ଲୋଇସିଂହା,୧୨।୯(ଡି.ଏନ.ଏ.): ଅନ୍ୟଜାତିରେ କରିଥିଲେ ପ୍ରେମ ବିବାହ। ଏବେ ତାଙ୍କର ଏକ ୨ ବର୍ଷର ପିଲା ଅଛି। ପୁଣି ଗର୍ଭବତୀ ଅଛନ୍ତି ସ୍ତ୍ରୀ। ନିଜ ଘର ଅଥବା ଶଶୁର ଘର ଲୋକେ ଏହି ବିବାହକୁ ସ୍ବୀକୃତି ଦେଇ ନ ଥିବାରୁ ବାହାରେ ସ୍ତ୍ରୀ ପିଲାଙ୍କୁ ନେଇ ରହୁଥିଲେ। ନୂଆଁଖାଇ ପାଇଁ ଶନିବାର ପିଲାଙ୍କୁ ଧରି ବଲାଙ୍ଗୀର ଜିଲା ଲୋଇସିଂହା ଥାନା ତଥା ଆଗଲପୁର ବ୍ଲକ ଡୁଡୁକା ଶାନ୍ତି ନଗରସ୍ଥିତ ଘରକୁ ଫେରିଥିଲେ ସମ୍ପୃକ୍ତ ଯୁବକ ଜଣକ। ହେଲେ ଘର ଲୋକେ ତାଙ୍କୁ ପୂରାଇ ନ ଥିଲେ। ଗାଳିଗୁଲଜ କରି ବିଦା କରି ଦେଇଥିଲେ। ଶେଷରେ ଜଣେ ପଡୋଶୀଙ୍କ ଘରେ ରହିଥିଲେ। ଅନ୍ୟପକ୍ଷେ ଜୀବନପ୍ରତି ବିପଦ ଥିବା ନେଇ ଲୋଇସିଂହା ପୋଲିସକୁ ଖବର ଦେଇଥିଲେ। ପୋଲିସ ରବିବାର ସେମାନଙ୍କୁ ଆଣି ଥାନା ଆଭ୍ୟର୍ଥନା ଗୃହରେ ରଖିଛି। ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
