ଭୁବନେଶ୍ୱର,୧୮।୩: ତ୍ରିକୋଣୀୟ ପ୍ରେମ ସମ୍ପର୍କକୁ ନେଇ ଲକ୍ଷ୍ମୀସାଗର ଥାନା ଅଞ୍ଚଳରେ ହୋଇଥିବା ହତ୍ୟା ମାମଲାରେ ଅଭିଯୁକ୍ତଙ୍କୁ ବାନ୍ଧିଛି ପୋଲିସ। ଅଞ୍ଜନ ବେହେରା ହତ୍ୟା ମାମଲାରେ ଲକ୍ଷ୍ମୀସାଗର ପୋଲିସ ଭୁବନେଶ୍ୱରର ସାଲିଆ ସାହି ବସ୍ତିରୁ କାହ୍ନା ପ୍ରଧାନ ଏବଂ ନିହାରିକାଙ୍କୁ ଗିରଫ କରିଛି। ସେମାନଙ୍କ ନିକଟରୁ ରକ୍ତ ଜୁଡୁବୁଡୁ ଧାରୁଆ ଅସ୍ତ୍ର ମଧ୍ୟ ଉଦ୍ଧାର କରାଯାଇଛି। ଏହି ଅପରାଧରେ ସମ୍ପୃକ୍ତ ଥିବା ଅନ୍ୟ ଚାରିଜଣଙ୍କୁ ଧରିବା ପାଇଁ ପୋଲିସ ଉଦ୍ୟମ କରୁଥିବା ଭୁବନେଶ୍ୱର ଡିସିପି ପ୍ରତୀକ ସିଂ ସୂଚନା ଦେଇଛନ୍ତି।
ସେ କହିଛନ୍ତି, “ଏହି ପ୍ରେମୀଯୁଗଳ ଗୌତମଙ୍କୁ ହତ୍ୟା ପାଇଁ ଷଡଯନ୍ତ୍ର କରିଥିଲେ, ଯିଏ ନିହାରିକାଙ୍କୁ ପୁର୍ବରୁ ପ୍ରେମ କରୁଥିଲେ। ଖବର ଅନୁଯାୟୀ, ମାର୍ଚ୍ଚ ୧୬ ରାତିରେ ଏହି ତ୍ରିକୋଣୀୟ ପ୍ରେମ କାହାଣୀରେ ବଳି ପଡିଥିତେ ଅଞ୍ଜନ। ଲକ୍ଷ୍ମୀସାଗର ଥାନାରେ ଅଞ୍ଜନଙ୍କ ମା’ଙ୍କ ଅଭିଯୋଗକୁ ଭିତ୍ତି କରି ହତ୍ୟା ମାମଲାର ତଦନ୍ତ ଆରମ୍ଭ ହୋଇଥିଲା।
ଅନୁସନ୍ଧାନ ବେଳେ ଅଞ୍ଜନ ବେହେରା ଏକ କ୍ୟାଟରିଂ କମ୍ପାନୀ ସହ କାମ କରୁଥିବା ପୋଲିସ ଜାଣିବାକୁ ପାଇଛି। ତାଙ୍କ ସହକର୍ମୀ ଗୌତମ, ସ୍କୁଲ ଦିନରୁ ଭୁବନେଶ୍ୱରର ଏକାମ୍ର କଲେଜର ଯୁକ୍ତ-୩ ଦ୍ୱିତୀୟ ବର୍ଷର ଛାତ୍ରୀ ନିହାରିକାଙ୍କୁ ଏକ ପାଖିଆ ଭଲ ପାଉଥିଲେ। ଅନ୍ୟପଟେ ନିହାରିକା କାହ୍ନା ପ୍ରଧାନଙ୍କ ସହିତ ପ୍ରେମ ସମ୍ପର୍କରେ ଥିଲେ। ତେବେ ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମରେ ଗୌତମ ପଠାଉଥିବା ମେସେଜ୍ର କୌଣସି ପ୍ରତିକ୍ରିୟା ଦେଇନଥିଲେ ନିହାରିକା।
ତେବେ ମାର୍ଚ୍ଚ ୧୫ ରେ, ନିହାରିକା ପରୀକ୍ଷା ପାଇଁ କଲେଜ ଯାଇଥିଲେ। ଯେଉଁଠି ସେ ପରୀକ୍ଷାରେ ଦେଇ ଫେରୁଥିବାବେଳେ ଗୌତମ ତାଙ୍କୁ ଅଟକାଇ ପ୍ରେମ ପାଇଁ ପୁନର୍ବାର ନିବେଦନ କରିଥିଲେ ଯାହା ଫଳରେ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଏହାପରେ ନିହାରିକା କାହ୍ନା ପ୍ରଧାନ ଛଦ୍ମନାମ ପିଙ୍କୁଙ୍କୁ ଆସି ଏହି ଘଟଣା ବିଷୟରେ କହିଥିଲେ। ଏଥିରେ ପ୍ରତିକ୍ରିୟାଶୀଳ ହୋଇ ପିଙ୍କୁ ଗୌତମଙ୍କୁ କଥା ହେବା ପାଇଁ ଡାକିଥିଲେ।
ଘଟଣା ଦିନ ରାତିରେ ଗୌତମ ଏବଂ ତାଙ୍କ ସାଙ୍ଗ ଅଞ୍ଜନ, ସୁବାଷ ଏବଂ ଦୀପକ ପ୍ରଧାନ ଜଟଣୀରେ କାମରୁ ଫେରୁଥିଲେ। କାହ୍ନା, ନିହାରିକା ଏବଂ ଅନ୍ୟ ଚାରିଜଣ ସେମାନଙ୍କୁ ଟାନ୍ତାମଣିଶ୍ୱର ରାସ୍ତାରେ ଅଟକାଇଥିଲେ। ଏହାପରେ ସେମାନେ ଗୌତମ ସହ ଯୁକ୍ତିତର୍କ କରିଥିଲେ। ଯେତେବେଳେ ଅଞ୍ଜନ ଏହାକୁ ବନ୍ଦ କରିବାକୁ ଚେଷ୍ଟା କରିଥିଲେ, ସେତେବେଳେ କାହ୍ନା ପ୍ରଧାନ ତାଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ। କାନ୍ଧରେ ଗଭୀର ଆଘାତ ଲାଗି ଅଞ୍ଜନ ତଳେ ପଡିଯାଇଥିଲେ ଏବଂ ଅନ୍ୟମାନେ ଘଟଣାସ୍ଥଳରୁ ଖସିଯିବାରେ ସଫଳ ହୋଇଥିଲେ। ଏହାପରେ ଅଞ୍ଜନଙ୍କୁ ଡାକ୍ତରଖାନା ନିଆଯାଇଥିଲା ଯେଉଁଠାରେ ଅତ୍ୟଧିକ ରକ୍ତସ୍ରାବ ହେତୁ ତାଙ୍କର ମୃତ୍ୟୁ ଘଟିଥିଲା ବୋଲି ଡିସିପି କହିଛନ୍ତି। ହତ୍ୟା ମାମଲାରେ ସମସ୍ତ ଅଭିଯୁକ୍ତଙ୍କୁ ଖୋଜିବା ପାଇଁ ଏକ ସୱତନ୍ତ୍ର ଟିମ ଗଠନ କରାଯାଇଥିଲା। ଅନୁସନ୍ଧାନରୁ ଜଣାପଡିଛି ଯେ ପୂର୍ବରୁ ଦୁଇଟି ଚୋରି ମାମଲାରେ କାହ୍ନ ପ୍ରଧାନଙ୍କୁ ଗିରଫ ହୋଇଥିଲେ।
