଟରେ ଟିମ୍ ଇଣ୍ଡିଆ କୋହଲିଙ୍କ ନେତୃତ୍ୱରେ ଗତ ୫ ବର୍ଷ ହେଲା ଶୀର୍ଷରେ ଅଛି। ଏଣୁ ନିକଟ ଭବିଷ୍ୟତରେ କୋହଲି ଟେଷ୍ଟ ଅଧିନାୟକ ପଦ ଛାଡ଼ିବେ ନାହିଁ। କିନ୍ତୁ ଅଧିନାୟକ ପଦ ସହ ଅତ୍ୟଧିକ ଚାପ ଯୋଡ଼ିହୋଇ ରହିଥିବାରୁ ଏହା ଘଟିପାରେ। ଦିନିକିଆ ଫର୍ମାଟରେ ସମାନ ସମ୍ଭାବନା ଅଛି। ଟେଷ୍ଟ ଅଧିନାୟକ ଉପରେ ଧ୍ୟାନ ଦେବା ପାଇଁ ସେ ହ୍ବାଇଟ୍ ବଲରେ ନେତୃତ୍ୱ ଛାଡ଼ିପାରନ୍ତି। ଏହି ନିଷ୍ପତ୍ତି ସମ୍ପୂର୍ଣ୍ଣ ତାଙ୍କ ଉପରେ ନିର୍ଭର କରେ। ସେ ପ୍ରଥମ ଖେଳାଳି ଭାବେ ବ୍ୟାଟିଂ ପାଇଁ ଅଧିନାୟକ ପଦ ଛାଡ଼ିବାକୁ ଯାଉ ନାହାନ୍ତି। ଅନେକ ସଫଳ ଖେଳାଳି ଏଭଳି କରିଛନ୍ତି।
