ଆବୁଧାବି, ୧୯ା୯ (ପି.ଟି.)-ଅଷ୍ଟ୍ରେଲିଆର ଟପ୍ ଅର୍ଡର ବ୍ୟାଟ୍ସମ୍ୟାନ ଖ୍ରିସ୍ ଲିନ୍ ବର୍ତ୍ତମାନ ଯଦିଓ ଟପ୍ ଫର୍ମରେ ଅଛନ୍ତି ତେବେ ଗତବର୍ଷ ୟୁଏଇରେ ଟି୧୦ ଟୁର୍ନାମେଣ୍ଟରେ ସେ ଯେଉଁ ଅଭିଜ୍ଞତା ହାସଲ କରିଛନ୍ତି ଆସନ୍ତା ଆଇପିଏଲ୍ରେ ତାହାକୁ କାମରେ ଲଗାଇବେ ବୋଲି କହିଛନ୍ତି। କୋଭିଡ୍-୧୯ ମହାମାରୀ ଯୋଗୁ ଆଇପିଏଲ୍ର ୧୩ତମ ସଂସ୍କରଣ ଭାରତରୁ ୟୁଏଇକୁ ସ୍ଥାନାନ୍ତର କରାଯାଇଛି। ଏହା ଶନିବାରଠାରୁ ଆରମ୍ଭ ହେବ। ଉଦ୍ଘାଟନୀ ମ୍ୟାଚ ଗତଥରର ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ହେବ। ହାର୍ଡ ହିଟିଂ ଓପନର ଲିନ୍ ମୁମ୍ବାଇ ଇଣ୍ଡିଆନ୍ସ ଦଳରେ ସ୍ଥାନ ପାଇଛନ୍ତି। ନିକଟରେ ଶେଷ ହୋଇଥିବା କ୍ୟାରିବିୟନ ପ୍ରିମିୟର ଲିଗ୍ରେ ସେ ସେଣ୍ଟ କିଟ୍ସ ଆଣ୍ଡ୍ ନେଭିସ୍ ପ୍ୟାଟ୍ରିଅଟ୍ସ ତରଫରୁ ୯ଟି ଗେମ୍ ଖେଳି ମୋଟ ୧୫୦ରୁ କମ୍ ରନ ସଂଗ୍ରହ କରିଛନ୍ତି। ତେବେ ଗତବର୍ଷ ୟୁଏଇରେ ଅନୁଷ୍ଠିତ ଟି୧୦ ଲିଗ୍ରେ ଏହି ୩୦ ବର୍ଷୀୟ କ୍ରିକେଟର ମରାଠା ଆରବିୟନ୍ସ ତରଫରୁ ଖେଳି ସର୍ବାଧିକ ୩୭୧ ରନ ସଂଗ୍ରହ କରିଥିଲେ। ସେ ଆହୁରି ମଧ୍ୟ ବ୍ୟକ୍ତିଗତ ସର୍ବୋଚ୍ଚ ସ୍କୋର କରିବାର ସୌଭାଗ୍ୟ ଅର୍ଜନ କରିଥିଲେ। ସେ ୩୦ ବଲ୍ରେ ୯୧ ରନ କରିଥିଲେ। ଆସନ୍ତା ଆଇପିଏଲ୍ରେ ମଧ୍ୟ ଏହି ଭଳି କିଛି ଧମାକାଦାର ପ୍ରଦର୍ଶନ କରିବା ନେଇ ସେ ଆଶାବାଦୀ ଅଛନ୍ତି। ହେଲେ ବର୍ତ୍ତମାନ ମୁମ୍ବାଇ ଇଣ୍ଡିଆନ୍ସର ଚୂଡ଼ାନ୍ତ ଏକାଦଶରେ ତାଙ୍କୁ ସ୍ଥାନ ମିଳିବା ସହଜ ନୁହେଁ। କାରଣ ରୋହିତ ଶର୍ମା ଓ କ୍ୱିଣ୍ଟନ ଡି’କକ୍କୁ ନେଇ ଓପନିଂ ଯୋଡ଼ିରେ ବର୍ତ୍ତମାନ ପରିବର୍ତ୍ତନ କରିବା କୌଣସି ସମ୍ଭାବନା ଦେଖିବାକୁ ମିଳୁନାହିଁ। ହେଲେ ମୁମ୍ବାଇ ଇଣ୍ଡିଆନ୍ସ କୋଚ୍ ମାହେଲା ଜୟବର୍ଦ୍ଧନେ ତାଙ୍କୁ ଯେଉଁ ସ୍ଥାନରେ ଫିଟ୍ ବୋଲି ମନେକରିବେ ସେହି ସ୍ଥାନରେ ବ୍ୟାଟିଂ କରିବାକୁ ସେ ପ୍ରସ୍ତୁତ ଥିବା ଅଷ୍ଟ୍ରେଲିଆର ଏହି କ୍ରିକେଟର ପ୍ରକାଶ କରିଛନ୍ତି।