ଭାରତୀୟ କ୍ରିକେଟର ରୋହିତ ଶର୍ମା ଡିସେମ୍ବର ୧୩ରେ ନିଜର ୫ମ ବିବାହ ବାର୍ଷିକୀ ପାଳନ କରିଥିଲେ। ୧୩ ଡିସେମ୍ବର ୨୦୧୫ରେ ରୋହିତ ରିତିକା ସଜଦେବଙ୍କୁ ବିବାହ କରିଥିଲେ। ଏହି ଖେଳାଳିଙ୍କୁ ତାଙ୍କର ବିବାହ ବାର୍ଷିକୀ ଅବସରରେ ସୋସିଆଲ ମିଡିଆରେ ବହୁତ ଶୁଭେଚ୍ଛା ମିଳିଥିଲା।
ଖେଳ ପଡ଼ିଆରେ ରୋହିତଙ୍କ ରେକର୍ଡ ବିଷୟରେ ଅଳ୍ପ ବହୁତ ପ୍ରାୟ ସମସ୍ତେ ଜାଣନ୍ତି। ମାତ୍ର ପଡ଼ିଆରେ ବିପକ୍ଷ ଦଳକୁ ପଛରେ ପକାଇ ଦେଉଥିବା ରୋହିତ କିନ୍ତୁ ସ୍ତ୍ରୀ ରିତିକାଙ୍କ ଆଗରେ ଦୁର୍ବଳ ପଡ଼ିଯାଆନ୍ତି।
ଏହି ସୁନ୍ଦର ଦମ୍ପତିଙ୍କ ପ୍ରେମ କାହାଣୀ ବିବାହର ୬ ବର୍ଷ ପୂର୍ବରୁ ଆରମ୍ଭ ହୋଇଥିଲା। ରିତିକା ଯେତେବେଳେ ଜଣେ ସ୍ପେର୍ଟସ ମ୍ୟାନେଜର ଥିଲେ ସେତେବେଳେ ରୋହିତ ଖେଳରେ ବହୁତ ବ୍ୟସ୍ତ ଥିଲେ। ଏହି ସମୟରେ ଉଭୟଙ୍କ ମଧ୍ୟରେ ସାକ୍ଷାତ ହୋଇଥିଲା।
ରିତିକା ହେଉଛନ୍ତ, କ୍ରିକେଟର ଯୁବରାଜ ସିଂହଙ୍କ ରାକ୍ଷୀ ଭଉଣୀ। ଯୁବରାଜ ହିଁ ରୋହିତ ଏବଂ ରିତିକାଙ୍କୁ ଭେଟ କରାଇଥିଲେ। ଏହା ପରଠାରୁ କାମକୁ ନେଇ ଉଭୟ ସବୁବେଳେ ସମ୍ପର୍କରେ ରହିଲେ। ପରେ ଏହି ସାକ୍ଷାତ ବନ୍ଧୁତ୍ୱ, ପ୍ରେମ ଏବଂ ଶେଷରେ ବିବାହରେ ପରିଣତ ହେଲା। ତେବେ ରୋହିତ ଏବଂ ରିତିକାଙ୍କ ଲଭ୍ ଷ୍ଟୋରୀ କୌଣସି ଫିଲ୍ମ ଠାରୁ କମ୍ ନୁହେଁ। କାରଣ ରୋହିତ ରିତିକାଙ୍କୁ ଫିଲ୍ମ ଷ୍ଟାଇଲରେ ପ୍ରପୋଜ କରିଥିଲେ।
ରୋହିତ ମୁମ୍ବାଇର ବୋରିଭାଲି ସ୍ପୋର୍ଟସ କ୍ଲବରେ ଆଣ୍ଠୁରେ ବସି ହାତରେ ମୁଦି ଧରି ରିତିକାଙ୍କୁ ପ୍ରପୋଜ କରିଥିଲେ। ସଙ୍ଗେ ସଙ୍ଗେ ରିତିକା ରୋହିତଙ୍କ ପ୍ରପୋଜକୁ ସ୍ବୀକାର କରିଥିଲେ। ଏହାପରେ ସେମାନେ ବିବାହ କରିଥିଲେ। ବିବାହର ୩ ବର୍ଷ ପରେ ଏହି ଦମ୍ପତିଙ୍କର ଏକ କନ୍ୟା ସନ୍ତାନ ହୋଇଥିଲା। ତାଙ୍କ ନାମ ହେଉଛି ସମାୟରା।
ଏକ ସାକ୍ଷାତକାରରେ ରୋହିତ କହିଥିଲେ ଯେ, ଯୁବରାଜ ଯେତେବେଳେ ସେମାନଙ୍କ ପ୍ରେମ ସମ୍ପର୍କ ବିଷୟରେ ଜାଣିଲେ ଧମକ ଦେଇ କହିଥିଲେ, କିଛି କରିବା ପୂର୍ବରୁ ମନେରଖ ରିତିକା ହେଉଛି ମୋର ଭଉଣୀ। ଏହା ପରେ ରୋହିତ ରିତିକାଙ୍କୁ ବିବାହ କରିବାକୁ ଚାହୁଁଥିବା ଯୁବରାଜଙ୍କୁ କହିଥିଲେ।