ଘରେ ଶାନ୍ତି ବଜାୟ ରହିବା ସହ ସୁଖସମୃଦ୍ଧି ବୃଦ୍ଧି କରିବାକୁ କାହାର ବା ଇଚ୍ଛା ନୁହେଁ! ସେଥିପାଇଁ କିଏ କେତେ ପ୍ରକାରର ବିଧିବିଧାନକୁ ଆପଣେଇଥା’ନ୍ତି। ହେଲେ ଜାଣିଛନ୍ତି କି, ବାସ୍ତୁଶାସ୍ତ୍ର ଅନୁସାରେ ଏମିତି ଏକ ଗଛ ଅଛି, ଯାହାକୁ ଘରେ ଲଗାଇବା ଦ୍ୱାରା ଧନବୃଦ୍ଧି ହେବା ସହ ଭାଗ୍ୟ ମଧ୍ୟ ବଦଳି ଯାଇଥାଏ। ସେ ଗଛଟି କ’ଣ ଜାଣନ୍ତି? ତାହା ହେଉଛି ମନିପ୍ଲାଣ୍ଟ। ହେଲେ ଏହି ମନିପ୍ଲାଣ୍ଟକୁ ସଠିକ୍ ଦିଗରେ ଲଗାଇ ଏହାର ଉତ୍ତମ ଯତ୍ନ ନ ନେଲେ ବେଳେବେଳେ ଫଳ ଓଲଟା ବି ମିଳିଥାଏ। ବାସ୍ତୁଶାସ୍ତ୍ର ଅନୁଯାୟୀ, ଗୃହର ଆଗ୍ନେୟ କୋଣରେ ଏହି ବୃକ୍ଷକୁ ଲଗାଇଲେ ଘରେ ସକାରାତ୍ମକ ଶକ୍ତି ବୃଦ୍ଧି ପାଇଥାଏ। ତା’ଛଡ଼ା ଏହି ବୃକ୍ଷକୁ ଏମିତି ଲଗାଇବା ଦରକାର ଯେମିତିକି ଏହାର ଡାଳ ଓ ପତ୍ର ଊର୍ଦ୍ଧ୍ୱଗାମୀ ହୋଇ ବଢ଼ୁଥିବ। ମାଟି ଉପରେ ବା ତଳେ ଏହା ବଢ଼ିଲେ ଗୃହରେ ବାସ୍ତୁ ସମସ୍ୟା ଉପୁଜିଥାଏ ବୋଲି ବିଶ୍ୱାସ କରାଯାଏ। ସେହିପରି ଏହି ଗଛର ପତ୍ର ଯେତେ ସବୁଜ ଶ୍ୟାମଳ ହୋଇ ରହିବ ସେତେ ଭଲ। ତେଣୁ ଯେତେବେଳେ ଉକ୍ତ ଗଛର ପତ୍ର ଶୁଖିଯାଏ ବା ହଳଦିଆ ହୋଇଯାଏ, ସେତେବେଳେ ଏହାକୁ ଛିଣ୍ଡାଇଦେବା ଦରକାର; ନଚେତ୍ ଏହାର କୁ-ପ୍ରଭାବ ଘର ଉପରେ ପଡ଼ିଥାଏ ବୋଲି ବାସ୍ତୁଶାସ୍ତ୍ରରେ ଉଲ୍ଲେଖ ରହିଛି।