ଚେନ୍ନାଇ, ୧୧।୭(ପି.ଟି.)-କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ କଟକଣା ଯୋଗୁ ବିଦେଶରେ ଫସି ରହିବାର ଫାଇଦା ନେଇଛନ୍ତି ଭାରତର ଯୁବ ଅନ୍ତର୍ଜାତୀୟ ଚେସ୍ ମାଷ୍ଟର ଲିଅନ ଲ୍ୟୁକ ମେଣ୍ଡୋଙ୍କା। ସର୍ବିୟାରେ ଅନୁଷ୍ଠିତ ପାରାସିନ୍ ଓପନ ଚେସ୍ ଟୁର୍ନାମେଣ୍ଟରେ ସେ ରନର୍ସଅପ୍ ହୋଇଛନ୍ତି। ୨୪୭୦ ଏଲୋ ରେଟିଂପ୍ରାପ୍ତ ୧୪ ବର୍ଷୀୟ ଏହି ଗୋଆ ଚେସ୍ ପ୍ରତିଭା ୯ ରାଉଣ୍ଡରୁ ୭ ପଏଣ୍ଟ ହାସଲ କରିଛନ୍ତି। କରୋନା ଭାଇରସ ସଂକ୍ରମଣ ଯୋଗୁ ଭାରତରେ ଲକ୍ ଡାଉନ୍ କଟକଣା ଲାଗୁ ହୋଇଯିବାରୁ ପିତା ଲିଣ୍ଡନଙ୍କ ସହ ଲିଅନ ପାଖାପାଖି ୩ ମାସ ହେଲା ହଙ୍ଗେରିରେ ଅଟକି ରହିଛନ୍ତି। ସମୟର ସଦୁପଯୋଗ କରି ଏହାର ଫାଇଦା କିନ୍ତୁ ନେଇଛନ୍ତି ଲିଅନ। ସେ ଗତ ଜୁନ୍ରେ ବୁଦାପେଷ୍ଟରେ ଅନୁଷ୍ଠିତ ବାଲାଟନ ଚେସ୍ ଫେଷ୍ଟିଭାଲରେ ଚାମ୍ପିୟନ ହୋଇଥିବାବେଳେ ଏବେ ପାରାସିନ ଓପନରେ ରନର୍ସଅପ୍ ହୋଇଛନ୍ତି। ନିଜ ପ୍ରଦର୍ଶନରେ ସନ୍ତୁଷ୍ଟ ଥିବା ଲିଅନ ଗ୍ରାଣ୍ଡମାଷ୍ଟର ନର୍ମ ହାସଲରୁ ଅଳ୍ପକେ ବଞ୍ଚତ୍ତ ହେଲେ ବୋଲି ପ୍ରକାଶ କରିଛନ୍ତି। ”ପାରାସିନ ଓପନରେ ମୋ ପ୍ରଦର୍ଶନରେ ମୁଁ ଖୁସି। ତେବେ ଶେଷ ରାଉଣ୍ଡରେ ୨୩୪୦ରୁ ଊର୍ଦ୍ଧ୍ୱ ରେଟିଂ ପ୍ରାପ୍ତ ପ୍ରତିଦ୍ୱନ୍ଦ୍ୱୀଙ୍କ ବିପକ୍ଷରେ ଖେଳି ପାରିଥିଲେ ମୁଁ ଗ୍ରାଣ୍ଡମାଷ୍ଟର ନର୍ମ ହାସଲ କରିପାରିଥାନ୍ତି। ଅଳ୍ପକେ ସେଥିରୁ ବଞ୍ଚତ୍ତ ହେଲି“ ବୋଲି ସେ ପ୍ରକାଶ କରିଛନ୍ତି। ପ୍ରତିଯୋଗିତାରେ ସେ ୫ ବିଜୟ ସହ ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ପ୍ରତିଯୋଗିତା ସ୍ଥଳକୁ ପ୍ରବେଶ ପୂର୍ବରୁ ପିଲାମାନଙ୍କୁ ଥର୍ମାଲ ସ୍କିନିଂ କରାଯିବା ସହ ସାନିଟାଇଜର ପ୍ରଦାନ କରାଯାଇଥିଲା ଏବଂ ନିଜ ବୋର୍ଡ ନିକଟରେ ବସିବା ସମୟରେ ମାକ୍ସ ପରିଧାନ କରିବାକୁ କୁହା ଯାଇଥିଲା। ଶନିବାରଠାରୁ ପାରାସିନରେ ଆରମ୍ଭ ହେବାକୁ ଯାଉଥିବା ଗ୍ରାଣ୍ଡମାଷ୍ଟର ରାଉଣ୍ଡ-ରବିନ ଟୁର୍ନାମେଣ୍ଟରେ ଲିଅନ ଭାଗନେବେ। ଗ୍ରାଣ୍ଡମାଷ୍ଟର ଟାଇଟଲ ହାସଲ କରିବା ତାଙ୍କର ପରିବର୍ତ୍ତୀ ଲକ୍ଷ୍ୟ। ତାଙ୍କ ମା’ ଜଣେ ଡାକ୍ତର ହୋଇଥିବାରୁ ଗୋଆରେ କରୋନା ଭାଇରସରେ ସଂକ୍ରମିତ ରୋଗିଙ୍କ ସେବାରେ କାର୍ଯ୍ୟରତ।