ଶାରଜା, ୨୩।୯: ଶାରଜା, ୨୩।୯: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ୧୩ତମ ସଂସ୍କରଣର ୪ର୍ଥ ମୁକାବିଲାରେ ମଙ୍ଗଳବାର ଗତଥରର ରନର୍ସଅପ୍ ଚେନ୍ନାଇ ସୁପର୍ କିଙ୍ଗ୍ସ ଓ ରାଜସ୍ଥାନ ରୟାଲ୍ସ ମଧ୍ୟରେ ଅନୁଷ୍ଠିତ ମ୍ୟାଚ୍ରେ ଛକାର ବର୍ଷା ଦେଖିବାକୁ ମିଳିଥିଲା। ଟସ୍ ହାରି ବ୍ୟାଟିଂ ଆମନ୍ତ୍ରଣ ପାଇଥିବା ରାଜସ୍ଥାନ ନିର୍ଦ୍ଧାରିତ ଓଭରରେ ୭ ଉଇକେଟ୍ ହରାଇ ୨୧୬ ରନ୍ ସଂଗ୍ରହ କରିଥିଲା। ଜବାବରେ ମହେନ୍ଦ୍ର ସିଂ ଧୋନୀଙ୍କ ଚେନ୍ନାଇ ୨୦ ଓଭରରେ ୫ ଉଇକେଟ୍ ହରାଇ ୨୦୦ ରନ୍ କରିପାରିଥିଲା। ତେବେ ଏହି ମ୍ୟାଚ୍ରେ ଚେନ୍ନାଇ ହାରିବାର କାରଣ ଲୁନ୍ଗୀ ଏନ୍ଗିଡି ରହିଥିଲେ। ସେ ନିଜ କୋଟାର ଅନ୍ତିମ ତଥା ୪ର୍ଥ ଓଭରରେ ମାତ୍ର ୨ଟି ବଲରେ ୨୭ ରନ୍ ବ୍ୟୟ କରିଥିଲେ।
ବ୍ୟାଟିଂ କରିଥିବା ରାଜସ୍ଥାନ ୧୯ ଓଭର ସୁଦ୍ଧା ୭ ଉଇକେଟ୍ ହରାଇ ୧୮୭ ରନ୍ କରିଥିଲା। ଅନ୍ତିମ ଓଭର ବଳକା ଥିବାରୁ ଦଳ ୨୦୦ ରନ୍ ଛୁଇଁପାରିବା ନେଇ ଆଶଙ୍କା ରହିଥିଲା। ଅଧିନାୟକ ଧୋନୀ ଏହି ସମୟରେ ଅନ୍ତିମ ଓଭର ବୋଲିଂ ଲାଗି ଏନ୍ଗିଡିଙ୍କ ଉପରେ ଭରସା କରିଥିଲେ। ଏହି ଦକ୍ଷିଣ ଆଫ୍ରିକା ବୋଲର ନିଜର ପୂର୍ବ ୩ ଓଭରରେ ୨୫ ରନ୍ ବ୍ୟୟ କରିଥିବାରୁ ଧୋନୀ ତାଙ୍କୁ ୨୦ତମ ଓଭର ବୋଲିଂ କରାଇବା ପାଇଁ ନିଷ୍ପତ୍ତି ନେଇଥିଲେ।
ତେବେ ଏନ୍ଗିଡିଙ୍କ ପ୍ରଥମ ବଲ୍କୁ ରାଜସ୍ଥାନ ବ୍ୟାଟ୍ସମ୍ୟାନ ଜୋଫ୍ରା ଆର୍ଚର ୬ ମାରିଥିଲେ। ସେହିଭଳି ଆର୍ଚରଙ୍କ ୨ୟ ବଲ୍କୁ ମଧ୍ୟ ଜୋଫ୍ରା ଛକା ମାରି ବାଉଣ୍ଡରୀ ପାର୍ କରାଇଥିଲେ। ଏହାପରେ ଏନ୍ଗିଡ଼ି ଲଗାତର ୨ଟି ନୋ ବଲ୍ ପକାଇଥିଲେ। ଆର୍ଚର ମଧ୍ୟ ଏହାର ଭରପୂର ଫାଇଦା ଉଠାଇ ୨ଟି ଛକା ହାସଲ କରିଥିଲେ। ଏହାପରେ ଏନ୍ଗିଡି ଏକ ଓ୍ବାଇଡ୍ ବଲ ପକାଇଥିଲେ। ଫଳରେ ଏହିଭଳି ଭାବେ ସେ ନିଜର ପ୍ରଥମ ୨ଟି ବଲରେ ୨୭ ରନ୍ ବ୍ୟୟ କରିଥିଲେ। ଲୁନ୍ଗୀଙ୍କ ପରବର୍ତ୍ତୀ ୪ ବଲ୍ରୁ ୩ ରନ୍ ସଂଗୃହିତ ହୋଇଥିଲା। ଫଳରେ ଏହି ଓଭରରେ ରାଜସ୍ଥାନ ୩୦ ରନ୍ ସଂଗ୍ରହ କରିପାରିଥିଲା। ଏଥିସହ ଏନ୍ଗିଡି ଆଇପିଏଲ୍ ଇତିହାସରେ ୨୦ତମ ଓଭରରେ ସର୍ବାଧିକ ରନ୍ ବ୍ୟୟ କରିଥିବା ବୋଲର ଭାବେ ଅଶୋକ ଦିଣ୍ଡାଙ୍କ ସହ ସାମିଲ ହୋଇଛନ୍ତି। ଦିଣ୍ଡା ୨୦୧୭ରେ ୨୦ତମ ଓଭର ବୋଲିଂ କରୁଥିବାବେଳେ ୩୦ ରନ୍ ବ୍ୟୟ କରିଥିଲେ।