ଲଣ୍ଡନ,୨୮।୮: ଖାଦ୍ୟରେ ଲୁଣର ମାତ୍ରା କମ୍ କରିବା ବା କମ୍ ଲୁଣଯୁକ୍ତ ଖାଦ୍ୟ ଖାଇବା ହୃଦରୋଗ ସମସ୍ୟାକୁ ୨୦% କମାଇଥାଏ ବୋଲି ଏକ ଅଧ୍ୟୟନରୁ ଜଣାପଡ଼ିଛି। ଦି ଗାଡିୟାନ୍ ଆର୍ଲି ସଣ୍ଡେର ରିପୋର୍ଟ ଅନୁସାରେ ଅଧିକ ଲୁଣ ଖାଉଥିବା ଲୋକଙ୍କ ତୁଳନାରେ ଆଦୌ ଲୁଣ ଖାଉନଥିବା ଲୋକଙ୍କ ହୃଦ୍ରୋଗ ଆଶଙ୍କା ପ୍ରାୟ ୧୮% କମ୍ ହୋଇଥାଏ। ଏହି ରିପୋର୍ଟରେ ଏକଥା ମଧ୍ୟ ପ୍ରକାଶ ହୋଇଛି, ଗତ ଦଶନ୍ଧି ଠାରୁ ଏହି ରୋଗ ସମସ୍ୟାରେ ପ୍ରାୟ ୫୦% ବୃଦ୍ଧି ଘଟିଛି, ଯାହା ବର୍ତ୍ତମାନ ୧.୫ ନିୟୁତରେ ପହଞ୍ଚିଛି। ଅଧିକ ଲୁଣଯୁକ୍ତ ଖାଦ୍ୟ ଖାଇବା ଦ୍ୱାରା ହୃଦ୍ସ୍ପନ୍ଦନ ଅନିୟମିତ ଭାବେ ବଢ଼ିଥାଏ।
ଏଭଳି ଲୋକଙ୍କୁ ଅନ୍ୟମାନଙ୍କ ତୁଳନାରେ ହୃଦ୍ରୋଗ ହେବାର ଆଶଙ୍କା ୫ ଗୁଣ ବୃଦ୍ଧି ଘଟିଥାଏ। ସେହିପରି କମ୍ ଲୁଣ ଖାଉଥିବା ଲୋକଙ୍କ ମଧ୍ୟରେ ହୃଦ୍ରୋଗ ସମସ୍ୟା ଆଶଙ୍କା ମଧ୍ୟ କମ୍ ହୋଇଥାଏ ବୋଲି ଏହି ରିପୋର୍ଟରେ କୁହାଯାଇଛି। ବ୍ରିଟେନ୍ର ବାଇଓବ୍ୟାଙ୍କ ନାମକ ଏକ ସଂସ୍ଥା ପକ୍ଷରୁ ୨୦୦୬ ରୁ ୨୦୧୦ ମଧ୍ୟରେ ଏନେଇ ଏକ ଅଧ୍ୟୟନ କରାଯାଇଥିଲା। ଏଥିରେ ୪୦ରୁ ୭୦ ବର୍ଷର ପ୍ରାୟ ୫ ଲକ୍ଷ ଲୋକଙ୍କୁ ସାମିଲ କରାଯାଇଥିଲା। ଏଥିରେ ସାମିଲ ହୋଇଥିବା ଲୋକେ ଆଦୌ ଲୁଣ ବ୍ୟବହାର ନ କରିବା, ବେଳେବେଳେ ତଥା ସବୁବେଳେ ବ୍ୟବହାର କରୁଥିବା ନେଇ ନିଜ ମତ ରଖିଥିଲେ। ଗତ ୧୧ବର୍ଷ ମଧ୍ୟରେ ଲୁଣ ବ୍ୟବହାର କରିବା ପରେ ଏହା ସେମାନଙ୍କ ସ୍ବାସ୍ଥ୍ୟ ଉପରେ କିପରି ପ୍ରଭାବ ପକାଇଛି ସେନେଇ ଅଧ୍ୟୟନ କରାଯାଇଥିଲା। ଏଥିରୁ ଏକଥା ଜଣାପଡ଼ିଥିଲା, ଯେଉଁମାନେ ଖାଦ୍ୟରେ ଆଦୌ ଲୁଣ ବ୍ୟବହାର କରୁନାହାନ୍ତି ସେମାନଙ୍କୁ ହୃଦରୋଗ ହେବାର ଆଶଙ୍କା ପ୍ରାୟ ୨୦% କମ୍ ରହୁଛି।