ଭୁବନେଶ୍ୱର, ୨୧।୯(ବ୍ୟୁରୋ): କରୋନା ଯୋଗୁ ଗତ ଦୁଇବର୍ଷ ପାଠପଢ଼ା ବ୍ୟାପକ କ୍ଷତି ହୋଇଥିଲା। ଏହି କ୍ଷତିକୁ ଭରଣା କରିବା ପାଇଁ ଗଣଶିକ୍ଷା ବିଭାଗ ଚେଷ୍ଟା ଜାରି ରଖିଛି। ପିଲା କିପରି ପୂର୍ବପରି ପାଠପଢ଼ାରେ ଧ୍ୟାନ ଦେବେ, ଦୁଇବର୍ଷ ପଢ଼ି ନ ଥିବା ପୁରୁଣା ପାଠ କିପରି ଶିଖିପାରିବେ, ସେଥିପାଇଁ ବିଭାଗ ପ୍ରସ୍ତୁତି ଚଳାଇଛି। ଚଳିତ ଶିକ୍ଷାବର୍ଷ ଆରମ୍ଭରୁ ପ୍ରଥମେ ଲର୍ନିଂ ଏନ୍ହାନ୍ସମେଣ୍ଟ ପ୍ରୋଗ୍ରାମ କରାଗଲା। ଆଉ ଏବେ ଗଣଶିକ୍ଷା ବିଭାଗ ଲର୍ନିଂ ରିକଭରି ପ୍ରୋଗ୍ରାମ (ଏଲ୍ଆର୍ପି) ଆସନ୍ତା ୨୯ ତାରିଖରେ ଲାଗୁ କରିବାକୁ ଯାଉଛି। ସ୍କୁଲ ପିଲାଙ୍କ ନିମନ୍ତେ ଆରମ୍ଭ ହେବାକୁ ଥିବା ଏହି ଏଲ୍ଆର୍ପି ଲାଗି ଓଡ଼ିଶା ବିଦ୍ୟାଳୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ (ଓସେପା) ପକ୍ଷରୁ ବ୍ଲ୍ୟୁ ପ୍ରିଣ୍ଟ ପ୍ରସ୍ତୁତ ହୋଇସାରିଛି। ୨୯ ତାରିଖରୁ ପିଲାମାନେ ପୁରୁଣା ପାଠ ପଢ଼ିବେ। କରୋନା ସକାଶେ ଦୁଇବର୍ଷର ଶିକ୍ଷାରେ ଯେଉଁ କ୍ଷତି ହୋଇଥିଲା, ତାକୁ ଭରଣା କରିବାକୁ ଏଲ୍ଆର୍ପି ଜରିଆରେ ଛାତ୍ରୀଛାତ୍ରମାନେ ଏକ୍ସଟ୍ରା (ଅତିରିକ୍ତ) କ୍ଲାସରେ ପାଠ ପଢ଼ିବେ। ଏଥିପାଇଁ ରାଜ୍ୟ ସରକାର ସ୍ବତନ୍ତ୍ର ପୁସ୍ତିକା ପ୍ରସ୍ତୁତ କରିଛନ୍ତି। ଦୁଇଟି ଘରୋଇ ସଂସ୍ଥା ଦ୍ୱାରା ଶିକ୍ଷାଦାନ କରାଯିବ। ପ୍ରତିଦିନ ଦୁଇଟି ଅତିରିକ୍ତ କ୍ଲାସ ହେବ। କରୋନା ସମୟରେ ଛାତ୍ରୀଛାତ୍ରମାନେ ପୁରୁଣା ପାଠ କେତେ ପଢ଼ିଛନ୍ତି, ତାହା ଜାଣିବା ପାଇଁ ବେସ୍ ଲାଇନ ଟେଷ୍ଟ ହେବ। ଯେଉଁ ଛାତ୍ରୀଛାତ୍ର ଏଥିରେ ବିଫଳ ହେବେ, ସେମାନଙ୍କୁ ଅତିରିକ୍ତ କ୍ଲାସ ଜରିଆରେ ୨ଟି ସଂସ୍ଥା ପାଠ ପଢ଼ାଇବାକୁ ନିଷ୍ପତ୍ତି ହୋଇଛି। ସେହି ୨ ସଂସ୍ଥା ହେଲେ ଓଡ଼ିଶା ନଲେଜ କର୍ପୋରେଶନ ଲିମିଟେଡ୍ ଏବଂ ଶୁଭଦ୍ରା ଚ୍ୟାରିଟେବଲ୍ ଟ୍ରଷ୍ଟ। ଏହି କାର୍ଯ୍ୟକ୍ରମ ପାଇଁ ୭୨କୋଟି ଟଙ୍କାର ବଜେଟ ପ୍ରସ୍ତୁତ ହୋଇଛି।
ସୂଚନାନୁଯାୟୀ, ରାଜ୍ୟର ୫୫,୭୪୫ ସରକାରୀ ଓ ସରକାରୀ ଅନୁଦାନପ୍ରାପ୍ତ ସ୍କୁଲରେ ଏଲ୍ଆର୍ପି ହେବ। ଶିକ୍ଷାଦାନ ପାଇଁ ଦୁଇଟି ଘରୋଇ ସଂସ୍ଥା ମଧ୍ୟରେ ସମାନ ଭାବେ ଜିଲାଗୁଡ଼ିକ ବଣ୍ଟାଯାଇଛି। ତିନି ମାସ ଭିତରେ ଏହି ପ୍ରୋଗ୍ରାମ ସରିବ। ଏ ସମ୍ପର୍କରେ ଓସେପା ରାଜ୍ୟ ପ୍ରକଳ୍ପ ନିର୍ଦ୍ଦେଶକ ଅନୁପମ ଶାହ କହିଛନ୍ତି, ଏହି କାର୍ଯ୍ୟକ୍ରମ ପାଇଁ ସବୁ ପୁସ୍ତକ ପ୍ରିଣ୍ଟ ହୋଇସାରିଛି। ତୃତୀୟ ଶ୍ରେଣୀ ଛାତ୍ରୀଛାତ୍ରଙ୍କ ଲାଗି ଓଡ଼ିଆ, ଗଣିତ ଓ ପରିବେଶ ବିଜ୍ଞାନ କ୍ଲାସ୍ ହେବ। ସେହିପରି ଚତୁର୍ଥରୁ ନବମ ଶ୍ରେଣୀ ଛାତ୍ରୀଛାତ୍ରଙ୍କୁ ଗଣିତ, ଇଂଲିଶ ଓ ବିଜ୍ଞାନ ପାଠ ପଢ଼ାଯିବ। ଏଥିଲାଗି ଆସନ୍ତା ୨୨ ତାରିଖରୁ ଶିକ୍ଷକମାନଙ୍କୁ ପ୍ରଶିକ୍ଷଣ ଦିଆଯିବ। ୨୭ ତାରିଖ ସୁଦ୍ଧା ପ୍ରଶିକ୍ଷଣ ଶେଷ ହେବାର ଯୋଜନା ରହିଛି। ଦିନିକିଆ ସ୍କୁଲ ପରିଚାଳନା ବୈଠକ ସହ ଅଭିଭାବକ ଓ ଶିକ୍ଷକଙ୍କ ବୈଠକ ଜରିଆରେ ଏଲ୍ଆର୍ପି ନେଇ ସଚେତନ କରାଯିବ। ଜିଲା ଶିକ୍ଷାଧିକାରୀ ଓ ବ୍ଲକ ଶିକ୍ଷାଧିକାରୀଙ୍କ ଦ୍ୱାରା ଦୁଇଟି ମନିଟରିଂ ଟିମ୍ ଗଠନ କରାଯାଇ କାର୍ଯ୍ୟକ୍ରମର ସଫଳ ରୂପାୟନ ଦିଗରେ ତଦାରଖ କରାଯିବ।