ଓ୍ବାଶିଂଟନ, ୧୪।୯: ହରର୍ ତଥା ଭୟଙ୍କର ଫିଲ୍ମ ଦେଖିବାକୁ ପସନ୍ଦ କରୁଥିବା ବ୍ୟକ୍ତିଙ୍କ ପାଇଁ ଆସିଛି ଟଙ୍କା ଆୟ କରିବାର ଏକ ସୁଯୋଗ। ଆମେରିକାର ପ୍ରତିଷ୍ଠିତ କମ୍ପାନୀ ଫାଇନାନ୍ସବଜ୍ କିଛି ହରର୍ ଫିଲ୍ମ ଦେଖିବା ଲାଗି ୧,୩୦୦ ଆମେରିକୀୟ ଡଲାର ଦେବାକୁ ପ୍ରସ୍ତୁତ। ଭାରତୀୟ ମୂଦ୍ରାରେ ଏହାର ମୂଲ୍ୟ ୯୫,୮୦୦ ଟଙ୍କା।
ଫାଇନାନ୍ସବଜ କମ୍ପାନୀ ଏବେ ହରର୍ ଫିଲ୍ମ ହାର୍ଟରେଟ୍ ଆନାଲିଷ୍ଟ ଖୋଜୁଛି। ଏହି ଆନାଲିଷ୍ଟଙ୍କ କାମ ହେଲା ଫିଟ୍ବିଟ୍ (ସ୍ମାର୍ଟଓ୍ବାଚ୍) ପିନ୍ଧି ଅକ୍ଟୋବର ମାସରେ ୧୩ ଭୟଙ୍କର ଫିଲ୍ମ ଦେଖିବା। ଏପର୍ଯ୍ୟନ୍ତ ନିର୍ମାଣ ହୋଇଥିବା ୧୩ ଭୟଙ୍କର ଫିଲ୍ମ ଦେଖିଲା ବେଳେ ଫିଟ୍ବିଟ୍ ଦେଖଣାହାରୀଙ୍କ ହୃଦ ସ୍ପନ୍ଦନ ମାପିବ ବୋଲି ଫାଇନାନ୍ସ କମ୍ପାନୀ ପକ୍ଷରୁ କୁହାଯାଇଛି।
ଫିଲ୍ମର ବଜେଟ ଭ୍ୟୁୟର୍ସଙ୍କ ଉପରେ କିଛି ପ୍ରଭାବ ପକାଉଛି କି ନାହିଁ ଜାଣିବା ପାଇଁ ଏହି ପ୍ରୟୋଗ କରାଯାଉଥିବା କମ୍ପାନୀ ପକ୍ଷରୁ ଜାରି କରାଯାଇଥିବା ବିବୃତିରେ କୁହାଯାଇଛି। ଏଣୁ କମ୍ପାନୀ ପକ୍ଷରୁ ପଦବୀ ପାଇଁ ଦିଆଯାଇଛି ବିଜ୍ଞାପନ। ”ଜଣେ ହରର୍ ଫିଲ୍ମ ପ୍ରେମୀ ଆବଶ୍ୟକ ଅଛି। ପ୍ରାର୍ଥୀଙ୍କ ପାଖରେ ୧୩ ଭୟଙ୍କର ଫିଲ୍ମ ଦେଖିବା ପାଇଁ ସାହାସ ଥିବା ଦରକାର। କମ୍ ବଜେଟରେ ପ୍ରସ୍ତୁତ ହରର ଫିଲ୍ମଠାରୁ ହାଇ ବଜେଟ ହରର୍ ଫିଲ୍ମ ଅଧିକ ଭୟଙ୍କର କି, ଜାଣିବା ପାଇଁ ଏହି ପ୍ରୟୋଗ କରାଯାଉଛି। ଆମେ ହରର ଫିଲ୍ମ ହାର୍ଟ ରେଟ୍ ଆନାଲିଷ୍ଟଙ୍କୁ ୧,୩୦୦ ଡଲାର ଦେବୁ ଓ ହୃଦ ସ୍ପନ୍ଦନ ଜାଣିବା ପାଇଁ ଫିଟ୍ବିଟ୍ ପଠାଇବୁ“ ବୋଲି କମ୍ପାନୀ ପକ୍ଷରୁ କୁହାଯାଇଛି।
