ଚମ୍ପୁଆ, ୨୬ା୭(ଡି.ଏନ.ଏ.)- କେନ୍ଦୁଝର ଜିଲା ହେଉଛି ଏକ କୃଷିବହୁଳ ଜିଲା। ଚମ୍ପୁଆରେ ଚଳିତ ବର୍ଷ ସ୍ବଳ୍ପ ବୃଷ୍ଟିପାତ ଯୋଗୁ ଚାଷ କାର୍ଯ୍ୟ ବାଧାପ୍ରାପ୍ତ ହୋଇଥିବା ଦେଖିବାକୁ ମିଳିଛି। ଚମ୍ପୁଆ, ଯୋଡା ଓ ଝୁମ୍ପୁରାକୁ ନେଇ ଗଠିତ ଏହି କୃଷି ଜିଲାରେ ଚଳିତ ବର୍ଷ ରହିଥିବା ଲକ୍ଷ୍ୟ ଅନୁଯାୟୀ ମାତ୍ର ୪୪ ଭାଗ ଚାଷ ହୋଇଥିବା ଜଣାଯାଇଛି। ବୃଷିପାତର ଅନିୟମିତତା ପାଇଁ ଚଳିତ ବର୍ଷ ବୁଣା ଅପେକ୍ଷା ତଳି ରୁଆ ଚାଷକୁ ଚାଷୀ ଗୁରୁତ୍ୱ ଦେଇଛନ୍ତି। ମାତ୍ର ବର୍ଷା ଅଭାବ କାରଣରୁ ତଳି ପଡ଼ିଥିବା ଜମିଗୁଡିକ ଫାଟିବା ଆରମ୍ଭ କଲାଣି। ଜୁଲାଇ ୨୧ ତାରିଖ ରିପୋର୍ଟ ଅନୁଯାୟୀ ଚଳିତ ବର୍ଷ କୃଷି ବିଭାଗ ପକ୍ଷରୁ ଚମ୍ପୁଆ ବ୍ଲକରେ ୧୪, ୨୦୦ ହେକ୍ଟର, ଝୁମ୍ପୁରାରେ ୧୮,୫୫୫ ହେକ୍ଟର ଓ ଯୋଡ଼ାରେ ୮,୨୬୦ ହେକ୍ଟରକୁ ମିଶାଇ ମୋଟ ୪୧,୦୧୫ ହେକ୍ଟର ଧାନ ଚାଷ ଲକ୍ଷ୍ୟ ରଖାଯାଇଥିଲା। ମାତ୍ର ବର୍ତ୍ତମାନ ସୁଦ୍ଧା ଏହା ୨୦,୨୫୬ ହେକ୍ଟର ଜମିରେ ଚାଷ କରାଯାଇଥିବା ଜଣାଯାଇଛି। ସେହିପରି ଅନ୍ୟ ଚାଷ ମଧ୍ୟ ଏଥିରେ ପ୍ରଭାବିତ ହୋଇଛି। ଏହି ସୂଚନା ମୁତାବକ ଚମ୍ପୁଆରେ ୫୩%, ଝୁମ୍ପୁରାରେ ୫୬% ଓ ଯୋଡାରେ ୫୮% ଚାଷ କରାଯାଇଛି। ସ୍ବଳ୍ପ ବୃଷ୍ଟିପାତ ଏହି ଚାଷ ପ୍ରଭାବିତ ହେବାର ମୁଖ୍ୟ କାରଣ ସାଜିଥିବା ବେଳେ ଆଗାମୀ ଦିନରେ ବର୍ଷା ନ ହେଲେ ରୁଆ ହୋଇଥିବା ତଳିଗୁଡିକ ନଷ୍ଟ ହୋଇଯିବ ବୋଲି ଚାଷୀମାନେ ସୂଚନା ଦେଇଛନ୍ତି। ଏ ସମ୍ପର୍କରେ ବିଭାଗୀୟ ଅଧିକାରୀ ଗଜେନ୍ଦ୍ର ନାଥ ଗୋଚ୍ଛାୟତଙ୍କୁ ପଚାରିବାରୁ ସ୍ବଳ୍ପ ବୃଷ୍ଟିପାତ ହିଁ ଚାଷ ପ୍ରଭାବିତ ହେବାର ଏକ ମାତ୍ର କାରଣ ସାଜିଛି। ଚାଷ ସମ୍ବନ୍ଧୀୟ ସମସ୍ତ ସୂଚନା ଆମେ ଉପରିସ୍ଥ ବିଭାଗକୁ ଜଣାଇଛୁ। ତୁରନ୍ତ ଏଥିପ୍ରତି ପଦକ୍ଷେପ ନିଆଯିବ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।