ମିରଟ: ମିସ୍ କଲରୁ ସୃଷ୍ଟି ହୋଇଥିଲା ପ୍ରେମ। ପରେ ଘଟଣା ପହଞ୍ଚିଥିଲା ଥାନାରେ। ପ୍ରାୟ ୩ ବର୍ଷ ପ୍ରେମସମ୍ପର୍କ ପରେ ପ୍ରେମିକ ପ୍ରେମିକାକୁ ବିବାହ କରିଦେବାକୁ ମନା କରିବାରୁ ପ୍ରେମିକା ଜଣକ ହଙ୍ଗାମା କରିଥିଲେ। ଫଳରେ ମାମଲା ଥାନାକୁ ଯାଇଥିଲା। ପୋଲିସ ଅଭିଯୁକ୍ତକୁ ହାଜତକୁ ପଠାଇଥିଲା। ଏହା ପରେ ପ୍ରେମିକ ଜଣକ ବିବାହ ପାଇଁ ରାଜି ହୋଇଯିବାରୁ ମାମଲାର ଅନ୍ତ ଘଟିଥିଲା।
ଏପରି ଘଟଣା ଘଟିଛି ଆଜମଗଢ଼ର ସଞ୍ଜରପୁରସ୍ଥିତ ଭବନଗାଓ୍ବା ନିବାସୀ ପୁନମଙ୍କ କ୍ଷେତ୍ରରେ। ସେ ବର୍ତ୍ତମାନ ମିରଟର ଶିବଶକ୍ତି ନଗରରେ ରହୁଛନ୍ତି। ପ୍ରାୟ ୩ ବର୍ଷ ତଳେ ଏକ ମିସ୍ କଲ୍ରୁ ତାଙ୍କ ଭଓ୍ବାନାର କୌଲ ଗ୍ରାମ ନିବାସୀ ମନୀଷଙ୍କ ସହ ପ୍ରେମ ହୋଇଥିଲା। ମନୀଷ ପେସାରେ ଜଣେ ବିଦ୍ୟୁତ ମରାମତି କର୍ମଚାରୀ। ମିରଟରୁ ଜିନିଷପତ୍ର ଆଣିବା ପାଇଁ ଯିବା ସମୟରେ ଦୁହିଁଙ୍କ ମଧ୍ୟରେ ସାକ୍ଷାତ ହୋଇଥିଲା। ପୁନମ ଯେତେବେଳେ ବିବାହ କରିବାକୁ ଜିଦ୍ ଧରିଲେ ମନୀଷ ମନା କରିଦେଲେ। ମଙ୍ଗଳବାର ଅପରାହ୍ନରେ ପୁନମ ମନୀଷଙ୍କ ଘରେ ପହଞ୍ଚି ବିବାହ କରିବାକୁ କହିଲେ। ମନୀଷ ମନା କରିବାରୁ ପୁନମ ୧୧୨କୁ କଲ୍ କରିଥିଲେ। ଫଳରେ ପୋଲିସ ଘଟଣାସ୍ଥଳରେ ପହଞ୍ଚି ମନୀଷ ସମେତ ଉଭୟ ପକ୍ଷ ଥାନାକୁ ନେଇଥିଲା। ଦୁଇପକ୍ଷଙ୍କ ମଧ୍ୟରେ କିଛି ଘଣ୍ଟା ଧରି ଥାନା ମଧ୍ୟରେ ଗଣ୍ଡଗୋଳ ହୋଇଥିଲା। ଦୀର୍ଘ ସମୟ ପରେ ମନୀଷ ପୁନମଙ୍କୁ ବିବାହ କରିବାକୁ ରାଜି ହୋଇଥିଲେ। ଏହା ପରେ ଦୁଇଜଣ ଶିବମନ୍ଦିରରେ ପହଞ୍ଚି ଜଣେ ଜଣଙ୍କୁ ବରଣମାଳା ପିନ୍ଧାଇଥିଲେ। ଏସ୍ଓ ସତୀଶ କୁହନ୍ତି, ଦୁଇପକ୍ଷ ବିବାହ କରିବାକୁ ରାଜି ହୋଇଥିବା ଲିଖିତ ଆକାରରେ ଦେଇଛନ୍ତି। ପ୍ରେମୀଯୁଗଳଙ୍କ ବିବାହ ପରେ ବନ୍ଧୁପରିଜନମାନେ ଆଶୀର୍ବାଦ ମଧ୍ୟ ଦେଇଛନ୍ତି।
