ବଇଣ୍ଡା, ୩୧।୧(ଡି.ଏନ୍.ଏ.) କିଶୋରନଗର ବ୍ଲକ ବଇଣ୍ଡାସ୍ଥିତ ଲୁହାମୁଣ୍ଡା ସେବା ସମବାୟ ସମିତିରେ ସମସ୍ୟା ଲାଗିରହିଛି। ଆବଶ୍ୟକ ମୌଳିକ ସୁବିଧା ଉପଲବ୍ଧ ନ ଥିବାରୁ ଚାଷୀମାନେ ହଇରାଣ ହେଉଛନ୍ତି। ଏହାର ତୁରନ୍ତ ସମାଧାନ ଦାବିରେ ରବିବାର ଭାଜପା କୃଷକ ମୋର୍ଚ୍ଚା ଏବଂ ଅଞ୍ଚଳର ଚାଷୀ ଜିଲାପାଳଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛନ୍ତି।
ଲୁହାମୁଣ୍ଡାରେ ସମବାୟ ସମିତି ଉପରେ କିଶୋରନଗର ଏବଂ ଆଠମଲ୍ଲିକ ବ୍ଲକର ୭ ପଞ୍ଚାୟତର ଚାଷୀ ନିର୍ଭରଶୀଳ। ଏହି ପୁରାତନ ସୋସାଇଟିରେ କୃଷି ଋଣ, ବିହନ ଯୋଗାଣ, ସୁଲଭ ଦରରେ ସାର ଯୋଗାଣ ଭଳି ବହୁବିଧ କାର୍ଯ୍ୟ ହେଉଛି। ଅମଳ ଧାନକୁ ଚାଷୀମାନେ ଏଠାରେ ବିକ୍ରି କରିଥାଆନ୍ତି। ତେବେ ଧାନ ସୁରକ୍ଷିତ ଭାବେ ରଖିବା ଲାଗି ଖଳା, ଶୌଚାଳୟ, ବିଶ୍ରାମାଗାର ନ ଥିବାରୁ ଚାଷୀମାନେ ନାହିଁ ନ ଥିବା ସମସ୍ୟା ଭୋଗୁଛନ୍ତି। ସୁରକ୍ଷା ପାଚେରି ନ ଥିବାରୁ ବୁଲାଜନ୍ତୁ ଉପଦ୍ରବ କରୁଛନ୍ତି। ଏସବୁ ଦାବି ପୂରଣ କରିବାକୁ ଭାଜପା କୃଷକ ମୋର୍ଚ୍ଚା ଜିଲା ସାଧାରଣ ସମ୍ପାଦକ ପ୍ରବୀଣ ସାହୁ, ଚାଷୀ ସନ୍ତୋଷ ସାହୁ, ବନମାଳୀ ଧଳ, ବ୍ରଜବନ୍ଧୁ ସାହୁ, ବାପୁନ ସାହୁ, ନରେଶ ଚନ୍ଦ୍ର ସାହୁ ପ୍ରମୁଖ ଏକ ପ୍ରତିନିଧି ଦଳ ସୋସାଇଟିର ସହ ସମ୍ପାଦକ ଅଶୋକ କୁମାର ସାହୁଙ୍କ ଜରିଆରେ ଜିଲାପାଳଙ୍କୁ ଦାବିପତ୍ର ଦେଇଛନ୍ତି। ଅପରପକ୍ଷେ ଚାଷୀଙ୍କ ଦାବି ସମ୍ପର୍କରେ ଜିଲା ପ୍ରଶାସନକୁ ଅବଗତ କରାଯିବ ବୋଲି ସୋସାଇଟି ସହ ସମ୍ପାଦକ କହିଛନ୍ତି।
