ବାଉଁଶୁଣୀ,୬।୫: ଲକ୍ଡାଉନ ପାଇଁ ଦୋକାନ ବଜାର ବନ୍ଦ ଥିବାରୁ ଏକ ଘରୋଇ ସଂସ୍ଥା ବୌଦ୍ଧ ବ୍ଲକ ଜହ୍ନାପଙ୍କ ଚାରିଶମ୍ଭୁ ଦୁଗ୍ଧ ସମିତିରୁ କ୍ଷୀର ନେବା ପାଇଁ ମନା କରିଦେବାରୁ ଅଭାବନୀୟ ଘଟଣା ଘଟିଛି । ଏହାର ପ୍ରତିବାଦରେ ଗୁରୁବାର କ୍ଷୀର ବିକ୍ରି କରିବାକୁ ଆସିଥିବା ବିଭିନ୍ନ ଅଞ୍ଚଳର ୩୦ ଜଣ ଚାଷୀ ୫୭ ନଂ ଜାତୀୟ ରାଜପଥର ଜହ୍ନାପଙ୍କ ଛକରେ ପ୍ରାୟ ୨୦୦ ଲିଟର କ୍ଷୀର ଢ଼ାଳି ଦେଇଛନ୍ତି।
ସୂଚନାଯୋଗ୍ୟ, ପ୍ରାୟ ୫ ବର୍ଷ ହେଲା ଏହି ସୋସାଇଟି ଓମଫେଡ୍କୁ କ୍ଷୀର ଦେଇ ଆସୁଥିଲା । କିନ୍ତୁ ଗତ ଅଗଷ୍ଟ ମାସରେ ୩ ଦିନର କ୍ଷୀର ନିମ୍ନମାନର ଦର୍ଶାଇବା ଫଳରେ ଚାଷୀମାନେ ଓମଫେଡ୍କୁ କ୍ଷୀର ଦେବାକୁ ମନା କରିଦେଲେ । ପରେ ଏକ ଘରୋଇ ସଂସ୍ଥାକୁ କ୍ଷୀର ଦେଇ ଆସୁଥିଲେ । କରୋନାର ଦ୍ରୁତ ସଂକ୍ରମଣକୁ ରୋକିବା ପାଇଁ ରାଜ୍ୟ ସରକାର ୫ ତାରିଖରୁ ଲକ୍ଡାଉନ ଘୋଷଣା କରିଛନ୍ତି। ଫଳରେ ଦୋକାନ ବଜାର ବନ୍ଦ ଯୋଗୁ ଉକ୍ତ ଘରୋଇ ସଂସ୍ଥା କ୍ଷୀର ନେବାକୁ ମନା କରିଦେବାରୁ ୫ ତାରିଖରେ ସୋସାଇଟିର ସମ୍ପାଦକ ଶୁଭ୍ରାଂଶୁ ଶେଖର ମିଶ୍ର ବୌଦ୍ଧ ଜିଲାପାଳଙ୍କୁ ଭେଟି ଥିଲେ । ଜିଲାପାଳ ସିଡିଭିଓଙ୍କୁ କହି ଏହାର ପ୍ରତିକାର ବ୍ୟବସ୍ଥା କରିବେ ବୋଲି କହିଥିଲେ । ମାତ୍ର କୌଣସି ବ୍ୟବସ୍ଥା ନ ହେବାରୁ ବାଧ୍ୟ ହୋଇ ଚାଷୀମାନେ ବିକ୍ରି କରିବାକୁ ଆଣିଥିବା କ୍ଷୀରକୁ ରାସ୍ତା ଉପରେ ଢ଼ାଳି ଅସନ୍ତୋଷ ବ୍ୟକ୍ତ କରିଥିଲେ ।