ବେଜିଂ: ପ୍ରେମୀଯୁଗଳ ସବୁବେଳେ ଏକାଠି ସମୟ ଅତିବାହିତ କରିବାକୁ ପସନ୍ଦ କରିଥାନ୍ତି। ତେବେ ଯଦି କୌଣସି ପ୍ରେମୀଯୁଗଳ ପରସ୍ପରଠାରୁ ବହୁ ଦୂରରେ ରହୁଥାନ୍ତି, ତେବେ ସେମାନେ ସବୁବେଳେ ପରସ୍ପରକୁ ଦେଖାହେବା ସମ୍ଭବ ହୋଇ ନ ଥାଏ। ଏପରି କ୍ଷେତ୍ରରେ ଚାଇନା ଏପରି ଏକ ଯନ୍ତ୍ର ପ୍ରସ୍ତୁତ କରିଛି, ଯାହାଦ୍ୱାରା କି ପ୍ରେମୀ ଯୁଗଳ ଦୂରରେ ରହୁଥିଲେ ମଧ୍ୟ ସେମାନେ ଉକ୍ତ ଯନ୍ତ୍ର ସାହାଯ୍ୟରେ ପରସ୍ପରକୁ କିସ୍ କରିପାରିବେ। ଏହି ଯନ୍ତ୍ରକୁ କିସିଂ ଡିଭାଇସ୍ ବୋଲି କୁହାଯାଉଛି। ରିପୋର୍ଟ ମୁତାବକ, ଏହି ଡିଭାଇସ୍ରେ ଏକ ସିଲିକନ୍ ଓଠ ଲାଗିଛି। ସେଥିରେ କିସ୍ କଲେ ତାହା ପ୍ରକୃତ କିସ୍ ଭଳି ଲାଗିବ। ତାହା ଆମ ଶରୀରର ଚାପ, ତାପ ଅନୁସାରେ କାମ କରିବ। ସେଥିପାଇଁ ସେହି ଡିଭାଇସ୍କୁ ଫୋନ ସହ ସଂଯୋଗ କରିବାକୁ ପଡ଼ିବ ଏବଂ ଫୋନ୍ରେ ଏକ ଆପ୍ ଡାଉନ୍ଲୋଡ୍ କରିବାକୁ ପଡ଼ିବ। ନିଜ ପ୍ରେମିକା କିମ୍ବା ପ୍ରେମିକ ସହ ଭିଡିଓ କଲ୍ରେ କଥା ହେବା ସମୟରେ ସେମାନେ କିସ୍ କରିପାରିବେ ବୋଲି ପ୍ରସ୍ତୁତକାରୀ ଜିଆଙ୍ଗ ଝୋଙ୍ଗ୍ଲି କହିଛନ୍ତି। ଏହା ପୂର୍ବରୁ ମାଲେସିଆ ୨୦୧୬ରେ ଏଭଳି ଏକ ଡିଭାଇସ୍ ପ୍ରସ୍ତୁତ କରିଥିବା ଜଣାପଡ଼ିଛି।