ବେଙ୍ଗାଲୁରୁ, ୧୧।୪- ଏମ୍. ଚିନ୍ନାସ୍ବାମୀ ଷ୍ଟାଡିୟମରେ ଅନୁଷ୍ଠିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଏକ ହାଇସ୍କୋରିଂ ମ୍ୟାଚ୍ରେ ଲକ୍ଷ୍ନୌ ସୁପର ଜାଏଣ୍ଟ୍ସ ୧ ଉଇକେଟରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି)କୁ ପରାସ୍ତ କରିଛି। ଆର୍ସିବି ୨୦ ଓଭରରେ ୨ ଉଇକେଟ ହରାଇ ୨୧୨ ରନ୍ କରିଥିଲା। ଜବାବରେ ଲକ୍ଷ୍ନୌ ଦଳ ୨୦ ଓଭରରେ ୯ ଉଇକେଟ ହରାଇ ଶେଷ ବଲ୍ରେ ମ୍ୟାଚ୍ ଜିତି ନେଇଥିଲା। ଲକ୍ଷ୍ନୌର ନିକୋଲସ ପୁରନ ୧୯ ବଲ୍ରୁ ୬୨ ରନ ସଂଗ୍ରହ କରି ଆରସିବି ହାତରୁ ମ୍ୟାଚ ଛଡ଼ାଇ ନେଇଥିଲେ। ଫଳରେ ତାଙ୍କୁ ପ୍ଲେୟର ଅଫ୍ ଦି ମ୍ୟାଚ ପୁରସ୍କାର ପ୍ରଦାନ କରାଯାଇଥିଲା। ବିଜୟ ସହ ଲକ୍ଷ୍ନୌ ପଏଣ୍ଟ ଟେବୁଲର ଶୀର୍ଷକୁ ଉନ୍ନୀତ ହୋଇଛି।
୨୧୩ ରନ୍ ବିଜୟଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଲକ୍ଷ୍ନୌର ଆରମ୍ଭ ଭଲ ହୋଇ ନ ଥିଲା। ଦଳ ୨୩ ରନ୍ ମଧ୍ୟରେ ୩ଟି ଉଇକେଟ ହରାଇ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ତେବେ ମିଡିଲ ଅର୍ଡରରେ ମାର୍କୁସ ଷ୍ଟୋଇନିସ୍ଙ୍କ ଦ୍ରୁତ ଅର୍ଦ୍ଧଶତକ ବଳରେ ଦଳ ଲକ୍ଷ୍ୟପଥକୁ ଫେରିଥିଲା। ଷ୍ଟୋଇନିସ୍ ୩୦ ବଲ୍ରୁ ୬ ଚୌକା ଓ ୫ ଛକା ସହାୟତାରେ ୬୫ ରନ୍ କରି ଏମ୍. ଚିନ୍ନାସ୍ବାମୀ ଷ୍ଟାଡିୟମ ଦର୍ଶକଙ୍କୁ ନୀରବ କରିଦେଇଥିଲେ। ସେ ଆଉଟ ହେବାପରେ ନିକୋଲାସ ପୁରନ ଧୂଆଁଧାର ବ୍ୟାଟିଂ କରି ଦଳକୁ ବିଜୟ ପଥରେ ଅଗ୍ରସର କରାଇଥିଲେ। ମାତ୍ର ୧୫ ବଲ୍ରୁ ଅର୍ଦ୍ଧଶତକ ପୂରଣ କରିଥିବା ପୁରନ ୧୯ ବଲ୍ରୁ ୬୨(୪ ଚୌକା, ୭ ଛକା) ରନ୍ କରିଥିଲେ। ଆୟୁଷ ବଦୋନୀ ଉପଯୋଗୀ ୩୦ ରନ୍ର ଉପଯୋଗୀ ଇନିଂସ ଖେଳିଥିଲେ।