ପାଟନା, ୩୧।୮: ଫେସ୍ବୁକ୍ରୁ ଆରମ୍ଭ ହୋଇଥିଲା ବନ୍ଧୁତ୍ୱ। ଏହାପରେ ଏହା ପ୍ରେମକୁ ରୂପାନ୍ତରିତ ହୋଇଥିଲା। ପରିବର୍ତ୍ତନଶୀଳ ଦୁନିଆରେ ଏବଂ ଡିଜିଟାଲ ଦୁନିଆରେ ଏହା ଏକ ସାଧାରଣ କଥା। କିନ୍ତୁ ବିହାରର ପାଟନାରେ ଏମିତି ଏକ ବିବାହ ଅନୁଷ୍ଠିତ ହୋଇଯାଇଛି ଯାହା ସମସ୍ତଙ୍କ ଚକିତ କରିଦେଇଛି। ଗୁଜରାଟରେ ହୀରା ବ୍ୟବସାୟ କରୁଥିବା ଜଣେ ବ୍ୟକ୍ତିଙ୍କ ଝିଅ ଚାର୍ଟାଡ ଆକାଉଣ୍ଟାଟ୍ ପାଠ ପଢ଼ୁଥିବା ଆକାଶ ନାମକ ଜଣେ ଦିବ୍ୟାଙ୍ଗ ଯୁବକଙ୍କୁ ବିବାହ କରିଛନ୍ତି। ବିବାହ କରିବା ପାଇଁ ଯୁବତୀଜଣଙ୍କ ଗୁଜରାଟରୁ ଆକାଶଙ୍କ ଘର ପାଟନାକୁ ପଳାଇ ଆସିଥିଲେ। ରବିବାର ରାତିରେ ପାଟନା ଗାନ୍ଧୀ ମଇଦାନ ପୋଲିସ ଷ୍ଟେସନ ନିକଟସ୍ଥ ଏକ ମନ୍ଦିରରେ ଯୁବତୀଜଣଙ୍କ ନିଜର ଦିବ୍ୟଙ୍ଗ ପ୍ରେମିକଙ୍କ ସହ ବିବାହ ବନ୍ଧନରେ ଆବଦ୍ଧ ହୋଇଥିଲେ। ଏହାପରେ ପୁଅ ଘର ପକ୍ଷରୁ ନବଦମ୍ପତ୍ତିଙ୍କୁ ଆଶୀର୍ବାଦ ପ୍ରଦାନ କରାଯାଇଥିଲା। କିନ୍ତୁ ଠିକ୍ ଏତିକିବେଳେ ସବୁକିଛି ଓଲଟପାଲଟ ହୋଇଯାଇଥିଲା। ଗୁଜରାଟ ପୋଲିସ ଓ ପାଟନା ପୋଲିସ ମିଳିତଭାବେ ଘଟଣାସ୍ଥଳରେ ପହଞ୍ଚି ପ୍ରେମୀ ଯୁଗଳଙ୍କୁ ଗିରଫ କରିଥିଲେ। ଏହାପରେ ଉଭୟଙ୍କ ସ୍ଥାନୀୟ କଦମକୁଅଁା ଥାନାକୁ ନିଆଯାଇଥିଲା। ଯେଉଁଠାରୁ ଗୁଜରାଟ ପୋଲିସ ପ୍ରେମୀ ଯୁଗଳଙ୍କୁ ବିମାନରେ ନେଇ ପଳାଇଥିଲା। କମଦକୁଅଁା ଥାନା ଅଧିକାରୀ କହିଛନ୍ତି, ଝିଅକୁ ନେଇ ପଳାଇ ଆସିଥିବା ଅଭିଯୋଗରେ ପ୍ରେମିକ ଆକାଶଙ୍କ ନାମରେ ପ୍ରେମିକାଙ୍କ ବାପା ତଥା ହୀରା ବ୍ୟବସାୟୀ ଗୁଜରାଟ ପୋଲିସ ନିକଟରେ ମାମଲା ରୁଜୁ କରିଥିଲେ। ଝିଅ ନାବାଳିକା ଥିବା ଅଭିଯୋଗରେ କୁହାଯାଇଛି। ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।