ନୂଆଦିଲ୍ଲୀ, ୨୩।୭: ସୁରେଶ ରାଇନା। ଭାରତୀୟ ସୀମିତ ଓଭର କ୍ରିକେଟ୍ ଦଳର ଜଣେ ନିର୍ଭରଯୋଗ୍ୟ ବ୍ୟାଟ୍ସମ୍ୟାନ। ନିଜର ଆକ୍ରମଣାତ୍ମକ ବ୍ୟାଟିଂ ଶୈଳୀ ସାଙ୍ଗକୁ ଚମତ୍କାର ଫିଲ୍ଡିଂ ଲାଗି ବିଶ୍ୱ କ୍ରିକେଟ୍ରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। କରୋନା ମହାମାରୀ ସତ୍ତ୍ୱେ ଉତ୍ତର ପ୍ରଦେଶର ଏହି ୩୩ ବର୍ଷୀୟ ବାମହାତୀ ବ୍ୟାଟ୍ସମ୍ୟାନ ଜାତୀୟ ଦଳକୁ ପୁଣିଥରେ ପ୍ରତ୍ୟାବର୍ତ୍ତନ କରିବା ଲାଗି ଜୋର୍ଦାର ଅଭ୍ୟାସ ଜାରି ରଖିଛନ୍ତି। ସାଥୀ ଖେଳାଳି ରିଷଭ ପନ୍ତଙ୍କ ସହ ଏକାଠି ଅଭ୍ୟାସ କରୁଥିବାର ଭିଡିଓ ସୋସିଆଲ ମିଡିଆରେ ଭାଇରାଲ୍ ହୋଇଛି। ତେବେ ଅନେକ ହୁଏତ ‘ମିଷ୍ଟର ଆଇପିଏଲ୍’ ଭାବେ ପରିଚିତ ରାଇନାଙ୍କ ଲଭ୍ ଷ୍ଟୋରୀ ବିଷୟରେ ଜାଣି ନ ଥିବେ। ବୋଲରଙ୍କୁ ନିର୍ଦ୍ଧୁମ ପ୍ରହାର କରି ବଲ୍କୁ ବାଉଣ୍ଡାରୀ ବାହାରକୁ ପଠାଉଥିବା ରାଇନାଙ୍କୁ ଇଞ୍ଜିନିୟର ଚାକିରି କରିଥିବା ଜଣେ ଯୁବତୀ କ୍ଲିନ୍ ବୋଲ୍ଡ କରିଦେଇଥିଲେ। ଏହି ଯୁବତୀଙ୍କ ନାମ ପ୍ରିୟଙ୍କା ଚୌଧୁରୀ। ୩ ଅପ୍ରେଲ ୨୦୧୫ରେ ରାଇନା ଓ ପ୍ରିୟଙ୍କା ବିବାହ ବନ୍ଧନରେ ଆବଦ୍ଧ ହୋଇଥିଲେ।
ଲଭ୍ ଷ୍ଟୋରୀ ବହୁତ ପୁରୁଣା। ରାଇନାଙ୍କ ପିତା ତ୍ରିଲୋକଚନ୍ଦ ଭାରତୀୟ ସେନାର ଜଣେ କର୍ମଚାରୀ। ସେହିଭଳି ପ୍ରିୟଙ୍କାଙ୍କ ବାପା ସତ୍ପାଲ ଶର୍ମା ମୁରାଦ ନଗରରେ ଏକ କଲେଜରେ ଶିକ୍ଷା ଦାନ କରୁଥିବା ସହ ପିଲାଙ୍କୁ ଖେଳ ମଧ୍ୟ ଶିଖାଉଥିଲେ। ରାଇନା ତାଙ୍କ ପିଲାଦିନେ ସତ୍ପାଲଙ୍କଠାରୁ ଟ୍ରେନିଂ ନେଇଥିଲେ। ସେହି ସମୟରେ ହିଁ ଉଭୟ ରାଇନା ଓ ପ୍ରିୟଙ୍କାଙ୍କ ମଧ୍ୟରେ ବନ୍ଧୁତ୍ୱ ସୃଷ୍ଟି ହୋଇଥିଲା। ଯାହାକି ପରେ ଭଲପାଇବାରେ ପରିବର୍ତ୍ତନ ହୋଇଯାଇଥିଲା ଏବଂ ୨୦୧୫ରେ ଦୁହେଁ ବିବାହ ବନ୍ଧନରେ ଆବଦ୍ଧ ହୋଇଥିଲେ। ବିବାହ ପୂର୍ବରୁ ପ୍ରିୟଙ୍କା ନେଦରଲାଣ୍ଡସରେ ବ୍ୟାଙ୍କିଙ୍ଗ୍ ସେକ୍ଟରରେ କାମ କରୁଥିଲେ। ଇଞ୍ଜିନିୟରିଂ କରିବା ପରେ ସେ ଆଇଟି ପ୍ରଫେଶନାଲ ଭାବେ କ୍ୟାରିୟର ଆରମ୍ଭ କରିଥିଲେ। ତାଙ୍କର ମାସିକ ପାରିଶ୍ରମିକ ଲକ୍ଷାଧିକ ଟଙ୍କା ଥିଲା ବୋଲି କୁହାଯାଉଛି। କିନ୍ତୁ ରାଇନାଙ୍କ ସହ ଭାରତରେ ରହିବା ପାଇଁ ପ୍ରିୟଙ୍କା ଶେଷରେ ଚାକିରି ଛାଡ଼ି ସ୍ବଦେଶ ପଳାଇ ଆସିଥିଲେ। ରାଇନା ଓ ପ୍ରିୟଙ୍କାଙ୍କର ଗ୍ରାସିଆ ନାମରେ ଏକ କନ୍ୟା ସନ୍ତାନ ରହିଛି। ଗ୍ରାସିଆଙ୍କ ନାମରେ ପ୍ରିୟଙ୍କା ଏକ ଚ୍ୟାରିଟି ଫାଉଣ୍ଡେସନ ଖୋଲି ଗରିବ ଓ ଅସହାୟ ମହିଳାଙ୍କୁ ସହାୟତା କରୁଛନ୍ତି।
